Read Konyak Naga HABAKKUK 1 Bible Online

HABAKKUK 1 - Konyak Naga bible

HABAKKUK 1

¹Hatüowa hipa Habakkukte Youngwanpawe ütahte ngaitampu ngaolan ngohnang.

²O Youngwanpa, nange jaishao me, yakphei lükpulan mepu nange toman yinshao me, jamlak jingne taowe hangshin me laowe nyiklak shi? Hangne hükihpu shaoshipu nange üte ngene tampu?

³Hükihwe üte yeshupe lingpalante nange hangke nün okke leipu? Mahtampu hüyange yak phei lükpu khongkümpuwe ü-neikon-e ngohnang, hüyange üken phe me hokkewepu hüyange teelapu shaha ngohnang.

⁴Tüokaiye ngaokhüm-a khaimahtei hüyange jajangjapu ne, hüyange ngaotingpa-a aope-o yeling. Ümeng kahtalan-e khakshupu lanphei shemeipupa tüowepong, tüokaiye ütingpa-a püohwe jon.

⁵“Leihuyah numan neikonne ngohpu jatlante yomme leitüoh, hüyange numan-e hanghe nge tüopate numan yashan yalilak. Taowe ülam ja linglak hüke aope tüopa jeng jailakei numan-e ütingyelak oklak.

⁶Aoyin nyam nyamshe hüyange nünne yengoh okpu Babilon kahtalan Taowe wongnang ne tamlak. Kahmüklan chinghahlak jingne iman kahtoknyu jaye üshuk ngoiye phetlak.

⁷Nyampu hüyange yawinmongpaipu ngaolan iman-e pongetam, hüyange iman otapuwe ngaokhüm ne iman menglak.

⁸“Iman jing koiponglan-a shengtüpshah lan phei nehoi shephet, seanyaopu hiyanlan phei nehoi shenyamlakpa. Iman jing koipong pheipu kahtalan-a kahmük üjai mepu peinang; imanjing koiponglan-e kahtok kookke lokke tam. Iman-a awlan kih-e imanjing wepalante shümjang shümme shokke ta-nang.”

⁹“Imanjing nyahponglan-e yakphei lükke naowe, hüyange iman owe peipute moilan fajümlih nang. Iman-e phowe yahpalan-a yengching pheihkek pangpu phei shepang she ngohnang.

¹⁰Iman-e ahngpalante yaowelenang hüyange üyih üyonglante nyitam. Hüyange jajakihpu meipe latyapoi, imante tienpu ye-ok; iman-e kahtok hoomme tonne linge ngai hüyange tüopa omme yah.

¹¹Tüophei me iman-e tüopa tangme wangyang leipu kih-e moiyetainang hüyange tüopa-a linne tam; hüyange yeine tamlak iman wonga yoi kahwang ne mengetam nang.”

¹²O Youngwanpa, üwang memuh nanga Kahwang ngohnang. Nanga ü-Kahwang, Üjaopa hüyange üküm yenang. Youngwanpa ü-Kahwang hüyange ü-jongwanpa, iman-e tomante shaoshi yateng phatamlak jingne nange iman le hüyange iman wongnangne tam.

¹³Hüyangpoi hükihpu lowelampu hüyange ümeng kahtalan sheshao me nang hangke yonglak? Ümenglante leilak jingne nang mük-a jamloi jaowe ngohnang, hüyange ümeng lingpu kahtalan shongme nang yeyong oklak. Hüma-a aope iman-e iman phei khakshupupa kahtalan mahne tamwante hangne nang jünge ngohpu?

¹⁴Hangke nange kahtalan-a nyah kih-e yejema-a iman woilak jingne wanglam lampa yenangpu nyaodukh mokh-halante jonpu kih-e jonpu?

¹⁵Ümenglan-e kahtalan-a yankeih phei iman-a nyah ja leye omnang. Iman-e iman-a shaanmong me shuwe ye nang! Hüyange iman phowe ok yahpu tangme mongmeipuwe üngwün nang!

¹⁶Tüojingne imanjing shaan te nehoi yoppe khümnang hüyange tüolante toidopu nehoi pha nang, hangjingne ima-a imanjing shaanne imante shemeipupa shemin lamphe phanang.

¹⁷Iman-e yoi jonpu yanglow-a jinjinte jonne hüyange shüpshe yenangpe jatlan-a mahne tamme kümlak a?