Read Konyak Naga HABAKKUK 2 Bible Online

HABAKKUK 2 - Konyak Naga bible

HABAKKUK 2

¹Tao ü-yomtepte onglak hüyange Youngwanpawe üte hanghe ine tamhu hüyange taowe ngao ngaipute Iye hanghe janne yelak tüopate leine tanlak.

²Youngwanpawe üte tüopa janpu pha: “Taowe nangte hanghe ütahte ngai longsheng tangme meimeiye nyantüoh; tüome nakshih hipak phe me tüopa-a ipu oklak.

³Hangjingne ütahtengaipu-a itpu hipak jingne tannang; tüopawe üküm hipak jingne ngaonang hüyange tahleih ne yeje.

⁴Hüyange ngaolan-a tüopa ngohnang: ‘Aoyin ünu me ngoh iman yinpu ye-oklak, hüpoi aoyin Khakshuwe ngoh iman üyin ngohlak hangjingne iman-e Kahwangte ütinglak.’”

⁵Tüopheima-a, wuwüngti-a lowelamme tampa; hahnyakpu kahtalan-a ota-nang hüyange toloi yemei ok. I hahnyakpuwa yimshon khaoyongpu shinne; lipuwe wangteki she aope-o ye-i-okpu kih-e I ngohnang. Tüojingne iman-e jat japhei me jat ja she iman jingne omme kümnang.

⁶Chinghah tampu kahtalan-e iman chinghahwe tampalante teetampu hüyange yeitampu ngao ilak. Iman-e ilak, “Numan-e hanghe numanjing yeje tüopa yah, hüpoi numan mahnang! Numan-e seatampalante kange hakpa ne menge hangshin hipak laowe ngohlak?”

⁷Nange sealeihyangpulan mokhshe yeyonglak a? Iman-e nang loi ne tamlak hüyange nang ninne yetamlak a? Hüwante nanga imante nyieleihne tamlak.

⁸Numan-e jatlan maapute nyieleihpu yah, hüpoi sha-a aoyin towe yinne ngoh tüolan-e numante nyieleih phalak; hangjingne numan-e toilang yange ünu ompu hüyange kahtoknyu kahtalan hei imanjing chingnyulan khongkümpute numan-e yak phei lükyangpu jingne ngailak.

⁹Numan mahnang! Numan-e hanghepa yakphei lükke yah tüowe numan hakpane meng, hüyange numan noksalan yemeipu hei wengtuh mepu yinlak jingne ngang!

¹⁰Hüpoi numan-e tümpuwe numan noksalante wüotüopu hei yahpei; jatlan maawe numan-e mahtampuwe numan nying nyingke heamlakpa hei yah peinang.

¹¹Jantpenyu longe nehoi üngwün nang; hüyange üngwünpute aotunglan-e lüngjannang.

¹²Numan mahnang! Numan-e ümeng linge chingnyu ja tüo hüyange tüopa-a iy-tak shai-e chingnyune linge ngai.

¹³Numan-e ompu jatlan iman nying nyingke jajang jawe nantoi mahwe shang, hüyange iman-e linge ngaipu khongküm vünloong üne onge mah. Ütahpa Youngwanpawe tüopa lingyangki.

¹⁴Hüyangpoi yengchinglan yenge maawe ngohpu kih-e kahtoknyuwa Youngwanpa manyangpu müktishiwawe maawe ngohlak.

¹⁵Numan mahnang! Numan mongshih ngaipu phei numan-e yaowele hüyange numan yupilante wüotüone tam; iman jokpu phei jamshe numan-e imante shuiye lüpshüpne tam.

¹⁶Tüopa nanmee ne yihnoonpu tüohah shepu nanleiye numan wüotüopu ngelak. Numan, numan nying nyingke yinglak hüyange shuiye kemne tamlak. Youngwanpawe numan yoi shaoshi yatengpu wan yingne tamlak, hüyange numante yihnoonpuwa wüotüopune lüppe tamlak.

¹⁷Lebanon phaolan numan-e akkeküm, shaapa-a numan akke tamlak. Numan-e tüopa me ngohpu yinmoklan toi; sha-a yinmoklan-e numante nyamshaowe tamlak. Hangjingne ima-a numan-e iy-tak shai-e ünu omyangpu hüyange kahtoknyu kahtalan hei tüopa me ngohpu chingnyulante numan-e yakphei lükyangpu jingne tüopa-a hei ngailak.

¹⁸Peshao me hanghe yahlak ngohnangki? Hatüowa kahtawe linge ngaipu ülam ja hei ngohnang, hüyange tüopawe numante tahleih hei japa hango ye-i-phalak! Tüopate üting laklak ne, tüopa linge ngaitampupate tüopawe hanghe ümei linge tamnangki? Ngaone nehoi ye-okpu Kahwang ja!

¹⁹Numan mahnang! Pekhüw ja te numan-e, “Lüotüoh!” yejema-a long oun jate, “Yongtüoh!” she inang; Peshao jawe numante ülam ja nehoi ütahte ngaitamlak a? Tüopa me hon hei khüm me lümyange ngohne ok, hüpoi tüopa me üyin yenang.

²⁰Hüpoi Youngwanpa-a, I yoi üjao khümjing me ngohnang; kahtoknyu me ngohpu moilanne I sheshao me jünge ngohne tamtüoh.