Read Konyak Naga MAIKA 3 Bible Online

MAIKA 3 - Konyak Naga bible

MAIKA 3

¹Hüyange Taowe i, Jaiyah, numan Jacob üshanglan hüyange Israel wanglam lampalan! Ngaotingpa jingne mongshange teihhah shepuwa numan ne ngohshihpu;

²tüoyangpoi numan-e hanghe ümeipa tüote nu hüyange hanghepa ünu tüopate ken. Numan-e ü-kahtalante üyin me üsho khok hüyange iman jing üwaan mepu ühak khokke tam.

³Numan-e ü-kahtalan hahküm. Numan-e imanjing üsho khok, iman waanlan phakke tam, hüyange tük me honglak mei kih-e iman tehtam.

⁴Youngwanpate numan-e üngwünlak hipak peiküki, hüpoi Iye numante yejanlak. Numan-e yoppute Iye yejailak, hangjingne ima-a numan-e ünu lingyangki.

⁵Aoyinne imante ümee pha, imante numan me chingmei ngohlak she jan, hüpoi aoyinne imante ümee yepha imante wehok pei ei ja she nyamshaowe tamme ü-kahtalan-a hipalan-e lowe tamnang. Tüokihpu hipalante Youngwanpawe inang,

⁶“Hipalan, numan nyih-a linteki; numan wanghe-a nyipteki. Hangjingne numan-e ü-kahtalan ünyong yete woi, numan-e shaaji hi-ngao itpu hango yenanglak, hüyange numan-e itpu phapu hango ye-oklak.”

⁷Ngepalan hei üjaopalan aoyinne ngoikülak jeng iye itpu phalakei yengaipu nanjingne iman mongshang mongmenglak. Kahwange imante yejanpu jingne iman khongkümpu jupen küplak.

⁸Hüpoi üjingne-a, Youngwanpawe Ijing yaha hüyange ünganwonge matam nang, hüyange Israel kahtalante iman ünuwa hanghe ngaowe tamlak jingne ütingpa juteih hüyange henge tampupa phanang.

⁹Üte jaiyah, numan Israel wanglam lampalan, numan ütingpate nupalan hüyange shupupa-a yeshupune lüppe tampalan!

¹⁰Aoyinne Kahwangpa chingnyu Jerusalem-a toilangpu hei ngaoting ye-ipu tangme weling nang.

¹¹Chingnyu wanglam lampalan-e yakjai jingne hei toi ling, ngengpalan-e ngaokhüm-a ümee jingne hei lüp, hipalan-e iman hi-ngaowa ngin phaküme hei ngao hüyange iman liliye Youngwanpa-a iman phei ngohnang she inang. Iman-e i, “Temante ümengpa hango minpei ja, Youngwanpa-a teman phei ngoh nang.”

¹²Tüokhei numan jeng jengme Zion-a kah lüohpu kih-e lüohlak, Jerusalem heamteiye phongpu ja ne menglak, hüyange Khümjing kahtanga phao ja ne menge mahlak.