Read Konyak Naga ZEKHARIA 2 Bible Online

ZEKHARIA 2 - Konyak Naga bible

ZEKHARIA 2

¹Himang ülao ja me taowe kahta ja I yak me wensheam ja jonyange nge.

²Hüwante taowe tong, “Nang hang taiki?” Iye jan, “Jerusalem sheamlak, tüopa hangshin lao hüyange hangshin khao leilak jingne.”

³Tüophei me wangdang shongmokpa aowe ü-phei ngao sheshao yete wen, hüyange ülao wangdang shongmokpa ja Iphei hüopu taowe nge.

⁴Üwangpawe japate i, “Phettüoh hüyange wensheam phei ngohpu naoshe te itüoh, hüke Jerusalem me kahta hüyange yinmoklan loishe ngohlak tüo kaiye jantpenyu anglak-a loilak.

⁵Youngwanpawe janyangki hüke I yoi nying nyingke tüopa jongwanlak jingne chingnyu neikonne vün jantpenyu ne I menglak, hüyange tüoken me I yoi müktishiwa üshei phei nyoi ngohlak.”

⁶Shengtüoh, shengtüoh; apyekao kahmük mepu phet taitüoh she Youngwanpawe inang, hangjingne wang mepu wangyang peli kih-e Taowe nang (yangteng) yanne tamlak she, Youngwanpawe inang.

⁷Babilon me aoyin nyoi numan Zion kahtalan, shengtüoh, yinyah: (hüyange Jerusalemte leih yekei.)

⁸Hanghe üjingne toinyune shemeng she ngoh, aowe numante yakle iman-e yoi müksa intampu ne menglak. Tüokhei Ütahpa Youngwanpawe yoijing kahtalante nyieleihpu jatlan jingne tüopa ngaolan phei tao shonyangki.

⁹“Youngwanpawe yoi nying nyingke numan phei tüi-e hoklak, hüyange aoyin hipak ja me numan shaoshanpalan ne ngoh iman-e numante nyieleih phalak.” Aope tüopa ngailakei, Ütahpa Youngwanpawe tao shon she moilanne shinglak.

¹⁰Youngwanpawe i, “Mongmei puwe hem loktüoh, Jerusalem kahtalan! Numan yo me ngohlak jingne Tao peinang!”

¹¹Hüwante jatlan maawe Youngwanpa tangte peilak hüyange I kahtalan ne menglak. I numan yo me ngohlak, hüyange Iye tao numan tangte shon she numan-e shinglak.

¹²Nishe Judah-a Youngwanpa üjao kahmük me ülaone tümme tapu yafün tüolak, hüyange Jerusalem Iye kenpu chingnyu üshei yomepu ja ne ngohlak.

¹³Youngwanpa omme ngohpu me moilan jünge ngohyah, hangjingne ima-a I-a yoiye toilingpu üjao nyoi mepu peiküki.