Read Konyak Naga HAGGAI 1 Bible Online

HAGGAI 1 - Konyak Naga bible

HAGGAI 1

¹Persia me Darius ahngne mengpu wangpeng nishepupa, lekeng wok shepupa üwangpa nyih, Youngwanpawe Haggai hipa kaiye ngao. Ngaolan-a Shealtiel üha Zerubbabel Judah governor jingne, hüyange Jehozadak üha Joshua, Ütahpa Ngengpa jingne ngohyangki.

²Ütahpa Youngwanpawe Haggaite i, “Khümjing linge yelak jingne-a hatüowa shupu hipak üjeja she tüolan kahtalan-e inang.”

³Tüojingne Youngwanpawe Haggai hipa kaiye kahtalante tüopa ngaolan pha:

⁴“Ü-kahtalan, Ü-khümjing heam mahteiye shüppe angyange numan-a yeonge mei-e weyange ngohpu noklan me hangne ngohlak shi?

⁵Tüokhei sha-a ngangpupa Youngwanpawe hüke inang, numan lamnyulan teih tüotüoh.

⁶Numan-e tahli maa-e dei, hüpoi tahyahpuwa üjingha hei yah; numan me hahlak jingne hahying ngohnang, hüpoi numan mohtamlak jingne yewang. Numan-e yinglak jingne wuwüngti ngohnang, hüpoi tüopawe jokke tamlak jingne wange yenang! Numan me inkheklan ngohnang, hüpoi numante üsheam phajange wangngoiye yenang. Hüyange numan-e toilinge nan yepu nanmee-a ükong lüotepu nyekhok me angne hei nan.

⁷Hükih-e ngangpupa Youngwanpawe inang, numan lamnyulan teih tüotüoh.

⁸“Sha-a kahtang yete ongtüoh, pekhüw yahtüoh; hüyange Khümjing linge yetüoh; hüwante Tao mongmeilak hüyange üte hangke linglakne ngoh hüke yoppe khümlak.

⁹Numan-e nangjange tah yahlak she monghüm, hüpoi tüolan-a shoimahteiye ngai. Hüyange aope numan-e nokte tah yah ye, Taowe tüolan-a puweteine tam. Hangne Taowe tüopa lingpu? Hangjingne ima-a ü-khümjing heamteiye shüppe angyange numan lili yoi yoi toishao me nan yenangpe nok me ngoh.

¹⁰Tüokhei numan tangme, wange yoi nyim tükke angnang, hüyange kahtokke yoi ülick tükke angnang.

¹¹Kahmükte Taowe tüopa kahtanglante, wongli kah tangme, wuwüngkah tangme, hüyange olive pelickjongte; kahtok-e lickke tampu ülicklan tangme, kahtalan hei yinmoklan tangme, hüyange numan-e jonge yaneshe ngangpu lamphe li tangme heleipu yah peiyangki.”

¹²Hüwante Shealtiel üha Zerubbabel hei Jehozadak üha Ütahpa Ngengpa Joshua hüyange jetohapu kahta üshei-e Youngwanpa Kahwange imante hanghe linglak jingne ngaowe tam, khongküm ling. Iman nyam, hüyange Youngwanpa ngaolan shonpa Haggai hipa ngao jaiye jon.

¹³Hüwante Haggaiye kahtalante Youngwanpa mepu ngaolan pha: “Tao numan phei jamme ngohlak, hatüowa Taowe janpu.”

¹⁴Kahta lilite khümjing me toi linglak jingne Youngwanpawe henge tam. Judah governorpa Zerubbabel, Ütahpa Ngengpa Joshua, hüyange aoyin phowe teiye ngohpu mepu leihye kahtalan khongkümpute heng. Iman-e imanjing Kahwang, Ütahpa Youngwanpa Khümjing me toi lingne,

¹⁵Darius ahngpu wanglam lampa nishepupa wangpeng, lekeng wok shepupa hüyange nyih da me peli shepupa nyih me ükong wang.