Read Konyak Naga ZEKHARIA 5 Bible Online

ZEKHARIA 5 - Konyak Naga bible

ZEKHARIA 5

¹Taowe üne-o lei, hüyange shaapa-a wangme laitee pupu taowe nge.

²Taowe hanghe ngenangki she wangdang shongmokpawe üte tong. Taowe jan, “Wangme laitee ja pupu; tüopa-a üjükte yakkong da, hüyange üpeamte yakkong pen.”

³Hüwante Iye üte i, “Tüopa tangme kahmük nopute tailak phoiwümpu nyanyange ngohnang. Laitee jayekao me tüopa inang hüke kahmük mepu kuhpalan lili yah teine tamlak; hüyange jayekao me tüopa inang hüke jiengyangpu phangme ngaoleih ipalan lili-o yahteine tamlak.

⁴Ütahpa Youngwanpawe inang hüke Iye tüopa phoiwümpu shonne teilak, hüyange tüopa-a kuhpalan nok lilite onglak hüyange jiengyangpu phangme ngaoleih ipalan nok lilite onglak. Tüopa-a iman noksalan me ngohlak hüyange iman-a heamteiye tüohlak.”

⁵Wangdang shongmokpa üne-o peingoi hüyange i, “Leihuyah! Üne-o ülamja peiküki!”

⁶Taowe tong, “Hatüowa hanghe shi?” Iye janne ye, “Hatüowa muhto ja ngohnang, hüyange hatüowa kahmük nopu ompu ünu jingne yongnang.”

⁷Muhtowa yanleack phei aapu küplak phei ngohyangki. Taowe leiye ngohwante küplaka eppe ngai, hüyange muhto mongme sheko ja shotyange ngoh!

⁸Wangdang shongmokpawe i, “Tüopa shekote leppuwa nuweshakpu.” Tüophei me Iye yha-a muhto te shunge ye hüyange küplake küppe tam.

⁹Taowe nganne lei hüyange wan-aw kih-e yangteng wanpu phei sheko ni ü-shongte puwe peipu nge. Imniye tüopa muhto nowe yah hüyange tüopa phei puwe taimah.

¹⁰Taowe wangdang shongmokpate tong, “Imniye tüo muhto ümekente teipu?”

¹¹Iye janne ye, “Babilonte, ümeken me iman-e tüopa jingne khümjing welak! Aope iman-e khümjinga sholakei, muhtowa yoppe khümlak jingne tüoken me anglak.”