Read Konyak Naga ZEKHARIA 10 Bible Online

ZEKHARIA 10 - Konyak Naga bible

ZEKHARIA 10

¹Wangpeng tepu lümlei hipak me waikei tampha she Youngwanpate tongtüoh. Hatüowa Youngwanpa aowe waipheipu wangphom shonne moilan jingne hünge kah ngaiye tamme waishuya shonnang.

²Kahtalan-e peshaolan hei ju-itpalante üpong yamnang, hüyangpoi iman-e tahleih hüyange jajang japu janne yepu hei tüonang. Ütam-e shinmang lüppe inang, hüpoi numan ünyong yete hei woitam nang; iman-e phapu toloimeipuwa angsa.Tüokhei kahtalan-a mahpu nyee kih-e waa-nang. Iman shaoshi nang, hangne ima-a nyeeyompa yenang.

³Youngwanpawe inang, “Ülao jatlan aoyinne ü-kahtalan tangme wanglam lamnang imante Tao mongshih ngainang, tüokhei Taowe imante shaoshi yateng phalak. Judah kahtalan-a üjing, hüyange Tao, Ütahpa Youngwanpawe imante paowe tüklak. Iman-a ü-jingne wongnangpu wehok koiponglan ne menglak.

⁴Judah mepu shongnyu long, I mepu taklak yanlag, I mepu shapju lahhan, I mepu wanglam lampa lili ngaitamlak.

⁵Wetaipalan aoyinne imanjing wepalante püanglam pongme sham yo me toiloi tainang, tüo kih-e Judah kahtalan-e okpu ngelak. Iman-e hoklak hangjingne Youngwanpa-a iman phei ngohnang, hüyange iman-e koipong pheipu wepa kahtalan nehoi naolak.”

⁶“Taowe Judah kahtalan wongnange linge tamlak; hüyange Taowe Joseph noksa yinlak. Taowe iman tangme yayeng shüpshepu ngohlak, hüyange iman khongkümpu nokte yah yelak. Taowe aope-o iman winne ye-angpu kih-e iman-a ngohlak Taowa imanjing Kahwang Youngwanpa, iman-e yoppute Taowe janlak.

⁷Ephraim kahtalan-a wetaipalan kih-e wongnange ngohlak, aoyinne wuwüngti yingyangki tüolan kahtalan kih-e iman mongmei ngohlak. Imanjing huhayimlan-e tüopa okpu ngepu teih tüolak, hüyange Youngwanpawe hanghe lingyangki tüopa jingne mongmeilak.

⁸“Taowe ü-kahtalante nyiklak hüyange iman jamshe shaijemlak. Taowe iman yinne tamlak hüyange iman üshongwante ngohyangpu kih-e üngang ngohne tamlak.

⁹Taowe iman jatlan yo me yanne tamyahpeyoi, tüoyangpoi kahmük üjailan me ngohyange iman-e Tao teih tüolak. Iman hüyange imanjing hayimlan yinne ngohlak, hüyange nokte jamme yelak.

¹⁰Egypt hei Assyria mepu Taowe iman-a nokte yah yelak hüyange imanjing yoi kahmük me nyoine tamlak. Taowe iman-a Gilead hei Lebanon me-o nyoine tamlak; kahmük nopu me kahtalan-e maawe ngohlak.

¹¹Aope iman-e imanjing shaoshipu yengching kailakei, Tao, Youngwanpawe yengyungpute heaplak, hüyange Nile yeng lupuwa eamahlak. Otapu Assyria innyailak hüyange wongnangpu Egypt yoime nangpu wong mahlak.

¹²Taowe ü-kahtalan wongnangne linge tamlak, iman-e üte yoppe khümlak hüyange ü-ngao jailak.” Youngwanpawe ngaoyangki.