Read Konyak Naga ZEKHARIA 14 Bible Online

ZEKHARIA 14 - Konyak Naga bible

ZEKHARIA 14

¹Ngaophünpu shotjing me Youngwanpa shotlak nyih owe peiteki. Hüwante Jerusalem-a chinghahlak, hüyange numan mükke ngeye chinghahpalan-e tamme yahlak.

²Jerusalem tangme wehoklak jingne Youngwanpawe jatlan khongkümpu jamshe shaijemlak. Chingnyuwa omme yahlak, noksalan-a nyieleihlak, hüyange shekolante kange jonlak. Kahtalan tangkhüw-a phowe teilak, hüpoi topulan-a chingnyu mepu yah yeteilak.

³Hüwante Youngwanpa yayonge ngailak hüyange lintepu hipak me Iye hokyangpu kih-e, tüolan jatlan phei hoklak.

⁴Tüohipak me Jerusalem heongye Olive Kahtang me I ya yonglak. Hüwante Olive Kahtanga ni ne tange kahjee üyong ngaiye heong hei henyip ükao japongte yanlak. Kahtang tangkhüwpuwa apyekaote hüyange tangkhüwpuwa heyekaote yanlak.

⁵Tüopa kahtang ni ne tampu üpa kahjee kaiye numan lüowe tailak, hangjingne kahtang nipa mepu kahjee Azal ngoilak hüyange Judah me Uzziah ahngne mengpu hipak me aope minwe leiye poyapeih hüwante numan jing pajeiyonglan-e lingpu kih-e numan phette lüowe tailak. Hüwante Youngwanpa ü-Kahwang üjaolan khongküm, Iphei yahyange yukülak.

⁶Aope tüopa hipak peilakeih, wangshümpu ye-i-ma-a wangphom nyeihpu yenanglak,

⁷ye-i-ma-a wangnyak hango yenanglak. Nyihjeih she, wangnyak hipak me nehoi wangngai me hei ngohlak. Aope tüopa ngailak tüowa Youngwanpawe hei shingnang.

⁸Aope tüopa nyih peilakeih, üyin yeng Jerusalem mepu yünlak, tüopa tepu tangkhüw-a heong yengchingte hüyange tangkhüwpu ülaolan-a Mediterranean te talak. Tüopa-a eanyu hipak hei jüo hipak lili me wangpeng kümme yünlak.

⁹Hüwante kahtoknyu üshei tangme Youngwanpa-a ahngne menglak; moilanne Ite Kahwang ja ne muh yoppe khümlak hüyange tüopa min ja phei muh I yang she shinglak.

¹⁰Apyekao me Geba mepu heyekaome Rimmon ngoiye, kahhoi nopu kahjee ne linglak. Tüopa neikonpu kahmüklan üshei tangme Jerusalem-a hüke muh daonok ne linglak; chingnyuwa Benjamin peten mepu ünukye Peten, ümeken me üshongwante peten ngoh, hüyange Hananel daonok mepu ahngnok wuwüngti ngütjing ngoiye ngohlak.

¹¹Tüoken me kahtalan yinne, shaaji mahlakpawe Jerusalemte nyamshaopu yenangpe nyoilak.

¹²Hatüowa Jerusalem phei tüi-e wehok ngaitampu jatlan khongkümpute, Youngwanpawe leamdak phei kawinlak: Iman ya phei yong ngohwante muh, imanjing meei seanümlak, imanjing mük mük-noong me seanümlak hüyange imanjing yee imanjing jusa me seanümlak.

¹³Tüopa hipak me Youngwanpawe iman jamloi she mop ngaine tamlak hüyange kahta liliye yoi phei hüopu lili pholak hüyange shümne tamme nyampu ngailak.

¹⁴Judah kahtalan-e Jerusalem yinlak jingne hoklak. Iman-e jatlan khongkümpu jing moth-hon, khüm, hüyange inkheklan üngang nyiepu ne yahlak.

¹⁵Hüyange tüokihpu leamdak muh, koiponglan, lwngkoilan, udhlan, hüyange gadolan, hüyange wepalan lakjing me ngohpu yinmoklan khongkümpu tangme peilak.

¹⁶Tüophei me Jerusalemte shümme peiyangpu jatlan khongkümpu yo mepu yinpulan wangpeng lep iye Ütahpa Youngwanpate ahngpa ja leye yoppe khümlak jingne, hüyange Peamsheam Mo molak jingne tüokente tailak.

¹⁷Jat ütamme Ütahpa Youngwanpate ahngpa ja leye yoppe khümlak jingne mintai she lanma-a, hümma-a iman kahmük me wai yekei tamlak.

¹⁸Egyptlan-e Peamsheam Mo minmo she lanpu ne mengma-a, hümma-a jatlan aoyinne mintai she lan tüolante Youngwanpawe shonlak daktin jawemuh imante-o shahtamlak.

¹⁹Hatüowa Egypt hüyange ülao jatlan khongkümpu tangme iman-e Peamsheam Mo minmo she lanma-a shaoshi yateng shokke tampu ngohlak.

²⁰Tüohipak me shewanpupa koiponglan lüngha me nehoi “Youngwanpate jaowetam nang” shepu ngao nyanlak. Khümjing me yangkangpu tüklan-a wümjong shongmepu tük-sheng jaopu shinne jaolak.

²¹Jerusalem hei Judah khongkümpu me yangkangpu tük lili-a Ütahpa Youngwanpa yoppe khümpu me jonlak jingne khatte anglak. Kahtalan aoyinne toidopu phanang iman-e tüolan-a toidopu mei yanglak jingne jonlak. Aope tüopa hipak peilakeih, Ütahpa Youngwanpa Khümjingme pheeinyuleihpalan (Kananlan) shaaji ao-o yenanglak.