Read Konyak Naga MAIKA 5 Bible Online

MAIKA 5 - Konyak Naga bible

MAIKA 5

¹O tümyangpu chingnyu, tümyangpu numan shaijemtüoh; hangjingne teman phei tüipalan-e tukteki. Iman-e Israel wanglamlampalan omtüo te yansho phei heaplak.

²“Hüpoi nang, Bethlehem Ephrathah, nanga Judah me nokphong sheshoipu yo meja, hüpoi nang mepu Taowe Israel jingne wanglam lampa ja ngaitamlak, ao (nokphong) üli kahtamyenghan memuh ngoh.”

³Tüokhei ao yhawe puhne ngohpu yoiha manpuh manpuh she Youngwanpawe yoi kahtalan-a imanjing wepalan te shüppe tüohlak. Tüophei me Ipheipu kahtalan aoyin phowe teiye ngoh imanjing yoi kahtalan phei nishe shüppe jemlak.

⁴Aope I peilakeih, Youngwanpa mepu peipu wong phei hüyange Kahwang Youngwanpa Imepu okkeshangpu phei Iye yoi kahtalante wanglam lamlak. Ijing kahtalan-a yenyampe nyoilak hangjingne ima-a kahtoknyu nopu mepu kahtalan-e I kheyongpute yihnoonlak,

⁵hüyange Iye chingmei yah peilak. Aope Assyrialan-e teman kahmük chinghahlakei hüyange teman-e dodoyangpu lüowe ngailakei, Iphei tüi-e teman-e nyeeyompa nyit, wanglam lamlak woipalan kahta tet nehoi ngoi-e ngailak.

⁶Yonglah wong phei iman-e Assyria naolak, Nimrod kahmük peten kaiye onglak hüyange iman-e aope teman kahmük chinghahwe peilakeih Assyrialan mepu iman-e teman yinlak.

⁷Jacob kahtalan aoyin towetüoh iman-a jatlan maapu jingne Youngwanpawe shonpu jaoshepu nyin kih-e, hüyange jongpu üphao tangme waishuya yütpu kih-e ngohlak. Iman-e kahtate yeje Kahwangte monghümlak.

⁸Jatlan yo me jetohapu Jacob-a yengkong mailange phao me yejema-a heeijong me hahying jingne jange yampukih ngohlak. Nyee yo me I ong, iman tangme phao, hüyange iman phünne khoih tam hüyange shaaji yinlak jingne monghümlak yenang.

⁹Israel kahtalan-e iman shongte peipu wepalan naolak hüyange iman khongküm mahtamlak.

¹⁰Youngwanpawe inang, “Tüopa nyih hipak me Taowe numan jing koiponglan yahteilak hüyange numan jing tongtoilan mengtamlak.

¹¹Numan kahmük me Taowe chingnyulan mahtamlak hüyange numan jing meipe latyangpu khongküm khüw winlak.

¹²Numan-e jonhümpu ya-ngan Taowe mahtamlak hüyange shüotan itpa ao-o yenangpe numan tüohlak.

¹³Numanjing peshaolan hüyange üjao long-shongnyulan Taowe menge winlak, shaaji numan-e numan nying nyingke lingpu toishaolante yoppe khümpu yengohlak.

¹⁴Numan kahmük mepu Asherah kahwanglan moung Taowe bheiye winlak, hüyange numan jing chingnyulan mahtamlak.

¹⁵Hüyange ü-ngao yejaipu jatlan khongküm ümong shihpu üyong phei Taowe phuh hahlak.”