Read Konyak Naga ZEKHARIA 13 Bible Online

ZEKHARIA 13 - Konyak Naga bible

ZEKHARIA 13

¹“Tüopa nyih me David huhayimlan hüyange Jerusalem kahtalan iman jing ünu hei yejaoyeshapute khümpu mepu poiye jaolak jingne yengpeiwo ja eplak.

²Hüwante kahmük mepu peshao lan min Youngwanpa yahteilak, hüyange shaaji aowe-o iman yeteih tüolak. Aoyinne hipa weih she iye ngailakei Taowe phutte winlak, hüyange peshaolante khümlak lahnyikpu Taowe yah teilak.

³Tüoyangpoi aope ütam-e yelakpe muh hi-ngao ine nganglakei, I yoipa hüyange yoinyuwe muh Ite nanga li ne tamlak she ilak, hangjingne ima-a Iye Youngwanpa ngao ipuweih she iyange ngaoleih ngaopu jingne! Aope Iye itpu ngao ilakei, Ijing yoipa hei yoinyuwe muh line tamme lütlak.

⁴Aope tüopa hipak peilakeih, hipa aowe-o yoi himang jingne otawe yeteihlak, yejema-a hipa ja leye toi yelinglak, yejema-a kahta lowelamlak jingne yejao yeshapu hipalan oleng yeyahlak.

⁵Hüleima Iye ilak, taowa hipa ja ne yeje, ‘Taowa kahhampa ja, ü-üyin jin kümme taowe kahmük-a hamyangki.’

⁶Hüwante ütam jawe Ite ‘Nang jakuh mepu tüolan ükolan-a hangshi?’ she tongma-a Iye janlak, ‘Taowe tüolan-a shümpa ja nok me tüoke.’ ”

⁷Ütahpa Youngwanpawe i, “Yanglow lüotüoh, hüyange aowe üjingne toiling tüopa nyeeyompate shümtüoh! I toitüoh, hüyange nyeelan-a yanne mahlak. Taowe ü-yak-a üjoihalan phei tüi-e nolak.

⁸Hüyange hatüo hüke ngailak she Youngwanpawe inang, kahmük nopu me tüopa me meitam ni lange winlak hüyange lilak; hüpoi meitam lüm shepupa tüopa me tüohlak.

⁹Hüyange yinne ngohpu lüm shepupate Taowe toklak hüyange vün kaiye khüm jaowe tampu kih-e iman jaowe tamlak. Hon te tokpu kih-e Taowe imante toklak. Hüwante iman-e üte yoplak, hüyange Taowe imante janlak. Iman-a ü-kahtalan üja she Taowe imante iye tamlak, hüyange Taowa iman Kahwang üja she iman-e üte ümeng janlak.”