Read Konyak Naga HAGGAI 2 Bible Online

HAGGAI 2 - Konyak Naga bible

HAGGAI 2

¹Darius ahngpa wangpeng nishepupa, lekeng nyit, nyih da me ja shepupa nyih me Youngwanpawe Haggai hipa kaiye üne-o ngao.

²Iye Judah governor Zerubbabel hei Ütahpa Ngengpa Joshua, hüyange kahtalante imante tüopa ngao ilak jingne Haggaite ngao;

³Hatüo khümjing hangshin meimalak teihtüopu oklak numan yo me ütam ja nehoi ngohyah? Hatüowa numante sha-a hangke ngenangki? Hatüowa hangne-o yejepu kih nge ne ok.

⁴Tüoyangpoi wongnange ngohyah, O Zerubbabel, she Youngwanpawe inang; hüyange wongnange ngohyah, O Joshua Ütahpa Ngengpa Jehozadak üha: hüyange wongnange ngohyah, kahmük me numan kahta khongküm, she Youngwanpawe inang; hüyange toilingtüoh; hangjingne tao numan phei ngohnang, she ngangpupa Youngwanpawe inang.

⁵Numan Egypt mepu ngaiwante, Tao numan phei jinte ngohlak she Taowe janyangki. Tao yelakpe numan phei ngohnang, tüokhei nyam-e tahteih.

⁶“Hangjingne ngangpupa Youngwanpawe inang, hipak laowe yengohpe Taowe kahtoknyu hei wangdang ni, kahtok hei yengching nite polak.

⁷Jatlan khongkümpu Taowe powe tamlak, hüyange imanjing shengngin tüoken me yah jemlak, hüyange khümjinga mothte maawe ngohlak.

⁸Kahtoknyu mepu hon hei khüm khongkümpuwa üjing, she Ütahpa Youngwanpawe inang.

⁹Ülapa khümjinga ülangpa phei ünyei meimapu phei ngohlak, hüyange tüoken me Taowe ü-kahtalante jaalunpu hüyange chingmei phalak.” Ütahpa Youngwanpawe ngaoyangki.

¹⁰Darius ahngne mengpu wangpeng ni lekeng tu hüyange nyih da me peli shepupa nyih me Ütahpa Youngwanpawe Haggai hipate üne-o ngao.

¹¹Iye i, “Tüopa tongpute hangke janne yelak Ngengpate tongtüoh.

¹²Leppu ja me ütamme toidopu mepu jaowe shayang phei mei yahma-a hüyange tüopa Ijing ngeng-ahng phakshaoh me yahtaima-a, tüophei me Iye yoijing ngeng-ahng phakshaohwe an ütamte, yangyang phei hahying, wuwüngti, olive minnga, yejema-a ja jakihpu hahyingne jeyapoi let ma-a, tüopa hahyingo jaoweshayangpu ne ilak a?” Aope tüopa ngao tongyapeih, ngengpawe janne i, “Yeje.”

¹³Tüophei me Haggaiye tong, “Leppu ja me Iye kahta mangte letyangpu jingne kahta ja-a nuweshakma-a; tüophei me Iye tüolan hahying jajahepate letma-a, tüolan-o nuweshakpu ne menglak a?” Ngengpawe janne i, “Yejaope ngohlak.”

¹⁴Hüwante Haggaiye i, “Youngwanpawe inang hüke tüo kih-e muh tüopa jat kahtalante hüyange iman-e lingengaipu shemin lamphete lingnang; tüokhei wümjong me iman-e dopu shemin lamphe-a nuweshakteki.”

¹⁵“Hüpoi, sha-a taowe numante yop tongnang, tenyih me tange hüyange sha-a me pei-e teihtüoyah. Youngwanpa Khümjing me, long ja üne-o longja tangme heayange yengohpu hipak mepu sha-a te ngoiye, numan-e hangke linge pei?

¹⁶Aope shejawe tok-heeipu da angpute pei, tüo me pen hei ngoh; aope shejawe wuwüngti me tok-heeipu denga yahlak jingne pei, tüo me da hei ngoh.

¹⁷Taowe wangyang ümeng hei yilong numan-e deiliye ngailak jingne ngangpu lili menge winlak jingne shon, hüpoi numan monglüppu ye-ok, she Youngwanpawe inang.

¹⁸Tenyih-a khümjing nokjing shoyang pheime lekeng tu shepupa mepu nyih da me peli shepupa nyih ngohnang. Sha-a me peiye hanghe ngaikülakei leitüoh.

¹⁹Tahlick, wuwüngwu, phukpeelan, chamuk yenang yapoi, hüyange olive peelan-e ngaine yetam yapeyoi, tüoyangpoi sha-a me peiye Taowe numante moimanlak.”

²⁰Tüopa nyih muh, lekeng tepu da me peli shepupa nyih, Youngwanpawe Haggaite ni shepupa ngaolan pha:

²¹Zerubbabel jingne, Judah governorpa: “Taowe kahtok hei wangdang nite poshao shaowe ngohnang,

²²hüyange ahngchinglan toitailak, hüyange iman wong kümlak; Taowe iman jing pong tongtoilan hei iman woipalan leihkheih tamlak; koiponglan lilak, hüyange iman me shotpalan jawe ja teitoilak.

²³Tüopa nyih me ü-shaoshanpa Zerubbabel Taowe nang yahlak, hüyange ü-min me wanglam lamlak jingne Taowe nang lelak. Taowe lepupa-a nang ngohnang.” Ütahpa Youngwanpawe ngaoyangki.