Read Konyak Naga ZEKHARIA 11 Bible Online

ZEKHARIA 11 - Konyak Naga bible

ZEKHARIA 11

¹O Lebanon, nangjing taküplan eptam tüoh, hümme nakshih nangjing cedar peelan-a vünne hahlak!

²Cypress peelan, shaptüoh hüyange shappe yoongtüoh, cedar-a toitateki; yashan yalipu peelan-a mahne tamteki! Bashan longkham peelan, shaptüoh hüyange shappe yoongtüoh; khak hitte ngohpu phaolan-a akke taikümteki!

³Mongshang mongmengpuwe wanglam lampalan üngwün nang; imanjing müktishiwapuwa mahteki! Yengkong mailanglan waopute jaihuyah; imanjing nokne Jordan paowe ngohpu phao menge tamteki!

⁴Youngwanpa ü-Kahwange üte i, “Meitehpalan-e toi yahne ngohpu nyee ükhong yomne nyeeyompa meitam lingtüoh.

⁵Imanjing nokpulan-e iman toi hüyange shaoshi yatengpu yepha. Iman-e mei yüoyange hüke i, ‘Youngwanpa min yongtüoh! Teman hakteki!’ Imanjing nyeeyompalan-e nehoi imante yayengpu yenang.”

⁶Youngwanpawe i, “Kahtoknyu me ngohpu aote-o Taowe shaaji yayengpu yenanglak. Taowe imanjing wanglam lampalan wong phangme kahtalan khongkümpu angne tamlak. Tüolan wanglam lampalan-e kahtoknyuwa jajang japune linge tamlak, hüyange imanjing wong mepu Taowe tüopa yinne yetamlak.”

⁷Aoyinne nyee yahpei hüyange yao iman-e ü-nan shak, hüyange taowa meitehpalan-e toine peipu nyee yompane meng. Taowe shengshaoh ni yah: jate taowe “Monghahpupa” she, hüyange ülao japate “Shüppeshapu” she nyik. Hüyange taowe nyeekhongte paowe tük.

⁸Ülao nyeeyompalan lüm aoyinne üte nu tüolante taowe yenün okpe ngai, hüyange taowe iman-a lekeng ja mongme khongkümpu mahtam.

⁹Tüophei me taowe nyee khongte i, “Shaaji taowa numan nyeeyompa ne yemenglak. Aoyin lilak ne ngoh litüoh. Aoyin mahlak ne ngoh iman mahtamtüoh. Aoyin towe tüoh tüolan-a iman nying nyingke jawe japa tei minmah yah.”

¹⁰Tüophei me taowe “Monghahpupa” she nyikpu shengshaoh yah, hüyange jatlan üshei phei Youngwanpawe hanghepa jiengjeppu linge ang tüopa wintamlak jingne tüopa phakke tam.

¹¹Tüokhei jiengjeppuwa tüonyih me winne tam. Aoyinne nyee yahpei hüyange yüo iman-e üte leiye ngoh, hüyange taowe hanghe ling tüo kaiye Youngwanpawe ngaoyangki she iman-e shing.

¹²Taowe imante i, “Numan-e mongma-a, üte ü-nanmee yahkei. Hüpoi yemongma-a, tüolan-a angtüoh.” Tüokhei iman-e ü-nanmee ne khüm ükhüw delüm üte pha.

¹³Youngwanpawe üte i, “Tüolan-a khümjing ngin angjing me angtam tüoh.” Tüokhei taowe khüm nginkhüo delüm yahyange, üjingne-a khak wange wangngoipu ngin she iman-e teihpu ngin, yahpuwe khümjing ngin angjing me angetüoh.

¹⁴Tüophei me “Shüppe Shapupa” she nyikpu nishepupa shengshaoh taowe phak, hüyange Judah hei Israel ni shüppe shapuwa küppe mah.

¹⁵Tüophei me Youngwanpawe üte i, “Shaa-o nyeeyompu meitam lingtüoh, shaapa-a ühak yekohpupa.

¹⁶Ü-nyeekhong yakjongpane Taowe nyeeyompa ja ang, hüpoi mahtamlakpawe nyamshaopute Iye nyeelante yejam ok; yejema-a mahpupa jingne Iye yelei, yejema-a aoyin mayah yangki tüolan meiye tampu ye-ok, yejema-a yinne ngohpulante uhyingpu ye-ok. Hüke linghah shepu nanleiye Iye shenitpupa nyee mei hah hüyange imanjing yashok teakke hokke wintam.

¹⁷Oh, tüopa angsa nyeeyompa-a mahlakpa! Iye Ijing nyeekhong winne tüoh. Ijing wonga wehokke lanshe mahne tamlak. Ijing yak-a menge mahlak, hüyange Ijing yakjahye mük-a müowe mahlak.”