Read Konyak Naga NAHUM 1 Bible Online

NAHUM 1 - Konyak Naga bible

NAHUM 1

¹Hatüowa Nineveh jeng ngaolan laitep. Elkosh mepu Nahum-e ngepu himang.

²Youngwanpa Kahwange tokteiwongwei palan jingne nünne ngohpu ye-ok; aoyinne Iphei tüi-e yongnang imante shaoshi yateng phanang. I mongshih ngaipu phei imante Iye shüm-e yenang.

³Youngwanpa-a monglüowe mongshih ngainang, hüpoi I-a wongnangpu phei hüyange ümenglante aope-o shangne yetampe yetüoh. I tailam-a waishihwangkhah hüyange yipnyeih phei, wangphom lan-a I kemtüohwe ngaipu kahmaklan!

⁴Iye yengchingte teetam, hüyange tüopa-a eamah! Iye yengyinlan jüpne tam. Bashan phümhalan kuimah, Carmel kahtang nyanshienge tai, hüyange Lebanon jupenglan kuiküm.

⁵Youngwanpa sheshao me kahtanglan po; I sheshao me phaotanglan jumah. Aope Youngwanpa ngaiyapeih kahtoknyute shuinang; kahtoknyu hüyange tüopa mepu kahta lili ninnang.

⁶Aope I mongshih ngailakei, aowe üyin me ngohpu oklak? Fajümlihlakpa ne I mongshihpu me ao üyin me ngohpu oklak? I mongshih ngaiye loongpu Iye shokke tam; longnyulan-a I sheshao me kahmak ne khoihpai.

⁷Youngwanpa-a meinang; shanghah shaoshi wante Iye yoi kahtalan yinne angnang; aoyin I me lojing yah Iye paowe tüknang.

⁸Hüpoi wongnang puphei peipu muleampu üyong kih-e Iye yoijing wepalan-a lanshe mahtam nang; aoyinne Iphei weihyong yapeih iman-a Iye li ne tamnang.

⁹Youngwanpa phei tüi-e numan-e hanghe konkonpu? Iye numan mahtamlak. Aowe-o Iphei ni lüm me weih khu ne ye-ok.

¹⁰Lüpyange ngohpu huhwu hüyange tahjan üwan kih-e numan-a jakke winlak.

¹¹Nineveh, nang mepu, juteih ümenge maayange, aowe Youngwanpa phei tüi-e lowelam, kahtaja pei.

¹²Hatüowa Youngwanpawe hanghe inang tüo ngohnang: “Assyrialan iman wongnang yapeyoi hüyange üngang ngohyapoi, iman-a mahtamlak, hüyange yenanglak. Ü-kahtalan, Taowe numan shangne tam, hüpoi Taowe tüopa-a üne yelinglak.

¹³Sha-a nang tangme ngohpu sheam üküm ngoine tamlak hüyange nangte shapu yankeilei phünne tamlak.”

¹⁴Youngwanpawe nang jingne hanghe ngaophün pha tüo ngohnang. “Numan min yemahpe ngohlak jingne numan me huhayimlan yengohlak. Iman kahwanglan khümjing me ngohpu peshaolan Taowe mahtamlak. Nang jingne Taowe mangjong tümnang, nang üyin ngohlak jingne yewang!”

¹⁵Leihuyah kahtang yeme ngaolan ümei yah-e peinang hüyange chingmei ngaolan pongtam nang, I ya te leihuyah! Numan motappu nyoitüoh, O Judah, numan-e lahnyik mongko puphei jan yangpu phatüoh. Ümenglan-e shaaji numan kahmük aope-o chinghah ne ye-oklak. Iman-a lanshe mahne tamteki.