Read Konyak Naga MAIKA 4 Bible Online

MAIKA 4 - Konyak Naga bible

MAIKA 4

¹Üküm nyih hipak me ümeken me Khümjing yongyange ngohnang tüopa kahmüoh-a üshei phei shedaopupa ne kahtang üshei tangme daowe onge ngohlak. Jatlan maapu tüopa ngoine yünne jemlak;

²hüyange jatlan maapu peilak hüyange ilak, “Kei, Youngwanpa kahtangte, Jacob Kahwang Khümjingte teman onghah. Hangjingne ima-a Iye temante hanghe lingne tamhu Iye temante nyüopha lak; Iye letampu lamnyu me teman kemlak. Hangjingne ima-a Youngwanpawe nyüowe tampuwa Jerusalem me peinang; Iye yoi kahtalante Zion mepu ngaowe tamnang.”

³Iye jatlan yo me moppu ngao phünlak, wong üyong pheipulan ü-o mepu hei üjai mepu ngao phünlak. Iman-e imanjing yanglow-a kho (ku) ne joplak, hüyange imanjing ngou-a ünah pheipu nyit-ha ne linglak. Jatlan shaaji nishe wehokte yetailak, shapju jingne aope-o nishe yetümlak.

⁴Moilan yoi yoijing wuwüngkah hüyange phukpee yo me chingmei me nyoilak; hüyange aowe-o Ite nyamne yetamlak. Ütahpa Youngwanpawe tüopa ngaoyangki.

⁵Jat liliye yoijing Kahwangte ngao jailak hüyange yoppe khümlak, hüpoi toman-e tomanjing Youngwanpa Kahwangte ngao jailak hüyange jin jinte yoppe khümlak.

⁶Tüo nyih me, Youngwanpawe inang, “Taowe shaoshi yateng phayangpu kahtalan, aoyin phowe teiyange shangne tam tüolan taowe shaijemlak hipak peiküki.

⁷Iman yafaipalan hüyange nok mepu shejai she ngoh, hüpoi aoyin towe ngoh (jetoha) tüolan phei Taowe üla ne ükong wanglak, hüyange iman-a jatnyu ne menglak. Tüopa hipak me peiye jintepu jingne Taowe Zion kahtang mepu imante wanglam lamlak.”

⁸Hüyange nang, Jerusalem, ümeken me Kahwang, Nyeeyompa kih-e, yoi kahtalan tangme yomme ngoh, nishe nangjingne mengpu ahngching ahngjong ne menglak.

⁹Hangne nanga teshin-e wünne üngwünpu? Moipaiwantepu sheko kih-e hangne nang shangpu? Hatüowa numan ahngpa yenangpu jingne, hüyange numan jing nyüoweleipalan lipu jingne hei?

¹⁰Jerusalem kahtalan, nao wangngai ngewantepu sheko kih-e lüppeshüppe hüyange wao eatüoh. Hangjingne shaapa-a numan-e chingnyu tüohyange tailak hüyange kahko me nyoilak. Numan Babilonte tailak hüpoi tüoken me Youngwanpawe numan-a numanjing wepa mepu yintamlak.

¹¹Jatlan maapu nangte shümlak jingne jemteki. Iman-e i, “Jerusalem mahne tamlak! Tüopa chingnyu heampu teman-e ngelak!”

¹²Hüyangpoi Youngwanpawe hanghe teihnang tüolan jatlan-e yeshing. Tahnoijing nyoi me tah hangke yahpei tüokih-e shaoshi yateng phalak jingne iman jamshe shaijem nang she iman-e yeteih tüo.

¹³Youngwanpawe inang, “Jerusalem kahtalan, taitüoh hüyange numan wepalante shaoshi yatengne tamtüoh! Taowe numan yan üwong phei hüyange shakphan yan yashok pheipu mahu üpong shinne wongnange linge tamlak. Numan-e jatlan maapu naowe tamlak, hüyange yakphei lükke iman-e tüopu moth kahtoknyu nopu Youngwanpa üte numan-e yah peilak.”