Read Konyak Naga ZEKHARIA 4 Bible Online

ZEKHARIA 4 - Konyak Naga bible

ZEKHARIA 4

¹Ü-phei ngaoyangpu wangdang shongmokpa üne-o pei hüyange shiye ngohpu kahta ja shinloiye tampu kih-e tao loiye tam.

²Iye tong “Nange hanghe ngenangki?” Taowe jan, “Hon phei lingyang phei vüntük yonglak. Tüopa tangme minnga jingne sheng üyong ja. Vüntük yongjing lan me vüntük nyit, tüolan nyit jaja tangme loonglak nyit nangyange:

³vüntük yongjing phinme olive pee ni ükao japong me japong.”

⁴Hüwante wangdang shongmokpate taowe tong, “Üyongpa, hatüowa hanghete leppu ne yongpu!”

⁵Iye üte tong, “Tüolan-a hanghe nange shingya?” Taowe jan, “Üyongpa, yeshing, taowe yeshing.”

⁶Tüophei me Youngwanpa mepu tüopa ngaolan Zerubbabelte phalak jingne wangdang shongmokpawe üte i: “Nyahpong wonge yeje yejema-a nang yoi wongnangpuwe yeje, hüpoi ü-yahawe nange okpu ngelak.

⁷Kahtang shinne daowe Zerubbabel sheshao me büangyange tienpulan-a yenangpe mahlak. Nange Khümjinga linge yelak, hüyange nange ükümpa long yoi nyoi me angwante, kahtalan-e ‘shemeiyaomapu, shemeiyaomapu’ she üngwünlak!”

⁸Ülao ngaolan ja Youngwanpa mepu ü-tangte pei.

⁹Iye i, “Zerubbabel-e khümjing nokjing lingteki, hüyange nok-a Iye linge sholak. Aope Tüopa ngailakei, ü-kahtalan-e hüke hatüowa Tao aowe iman tangte nang shon she shinglak.

¹⁰Iman mongme yehu hangjingne ima-a yeonge shoiye hei linge okpu jingne. Hüpoi Zerubbabel-e Khümjinga yelakpe lingpu iman-e ngelak, hüyange iman mongmeilak.” Wangdang shongmokpawe üte i, “Vüntük nyit-a Youngwanpa jing mük nyit hangheye kahtoknyu nopute leinang tüopa ngoh nang.”

¹¹Hüwante taowe Ite tong, “Vüntük yongjing moini yekao me olive pee ni yongpuwa hanghete leppu?

¹²Hüyange hon yengto ni phin me olive peequi ni, hanghe mepu olive minnga shokke taipuwa hanghete leppu?”

¹³Iye üte tong, “Nange shingya?” Taowe jan, “Yeshing üyongpa, taowe yeshing.”

¹⁴Hüwante Iye i, “Aoyin Kahwange le hüyange kahtoknyu nopu Youngwanpa I shaoshanlak jingne minnga phowe lepu kahta ni-a tüolan ngohnang.”