Read Konyak Naga ZEPHANIA 1 Bible Online

ZEPHANIA 1 - Konyak Naga bible

ZEPHANIA 1

¹Hatüowa Judah me Amon üha Josiah ahngne mengwante Youngwanpawe Cushi üha Zephaniate phapu ngaolan ngohnang. (Zephania-a Ahngpa Hezekia mepu Amariah, Gedaliah, hüyange Cushi kaiye peipu ne ngohyangki.)

²Youngwanpawe i, “Kahtoknyu me ngohpu shemin lamphe Taowe kotte mahtamlak;

³kahtanyuha khongküm hüyange yinmoknyuha, awhalan hüyange nyah. Ümenglan khongküm yeitampu Taowe yah peilak. Kahtanyuha khongküm Taowe kotte mahtamlak, hüyange yinne tampu sheja nehoi yetüohlak.” Tao Youngwanpawe ngaoyangki.

⁴“Taowe Jerusalem hüyange Judah kahtalan khongkümpute shaoshi yateng phalak. Tüoken me Baalte yoppe khümpu ükümpa yanwu Taowe phünne tamlak, hüyange aowe-o Ite shaoshanpu ülaojat ngengpalan nehoi yeteih tüolak.

⁵Aowe wanghe, linnyu hüyange shanhalante yoppe khümlak jingne noktokte onglakeih Taowe mah tamlak. Taowe üne-o aoyinne üte yoppekhüm hüyange üte yihnoonne jiengjepyange-o hüpoi Milcom kahwang min me jiengnang tüolan-a Taowe mahtamlak.

⁶Aoyin Youngwanpa mepu toklüp hüyange shaaji yewoi, aoyin Youngwanpa tangte yepei yejema-a iman woilak jingne yetong, mahtamlak.”

⁷Kahwangpawe toi lingpu nyih, Youngwanpa nyih ü-o me ngohnang, tüokhei I shongme jünge ngohyah. Youngwanpawe yoi, kahtalan-a toidopu kih-e lange kümlak jingne tümnang.

⁸Tüopa ünglangpu nyih, Youngwanpawe inang, “Taowe üyih üyonglante, ahnghalante, hüyange aoyinne ülao jatlan wanglam jon khongkümpute shaoshi yateng phalak she inang.

⁹Aoyinne ülao jatlan kih-e yoppe khüm hüyange aoyinne nyieleih-e yepu toinanne imanjing nokpulan nok maawe tamlak jingne toilang hüyange kuh khongkümpute Taowe shaoshi yateng phalak.

¹⁰“Tüopa nyih me” she Youngwanpawe inang, “Numan-e Jerusalem Nyah Peten me shappe üngwünpu ngaowüng (numan-e) jailak. Numan-e chingnyu üla watte lingpu nyoime shappe yoongpu hüyange kahtanglan ne wennekapu ngaowüng üyong jailak.

¹¹Numan chingnyu üphang yekao me nyoipalan-e aope numan-e tüopa jailakei, shappe yoonge üngwüntüoh, hangjingne ima-a pheeinyu leihpalan khongkümpu lilak!”

¹²Tüo hipak me Taowe vüntük phei Jerusalem pom-yamlak hüyange tüolan aoyin jenanghahpu ne ngoh shaoshi phalak; aoyin toine yemengpu wuwüngti towe tüohpu kipulan; aoyin-e “Youngwanpawe ümeng jeyah ümei jeyah hango minling ja she iman mongjang me teih.

¹³Imanjing moth-a nyieyahlak hüyange noklan-a menge wintamlak. Iman-e wenangpu noklan me iman aope-o yengohlak, yejema-a iman-e deihüm nangpu wuwüngwu mepu wuwüngti yeyinglak.”

¹⁴Youngwanpa nyihnyuwa owe peinang, yeonge owe hüyange mamshe peiküki! Tüopa-a ükhah nyih ja ne menglak, hangjingne ima-a mong sheyongpupa nyahpong nehoi monghümlakpa mahteiye üngwünlak!

¹⁵Tüopa-a mongshih üyong menge ngaipu nyih ne, shangpu hüyange jelo sheampu nyih ne, heampu hüyange mahpu nyih ne, wangnyakpu hüyange wangmangpu nyih ne, nyaakke hüyange wangphom nyeihpu nyih ne,

¹⁶shapju nyawong wüngpu hüyange meipe latyangpu chingnyulan hei daonoklan phei tüi-e shapju haapu nyih ne menglak.

¹⁷“Hükihpu mahtampupa kahtanyuhalan tangme Taowe peine tamlak hümme nakshih moilanne mükmüopa kih-e pomme panlak. Iman-e ü-phei tüi-e ünu ling, hüyange sha-a imanjing iy-a yengkih-e shokke tailak, hüyange imanjing lipu manga kahtok me seanamne tamlak.”

¹⁸Aope nyih Youngwanpawe I mongshih ngaipu hüolakei, iman jing hon hei khümme nehoi iman yintamne ye-oklak. Kahtoknyu nopuwa I vün ngaiye mongshih ngaipuwe mahtamlak. Aoyin kahtoknyu me ngoh, khongkümpute Iye mokhshe ükümpa peine tamlak.