Read Konyak Naga MAIKA 6 Bible Online

MAIKA 6 - Konyak Naga bible

MAIKA 6

¹Youngwanpawe ngaopute jaiyah! Lüotüoh, hüyange kahtanglan sheshao me nang ngao phatüoh; kahmüoh hüyange kahtanglan-e nange hanghe i jaine tamtüoh.

²Numan kahtanglan, numan üküm yenangpu kahtoknyu nokjing, Youngwanpawe ngaopute jaiyah! Yoi kahtalan phei tüi-e Youngwanpawe ngao ngohnang. Iye Israel phei tüi-e ümeng phatampu yah peinang.

³“Ü-kahtalan, taowe numante hanghe ling ei? Numan jingne Taowa hangshin hangki yihne mengpu? Üte janpha.

⁴Taowe numan Egypt mepu yah ngai; Taowe numan rha yatuhshao mepu yinne tam; Taowe Mosa, Aaron, hüyange Miriam numan woilak jingne shon.

⁵Ü-kahtalan, Moab Ahngpa Balak-e numante hanghe lingne tüm, hüyange Beor üha Balam-e Ite hangke jan teih tüoyah. Gilgal te taiwante Acacia lakjing me hanghe toishao ngai teihtüoyah. Tüolan toishao teihtüoyah hüyange numan yinlak jingne Taowe hanghe ling numan-e teih peilak.”

⁶Aope tao Ite yoppe khümlak jingne peilakeih, wangdang Kahwang Youngwanpate taowe hanghe yah peilak shi? Jakke dolak jingne taowe Ite shemeipupa mahu üha yah peilak a?

⁷Taowe Ite nyee haja tokte haja yejema-a üküm yenangpe yünpu olive minnga yah peipuwe Youngwanpa mongmei ne tamlak a? Ü-ünu yahteilak jingne taowe Ite ü-ha jeiyongpa dolak a?

⁸Yeje, hanghe shemeipupa Youngwanpawe tomante ngaoyangki: Iye toman mepu hanghe yahhu tüowa hatüo ngohnang: hanghe ütingpa tüo linglak, yelakpe kenpu hüolak, hüyange teman Kahwang phei innenyaipu phei shüppe shapu.

⁹Youngwanpate nyamlelak jingne kentamongtingpu shemei. Iye chingnyute nyiknang, “Jaiyah, numan kahtalan aoyin chingnyu me jemnang!

¹⁰Kahta ümenglan noksa me iman-e ngaoting ye-i-pe tüopu shengngin ngohnang. Iman-e Taowe nupu toilam ja hüke toklak yeshupe jonnang.

¹¹Aowe toklak hüyange tokyong yeshupe jon tüolan kahtate Taowe hangke ümeng winlak?

¹²Numan hakpalan-e toinanpalante yak yunang, hüyange numan khongküm tahleih ipalan.

¹³Tüokhei numan ünu jingne Taowe numan heamlak hüyange mahtamlak ükong wangteki.

¹⁴Numan-e hahlak hüyangpoi sea yemohlak, hüleima numan yelakpe seanyaolak. Numan-e toinan-a kiye peilak, hüpoi numan-e tüolan-a tükke angpu ye-oklak; hangheyin numan-e hanghe linge tükke ang Taowe wehok me mahtamlak.

¹⁵Numan-e üli deilak, hüpoi tah yeyahlak. Numan-e olive mepu minnga linglak, hüpoi tüopa aope-o jonne ye-oklak. Numan-e wuwüngti ngütlak, hüpoi tüopa aope-o yeyinglak.

¹⁶Tüopa-a ngailak hangjingne ima-a Omri Ahngpa hüyange Iha Ahab Ahngpawe lingpu ünu lamte numan woiyangki. Iman-e lingeyahpu pheite numan woiyangki, tüokhei Taowe numante heampu yah peilak, hüyange moilanne numante yaowelelak. Üken phe mepu kahtalan-e numante yaowelepu phei jonlak.”