Read Konyak Naga NAHUM 3 Bible Online

NAHUM 3 - Konyak Naga bible

NAHUM 3

¹Iy shaipu chingnyu jingne onyukei! Nyieleihyahpu hei ngaoleih ipuwe maayange toilangpu yelak okpu chingnyu!

²Jaiyah! Shetwu khokkakpu, tükneilan ngekngakpu wüng koiponglan hoomtükpu yawüng, pongtongtoi shaoyete taipu wüng!

³Koipongte kahtalan-e kangpu, yanglow lüplakpu hei ngoulow lüplakpu! Kahta mang jamloi daowe phongyange, lipu mang ipu yeküm, tüolan tangme kahtalan yashah hüo!

⁴Nineveh me ipu yekümpu üsho yüopulan shaoshi yateng phateki. Leihu-jakihpu hüyange yohnaipuwe loishe ngohpu jatlan yhawe phonglai shümpu me yhate shaoshanne tam.

⁵“Leihuyah, Tao nang phei tüi nang,” she Ütahpa Youngwanpawe inang; “Hüyange nangjing shiengnye (nyeha) nang shetate yüohyange tangko me ngetamlak, hüyange jatlan-e nang tangko me ngohpu leine Taowe tamlak, hüyange ahngchinglan-e nang wüotüopu ngene tamlak.

⁶Taowe nangte yaowelepu phei jonlak, hüyange nangte mak phutamlak. Kahtalan-e nangte yashan yali puphei leilak.

⁷Aoyinne nang nge khongkümpu tokpheiyete leihye kümlak. Iman-e ilak, ‘Nineveh-a heamteiye shüppe ngoh nang! Yha jingne yayenge teihpu ao ngohlak? Aowe yha toloimei ne tamlak?’ ”

⁸Nanga Thebes phei shemeipupa a? Ime-o tienpu oklak ne jantpenyu kih-e yengyin ngoh nang, yeng-a yhatepu jantpenyu.

⁹Yhawe Sudan hei Egypt nite wanglam lam, yha wongnangpu tokkeheilak ne yenangpe ngoh yangki; Libya yha phei teishinpu ngohyangki.

¹⁰Tüoyangpoi Thebes phowe yah teiyangki. Püanglam ünuk lili me iman jing hayimlan-a shette toi. Iman woipalan-a yankeilei phinyange yahtei hüyange phopalan phongyeng yange iman yo me tamme yah.

¹¹Nineveh, nango yuwe jokyange nüngneipu me yeilak! Nango nang wepalan mepu yinlak jingne nganglak.

¹²Nang jing meipe latyangpu lili-a phuklick üyüm pheipu phukpee kih-e ngohlak; peete shuitam, hüyange nang jusa me khakshuwe ülick yeipu kih ngohlak!

¹³Nangjing wetaipalan-a shekolan kih-e, hüyange wepalan sheshao me nang kahmük-a tienne oklak yenangpe ngohnang. Nangjing petenlan me tienpu wenaolan-a vünne hahwinlak.

¹⁴Chinghahlak tümlak jingne yeng shaotüoh, hüyange nangjing meipelan wongnange petüoh! Jaklong ne linglak jingne kümp nyüttüoh, hüyange jaklonga tümme shotüoh!

¹⁵Tüoken me nanga vün-e hahshulak, yanglow-e nanga lange tailak; hüyange nyaodukh-e hahpu kih-e nanga hahtailak. Nyaodukh kih-e nang jaluntüoh, düoduk kih-e nang jaluntüoh.

¹⁶Wangme shanhalan ngohpu phei, shepang she nange pheeinyuleihpalan ngaine tam! Hüpoi sha-a nyaodukhlan-e üyang saayange puwe taikümpu kih-e iman taiteki.

¹⁷Nangjing woipalan-a wangshümpu nyih me jantpenyu me hütyange ngohpu nyaodukh phongpu kih-e ngoh. Hüpoi aope wanghe sheamme ngaiyapeih, iman puwe taimah, hüyange ümekente iman taimah aowe-o shinge yenang!

¹⁸Assyria Ahngpa, nangjing nyeeyompalan-a (governor) shiteki, hüyange nangjing lwngwanglan-a jintepu jingne shiteki! Nang kahtalan-a kahtanglan me yanteki, hüyange nishe iman nokte yah yelak ao-o yenang.

¹⁹Nang mayahpu meitamlak ao-o yenang, hüyange nangjing makolan-a yemei oklak. Aoyinne nang mahpu ngaolan jai, khongkümpuwe mongmei puwe iman yakfa khok. Üküm yenangpe nang mengshipute ütam ja nehoi yinnetaipu okya ei?