Read Konyak Naga ZEKHARIA 1 Bible Online

ZEKHARIA 1 - Konyak Naga bible

ZEKHARIA 1

¹Persia me Darius ahngne mengpu wangpeng ni, lekeng tet shepupa me, Iddo ühu, hüyange Berechiah üha, hipa Zekhariate Youngwanpawe tüopa ngaolan pha.

²“Tao, Youngwanpa-a nangpunangpa lante yeonge mongshih ngaiyangki;

³Tüokhei sha-a Taowe numante inang, ü-tangte leih yekei, hüyange Tao numan tangte leih yeküning, she Youngwanpa Kahwange inang.

⁴Nangpu nangpalan kih-e tahngoh. Hipak yeonge taiteki, hipalan-e imante ünu me yenyoilak jingne ngaowe, shaaji nushakpu üyin me tahngoh she iye imante ü-ngaolan phayangki. Hüpoi iman-e ü-ngaote yejai yejema-a ü-nyingme yeyah.

⁵Nangpunangpalan ümeken me ngohnangki? Hüyange tüolan hipalan iman jinte ngohnangkü a?

⁶Ü-shaoshanpa hipalan kaiye Taowe nangpu nangpalante ngaokeng hüyange deingao phayangki, hüpoi iman-e imante ye-i-yeshe hüyange tüopa nanleiye iman shangyangki. Tüophei me nakshih iman monglüp hüyange Tao, Ütahpa Youngwanpawe imante iman-e tüolak wange hüyange Taowe linglak jingne mongyangpu kih-e shaoshi yateng phateki she shinge peiyangki.”

⁷Darius ahngne mengpu nishepupa wangpeng, lekeng pen me ja shebat lekeng nyih da me peli shepupa nyih me, Iddo üha Berechiah üha Zekharia hipa te Youngwanpa mepu ngao pei; hüyange Zekhariawe i,

⁸wangnyak me wangdang shongmokpa ja koipong ütakja me ongyange taowe nge. Kahjee ja me yekuipee yo me I yong, hüyange I tokphei yeme ülao koiponglan: ütak, tushangpu, hüyange üheng pheipu ngoh.

⁹Taowe Ite tong, “Üyongpa, hatüo koiponglante leppuwa hangshi?” Iye janne ye, “Imante leppu hanghe Taowe nangte hüopha peih.”

¹⁰Tüokhei yekuipee yo me yongpu kahtawe jan, “Taiye kahtoknyute tokke leilak jingne Youngwanpawe iman shonyangki.”

¹¹Iman-e yekuipee yo me yonge ngohpu wangdang shongmokpate ngaolan pha: “Toman-e kahtoknyu khongkümpute taiyangki, hüyange jaitehu, kahtoknyu nopu-a chingmei me hüyange wüngmakke.”

¹²Tüophei me Youngwanpa wangdang shongmokpawe i, “Ütahpa Youngwanpa, Jerusalem hei Judah chingnyulante nang mongshih ngaipu sha-a wangpeng denyit ngoiteki. Nange imante shüpshe hüoshao me hangshin hipak laowe ngohlak?”

¹³Tüokhei Youngwanpawe wangdang shongmokpate shüpshe teihpu hei toloimeipu ngao phei janne ye;

¹⁴hüyange Ütahpa Youngwanpawe hanghe ngaoyangki tüopa ponge tamlak jingne wangdang shongmokpawe üte ngaowe tam: “Taowe Jerusalem hüyange ü-üjao chingnyu jingne yeonge luwe kenpu hüyange teihtüopu ngohnang;

¹⁵hüyange jatlan wüngmakke hüyange chingmei me ngohpu jingne Tao yeonge mongshih ngainang. Ü-kahtalan kaiye ü-mongshih ngaipu Taowe tükke manyepe ngohwante, tüolan jatlan-e ü-kahtalan shangpu shemeng she linge tamnang.

¹⁶Tüokhei chingnyute shüpshe hüolak jingne Tao Jerusalem te leih yenang. Ü-khümjing linge yelak, hüyange chingnyu nishe lingeyelak. Hüyange Jerusalem tangme itte shempu wen anglak,” she Youngwanpawe inang.

¹⁷Wangdang shongmokpawe-o pongtamlak jingne üte i: “Ütahpa Youngwanpawe inang hüke Ijing chingnyuwa nishe jaalunlak hüyange Iye üne-o Jerusalemte jamlak hüyange chingnyuwa I jingne she tünlak.”

¹⁸Tüophei me taowe ngan lei, yinmok üwong peli nge.

¹⁹Üte ngaowe ngohpu wangdang shongmokpate taowe tong, “Hatüo üwongte leppu hanghe shi?” Iye janne i, “Iman-a kahtoknyu mepu wonglan hangheye Judah, Israel, hüyange Jerusalem yanne tam tüo ngohnang.”

²⁰Tüophei me yanmee pheipu toi lingpu kahtalan peli Youngwanpawe üte hüo.

²¹Taowe tong, “Tüolan kahtalan-a hanghe lingne peipu?” Iye janne i, “Tüolan-a Judah yanne tampu üwonglan; tüo me nakshih aohe shango yenolak; hüpoi tüolante yashan tamlak jingne yanteppalan peiyangki, hüyange tüolan üwong jatlan yeitamlak aoyinne iman üwong Judah kahtok phei tüi-e tüome ngohpu kahtalan yantamlak jingne no.”