Read Konyak Naga ZEPHANIA 3 Bible Online

ZEPHANIA 3 - Konyak Naga bible

ZEPHANIA 3

¹Yoi kahtalante yemeipu konkonpu, teelapu chingnyu onyukei!

²Youngwanpa ngaote yejai yejema-a Iye winneshaipu yeyah. Tüopawe Youngwanpate ütinglakke monghümpu ye-ang yejema-a jamlak jingne Ite yetong.

³Tüopa mepu üyonglan-a waowe ngohpu yengkong mailanglan kih-e; tüopa mepu kahphünpalan-a seanyaowe ngohpu, wang manngai manngai üwaan nehoi towe tüohlak jingne jamloi kheihpu hiyanlan kih-e ngohnang.

⁴Hipalan-a toishaote mong yepha hüyange mong phapu yenang, hanghepa üjao nyoi ngohnang ngengpalan-e nuweshakke tam hüyange Kahwang ngaokhüm-a imante meipupa kih leihkheih tam.

⁵Hüyangpoi Youngwanpa-a yelakpe muh chingnyu me; Iye hanghe ütingpa lingnang, hüpoi hanghe yeshu tüopa-a aope-o yeling. Napjeih she yeshaipe Iye yoi kahtalante ngaotingpa yah peinang. Tüoyangpoi tüoken mepu yejaoyeshapalan-e yelakpe yeshupu lingnang hüyange iman yewüo.

⁶Youngwanpawe inang, “Jatlan nopu Taowe moiwinyangki; Taowe imanjing chingnyulan mahtam hüyange imanjing jantpenyulan hei daonoklan heamne tamme tüoh. Chingnyulan-a wüngmakke püanglam khongkümpu ükengme, sheja nehoi yetüoh.

⁷Taowe teih, hüma-a ü-kahtalan-e üjingne teih tüopu ngohlak hüyange Taowe nyüoweleipu yahkülak, hüyange Taowe imante nyüoyangpulan iman-e aope-o yepelak. Hüpoi mamshe muh iman-e hangke linge pei hüke muh yemeipe nyoingoh hüo.”

⁸Tüokhei Youngwanpawe inang, “Hüke hei tan ngohkei.” Aope Taowe jatlante ümeng phalak jingne yonglakei tüopa nyih jingne tantüoh! Ü-mongshih ngaipu wong imante shinge peilak jingne jatlan hüyange ahngchinglan shaijemlak Taowe tümme shoteki. Ü-mongshih ngaipu vünne kahtoknyu nopu mahtamlak.

⁹“Üting, hüwante kahtalan-e ngaopu ngaowa Taowe jaoshepu ngaone jeilei tamlak, tüo kaiye iman üsheiye Youngwanpa min me nyiklak hüyange mongjang ja phei I shaoshanlak.

¹⁰Ethiopia üjai yeme yanne ngohpu ü-kahtalan nehoi üte dopu yah peilak.

¹¹Tüohipak me numan, ü-kahtalan numan-e ü-phei tüi-e hokkeweyangpu jingne wüotüopu shaaji yenanglak. Aoyin ota hüyange jamloi moilan Taowe winne tamlak; hüyange numan-e shaaji nishe ü-üjao kahtangme ü-phei hokkeweye yeyonglak.

¹²Tüoken me Taowe aoyin innyai hüyange ütingpa me ngoh, jamlak yamme aoyin ü-tangte pei tüolan kahta tüohlak.

¹³Israel jetohapulan-e aohite-o ümeng yelinglak, ngaoleih ye-ilak, yejema-a lowelamne yenganglak. Iman ao te-o yenyampe jaalunne hüyange yinne ngohlak.”

¹⁴O Zion yhala, mongmeipuwe üngwünne hem loktüoh! Nang mongjang üsheiye mongmeitüoh, Jerusalem yhalalan!

¹⁵Nangte shaoshi yateng phapa Youngwanpawe üküm ngoine tamteki; nangjing wepalan khongküm Iye yahteiteki. Youngwanpa, Israel ahngpa-a numan phei; sha-a nyamlak ülam hango yenang.

¹⁶Hipak ja peiküki aope iman-e Jerusalemte ilak, “Nyamme tahteih, O Zion chingnyu! Nang yak ümangne menge jhotne tahtam!

¹⁷Youngwanpa nang Kahwang-a nang phei ngohnang, I üngan wonge nangte okpupa phanang. Youngwanpawe nangte monghahwe yahlak, hüyange Iye kenpuwe Iye nangte üyin üla yaphalak. Iye hemloklak hüyange nang tangme hoongli mongonglak.

¹⁸Mo hipak me kahtalan mongmeipu shinne mongmeilak.” Youngwanpawe inang, “Mahlakpa ülam lingpu Taowe üküm ngoine tamteki hüyange nang wüokhüwpu yah teiteki.

¹⁹Hipak peiküki! Nangte shangne tampate Taowe shaoshine tamlak; yafaipalan khongküm Taowe yinlak hüyange phowe teiye ngohpalan nokte yahyelak. Iman wüotüo yangpuwa Taowe yihnoonpu ne lüppe tamlak, hüyange kahtoknyu nopuwe imante yihlupu phalak.

²⁰Hipak peiküki! Numan yanne ngohpu kahtalan Taowe nokte yahyelak; Kahtoknyu khongküm yeme Taowe numan-a ütahpane linge tamlak hüyange nishe numan jaalunne tamlak.” Youngwanpawe ngaoyangki.