Read Konyak Naga ZEKHARIA 3 Bible Online

ZEKHARIA 3 - Konyak Naga bible

ZEKHARIA 3

¹Himang ülao ja me Youngwanpawe üte Ütahpa Ngengpa Joshua Youngwanpa wangdang shongmokpa sheshao me yongyange hüo. Hüyange tüoken me Joshua shongme Ite ümeng phalak jingne tümyange kahshih yonge hüo.

²Youngwanpa shongmokpawe kahshihte i, “Youngwanpawe nangte teetamshih, kahshih! Youngwanpa aowe Jerusalemte kennang nangte teetam shih. Tüopa kahta-a vün mepu yahngaipu shengshaoh kih-e ngohyangki.”

³Sha-a Joshua yejaopu inkhek yahyange tüoken me yongyange ngoh.

⁴Wangdang shongmokpawe yoijing wangpinlante i, “Tüopa kahtawe yahyange ngohpu yejao yeshapu inkhek yah teitüoh.” Tüophei me Iye Joshuate i, “Taowe nang mepu ünu yahteinang hüyange nange yahlak jingne inkhek üla phalak.”

⁵Joshua shangme shangnyeihkhek üla nyeih tamlak jingne Iye wangpinlante ngaokeng pha. Iman-e hüke ling, hüyange Youngwanpa wangdang shongmokpa tüoken me yongyange ngohwante hüwante iman-e inkhek üla innetam.

⁶Tüophei me wangdang shongmokpawe Joshuate i,

⁷hüke Ütahpa Youngwanpawe iyangki: “Nange ü-ngaokhüm jaima-a hüyange Taowe nangte lingne tampu toishao khakshuwe lingma-a, hüwante nanga ü-khümjingte hüyange tüopatepu ghonyoilante yakjongpa ne menglak, hüyange ü-shongme ngohpu wangdang shongmokpalan-e yoppute jaipu meimei kih-e nange yopute Taowe jailak.

⁸Joshua, nang Ütahpa Ngengpa, hüma-a jaitüoh; hüyange numan jamshepu Ijing ngengpalan jaitüoh, nang ngoikülak juwan ümei hüopa: Taowe ü-shaoshanpa ütahte ngaitamlak aote ü-mepu üqui she nyik!

⁹Taowe Joshua sheshao me long ja me sheta nyit nyimyang phei angnang. Tüopa tangme Taowe nyanpu ja angnang, hüyange nyih ja mongme tüopa kahmük mepu ünu Taowe yah teilak.

¹⁰Aope tüopa nyih peilakeih, numan kahta liliye yoi yupilan peiye chingmei hüyange yinne tampu me numan jing wuwüngkah hei phukpeelan-e neikonyange mongmeilak jingne nanphenglak.”