Read Konyak Naga MAIKA 7 Bible Online

MAIKA 7 - Konyak Naga bible

MAIKA 7

¹Hatüowa üjingne angsa yang! Taowa seanyaopu kahta aowe pee me ülick ja nehoi towe tüohpu yetüo hüyange üwu me wuwünglick yetüopu kahta ja lenang. Wuwünglick hüyange üyüm meipu phuklick khongkümpu khaikümtei.

²Kahmük me ngaoting ipa kahta ja nehoi towe yenang, Kahwangte wangshüm hüopu ao-o yenang. Kahta liliye iy-tak ngaiyange toilanglak jingne hipak ümei ngaipu tanpu shaha. Kahta liliye yoi pheipu jatlilante jangpu shaha.

³Iman yak ümeng linglak jingne okkeshang. Woipalan hei kahpalan-e yakjai shaha yam. Okkeshangpu kahtawe Iye hanghe yahhu imante i, tüokhei iman jamme ütüp ja ne meng.

⁴Iman yo me shemeipupa hüyange ngaoting ipa-a phümha phei nehoi ühak yekoh. Iye imante hipalan kaiye deingao phapu kih-e kahtalante Kahwange shaoshi yateng phalak nyih peiteki. Sha-a iman-a üpong yetüopu me ngohnang.

⁵Numan jing yupilante üting tahlak yejema-a numan jing shümpalante mong tahhüm. Nenok shekonyute nehoi nange hanghe i tüojingne kentingyah.

⁶Tüopa juwanme hayimlan-e imanjing payimlante üngapalan kih-e toiteilak, yhalalan-e yoi nyulan phei tüi-e yonglak, hüyange nyuyong üla lan-e yoi nyeilan phei teelak; kahta ja jingne wepalan yoi noksa mepulan ngohlak.

⁷Hüpoi taowe-a Youngwanpate hei leilak, monghahpu phei taowe-a Kahwang jingne hei, aowe tao yinlak, I jingne hei tanlak. Ü-Kahwange üte jailak.

⁸Ü-wepalan-e ü-tangme ya-naowe leilak ülam yenang. Tao yeiyangki, hüpoi tao üne-o lüolak. Sha-a Taowa wangnyak me ngohnang, hüpoi Youngwanpawe üte wangngai yah phalak.

⁹Taowe I phei tüi-e ünu om, tüokhei shaapa-a I mongshih ngaipute taowe nünlak wongpong. Hüpoi üküm yeme Iye tao yinphalak hüyange püohwe lingyangpuwa tinge linglak. Iye wangngai yete yah ngailak; Iye tao khakshuwe tam-e nyoipu taowe ngelak.

¹⁰Hüwante ü-wepalan-e tüopa ngelak hüyange wepalan ja muh aoyinne üte “Nang Kahwang Youngwanpa ümeken me ngohnangki?” she tokke tongpu lan muh wüokhüwlak. Taowe iman naowetampu, püanglampong mepu sham kih-e lokke taipu ngelak.

¹¹Tüopa nyih me, numan chingnyu jantpenyu linge yelak hipak peiküki. Tüohipak me numan jing yikenga paowe linglak.

¹²Tüopa nyih me nang tangte nang kahtalan-a üken phe mepu leih yekülak, heong yeme Assyria mepu, heye me Egypt mepu, Euphrates yenghoi yekao mepu, yengching jaye jaye hüyange kahtang üjailan mepu.

¹³Hüpoi hangjingne ima-a aoyin tüopa me nyoi ngohyangki tüolan ünu kaiye kahtok-a ükengne menge mahlak.

¹⁴Nange leyangpu kahtalan, nangjing kahtalante nyeeyompa ne mengtüoh, Youngwanpa. Iman wanwüng jeng me nyoiyapoi, iman neikonne üyao pheipu kahtok ngohnang. Iman-e üshong wante lingpu kih-e iman taiye Bashan hei Gilead mepu heeijong ümei me min uhyah.

¹⁵Aope taowe numan Egypt mepu yahngaiyapeih tüohipak me lingpu kih-e Taowe imante kahnyingwüngha ling hüolak.

¹⁶Jatlan-e tüopa ngelak hüyange imanjing wong khongkümpu ngohyange-o hangne-o yemenglak. Nyamteiye iman-e imanjing ju büanglak hüyange iman nate yimlak.

¹⁷Iman kahmak me pu kih-e lehkemlak; iman imanjing meipe latyangpu mepu ninne hüyange nyampu phei ngailak. Teman Kahwang Youngwanpa tangte iman-a nyampu phei leih yelak.

¹⁸Nang kihpu ülao Kahwang ao-o yenang, O Youngwanpa; nange nang kahtalan aoyin üyin me ngoh tüolan ünu winyangki. Nanga jinte mongshih ngaiye yengoh hüpoi nange tomante nange yelakpe kenpu hüolakte lahnyik.

¹⁹Nang-e toman jingne nishe yayeng shüpshelak. Nange toman ünulan-a yamaiye lokke win hüyange yengching ümongte tüolan-a taitamlak!

²⁰Nange tomanjing pajeiyonglante üshongwante janyangpu kih-e nange monghahpu hüyange yelakpe kenpu nang kahtalan, Abraham hei Jacob huhayimlante hüolak.