Read Konyak Naga ZEPHANIA 2 Bible Online

ZEPHANIA 2 - Konyak Naga bible

ZEPHANIA 2

¹O wüopu yenangpu jat, jamshe shüpjemtüoh, jamshe shüpjemtüoh;

²ngaokeng pei-e tahphan kih-e numan moitei shaome, numan tangme Youngwanpa mongshih ngaipu loonge onge peishao me, I loishe mongshih ngaiye hüopu nyih ngoishao me, kenting mongtawe yetüoh.

³Kahmük me ngohpu numan kahta ümeilan khongküm, aoyinne I ngaokenglan jon; Hanghe ütingpa lingtüoh, hüyange numan nying nyingke Youngwanpa sheshao me innyaitüoh. Aoweshingpu, aope nyih Youngwanpawe I mongshih ngaipu hüolakei, Iye numan yinne ok.

⁴Gaza chingnyu me ao-o towe yetüohlak. Ashkelon wanwüng jengne linge tamlak. Ashdod kahtalan-a wanghe manlangpe jange teilak, hüyange Ekron kahtalan-a imanjing chingnyu mepu bhei winlak.

⁵Numan kahtalan aoyin yengnah paowe nyoinang, numan Philistialan mahnang. Youngwanpawe numan tangme litamlak ngaophün phateki. Iye numan mahtamlak, hüyange numan yo me sheja nehoi towe yetüohlak.

⁶Yengching yemepu numan jing kahmük-a nyeeyompalan tep hei nyeelan küwpu kahko ne menglak.

⁷Judah kahtalan aoyin jetoha ne tüoh iman-e numan kahmük-a tünlak. Iman jing nyeekhonga tüoken me uhyinglak hüyange Ashkelon noklan me iman shilak. Imanjing Kahwang Youngwanpa-a iman phei ngohlak hüyange iman nishe jaalunne tamlak.

⁸Ütahpa Youngwanpawe inang, “Moab hei Ammon kahtalan-e ü-kahtalante teetampu hüyange yaoweleye ngaopu, hüyange imanjing kahmük-a iman-e nyieye yahlakei she kheyonge ngaopu Taowe jai yangki.

⁹Tao üting tingha me Israel Kahwangne mengtepuwe Taowe jiengnang hüke Moab hei Ammon ni-a Sodom hei Gomorrah kih-e mahlak. Iman-a hümsa ne menglak hüyange phümha loishe ngaiye jintepu jingne heamlak. Ü-kahtalan aoyin jetoha yangki iman-e imante nyieleihlak hüyange iman kahmük yahlak.”

¹⁰Hatüo kih-e Moab hei Ammon kahtalante iman otapu hüyange loipoipu hüyange Ütahpa Kahwangpa kahtalante teetampu jingne shaoshi yatengpu phalak.

¹¹Youngwanpawe imante nyamshao ne tamlak. Kahtok kahwanglan yenangpu ne Iye linge tamlak, hüyange tüophei me jat liliye yoi yoi kahmük me Ite yoppe khümlak.

¹²Youngwanpawe (Sudan) Ethiopia kahtalan-o yanglow phei li ne tamlak.

¹³Assyria mahtamlak jingne Youngwanpawe yoi ünganwong jonlak. Iye Nineveh chingnyuwa heamtepu wüngmakpu, yeng yenangpu wanwüng jengne linge tamlak.

¹⁴Tüopa-a ümeken me mantoop, yinmok-khong, hüyange yinmok ülam lili jongeyapu nyoijing ja ne menglak. Heamtepu yo me awkhuhlan (Awsuklongkhüm) ngohlak hüyange tawolan me pahyange waolak. Tafünlam me khawanglan-e waolak (aklak). Cedarpee pheipu tüopa tepu noklan-a toitalak.

¹⁵Yoi wongte jamloi otapu hüyange yinyange ngohnang she teihpu chingnyute hanghepa ngailak tüopa-a tüo ngohnang. Tüopa mepu kahtalan-e iman jing chingnyuwa kahtoknyu me sheyongpupa she teihnang. Hangke wüngmakpu nyoi ja ne tüopa menge shonlak, ümeken nyoi me phao yinmoklan toloimei! Aoyin tüopa linne tailakei moilan yashan yalipuwe shinne yekümlak.