Read Konyak Naga ZEKHARIA 12 Bible Online

ZEKHARIA 12 - Konyak Naga bible

ZEKHARIA 12

¹Hatüowa Israel jingne Youngwanpa mepu ngaolan, Youngwanpa aowe wangdang lanne yam, kahtoknyu linge ngai, hüyange kahtate üyin pha. Iye inang,

²“Taowe Jerusalem-a wuwüngti wan ja kih-e linge tamlak; yha neikonne ngohpu jatlan-e yinglak hüyange yujokpalan kih-e palalak. Hüyange aope iman-e Jerusalemte tuklakei, Judah mepu ülao chingnyulan-o tuklak.

³Hüpoi aope tüopa hipak peilakeih, Taowe Jerusalem-a yihpu long kih-e linge tamlak, ao jat-e tüopa nowe yahlak jingne nganglakei mayahlak. Kahtoknyu jatlan khongkümpu yhate shümlak jingne wonga ja ne shüppeshalak.

⁴Hüwante imanjing koiponglan khongkümpu Taowe nyamne tamlak hüyange tüolan tokme ongpalan nga ne tamlak. Judah kahtalan tangme Taowe yomlak, hüpoi imanjing wepalan koipong mük Taowe müowe tamlak.

⁵Hüwante Judah nokphonglan-e iman nying nyingke ilak, ‘Ütahpa Youngwanpa Kahwange yoijing kahtalan aoyin Jerusalem me nyoi imante wong phateki.’

⁶“Tüo hipak me Judah nokphonglan-a phao me pahpu yejema-a tahnyin tepu kahte vün pahpu kih-e Taowe linge tamlak, iman-e yaknya hüyange yakjah üshei yekao neikonpu jatlan khongkümpu mahtamlak. Jerusalem kahtalan-a chingnyu me yinyange ngohlak.”

⁷Tao, Youngwanpawe okpupa-a Judah nyahponglante üwangne phalak, tüokaiye hanghepa yihnoonpu David huhayimlan hei Jerusalem kahtalan-e tüolakei tüopa-a towe ngohpu Judah lan phei üyongpane yemenglak.

⁸Hüwante aoyin Jerusalem me nyoi ngohlakei Youngwanpawe yinne anglak, hüyange iman yo me üyampa nehoi David ngohyangpu kih-e wong shenangpa ne menglak. David huhayimlan-e Youngwanpa wangdang shongmokpalan kih-e, Kahwangpa I kih-e iman-a woilak.

⁹Hüwante Jerusalemte shümlak jingne ngangpu jat lili Taowe mahtamlak.

¹⁰“Hüyange Taowe David huhayimlan hei Jerusalem mepu ülao kahtalante shüpshe yaha hüyange yoplak yahawe maatamlak. Iman-e aote lütte toiyapeih iman-e leilak, hüyange aoyinne halom ja shingha ngohpute shappe yoongyapeih, tüokih-e iman-e I jingne shappe yoonglak. Üwangpa halompa mahwantepu kih-e iman-e khahwe shappe yoonglak.

¹¹Hüwante Jerusalem me shappe yoongpuwa Megiddo kahjee me Hadadrimmon jingne shappe yoongpu shinne yonge shappe yoonglak.

¹²Hüyange noksa liliye yoiyoine, hüyange David nyahtüp noksalan-e yoiyoine, hüyange imanjing shekonyulan-e yoiyoine, Nathan nyahtüppe yoiyoine hüyange imanjing shekonyulan-e yoiyoine,

¹³Levi nyahtüppe yoiyoine hüyange imanjing shekonyulan-e yoiyoine, Shemeit nyahtüplan-e yoiyoine hüyange imanjing shekonyulan-e yoi yoine,

¹⁴hüyange towe ngohpu nyahtüp khongkümpuwe nyahtüp liliye yoi yoine hüyange imanjing shekonyulan-e yoiyoine kahmük-e shappe yoonglak.”