Read Konyak Naga NAHUM 2 Bible Online

NAHUM 2 - Konyak Naga bible

NAHUM 2

¹Nineveh, nangte-a shaaji shümteki! Nang paikhoihlak wong peiteki. Kahtawe meipe ne lattüoh. Lamnyu yomtüoh! Shapju jingne tümtüoh!

²(Üshongwante yhatepu wepalan-e chinghah yange mengshao me ngohpu kih-e, Youngwanpawe Israel müktishiwapu linge ye ne o-nang.)

³Wetaipalan-e ree ütak yahteki hüyange jakihpu ütak o tümteki. Iman-e shümlak jingne tümnang! Imanjing pong tongtoilan-a vün kih-e phihlang nang! Imanjing ngouyang tümteki!

⁴Pongtongtoilan püanglamyin kaiye loishe jemnang, Chingnyu neikonne teihom nang. Iman-a phütvün kih-e lüpleih nang, hüyange wanglüppu kih-e iman teiphet nang.

⁵Iye woipalante nyik-e jemnang; shaoyekaote iman-e shungpuwe iman yashah hüonang. Shümme jempalan jantpenyu shongte jemnang hüyange jant khüwlak jingne ree yongnang.

⁶Yengyin yekao petenlan-a ep; hüyange ahngnok-a khüo ta-nang.

⁷Ahngyha-a phowe teiteki; yha shaoshannyulan-a awshu kih-e yoonge shonnang; hüyange mongmengpuwe imanjing jakuh (düam) te tüpnang.

⁸Phüppu tük mepu yeng yünpu kih-e Nineveh mepu kahtalan sheihtaiteki! “Laktüoh! Laktüoh!” she üngwünpu ngai, hüpoi aowe-o leih üye.

⁹Khüm nyieleih yahtüoh! Hon nyieleih yahtüoh! Chingnyuwa shengngin ne maayange!

¹⁰Nineveh mahtamteki, wüngmakke hango yenangpe! Nyampuwe mongjanga jumah; Yatuh nin, wong yenangpe mah; shetalan kuimah.

¹¹Yengkong mailang khok kih-e ngohpu, ümeken nyoime yengkong mailang ühalan tamme ang, ümeken me yengkong mailang hüyange mailang ünyulan kem, hüyange iman jing ühalan yinne angpu chingnyu sha-a üpu?

¹²Yengkong mailange yoiye hahlak toi hüyange tüopa-a yoijing üpi hei ühalan jingne phünne khoih; Iye yoi longsa-a phünne khoihpu meiye maatam.

¹³“Leihuyah Taowa nang phei tüi nang!” she Ütahpa Youngwanpawe inang. “Taowe nangjing pongtongtoi lan-a jakke winlak. Nangjing wetaipalan-a wehok me toilak, hüyange nange ülaolan mepu yahpu sheminlam phe Taowe yahteilak. Nang jing wonga kahtoknyu me shaaji yejailak.”