Read Konyak Naga ZEKHARIA 6 Bible Online

ZEKHARIA 6 - Konyak Naga bible

ZEKHARIA 6

¹Taowe himang ülao ja nge. Tüopa hipakma-a, shakphan yan kahtang nipa me pongtongtoi peli lüowe ngaipu taowe nge.

²Üwangpa pongtongtoi-a koipong ütaklan-e woiyange, nishepupa-a koipong ünyakke,

³lümshepupa-a koipong ühenge, hüyange peli shepupa-a tutushangpu koiponglan-e.

⁴Hüwante wangdang shongmokpate taowe tong, “Üyongpa, hatüo pongtongtoilan-a hanghete leppu?”

⁵Iye janne ye, “Iman-a wangyang peli ngohnang; iman-a Youngwanpa omme ngohpu kahtoknyu üshei yemepu sha-a peinang.

⁶Koipong ünyaklan-e shupu (woipu) pongtongtoi-a apye kaote tai, koipong ühenglan-a henyip yekaote tai; hüyange tutushangpu koiponglan-a heye kahmükte tai.”

⁷Tutushangpu koiponglan ngaipu phei jam jamshe, iman nünne yengohpe tai hüyange kahtoknyute leiye pong. Wangdang shongmokpawe i, “Taitüoh hüyange kahtoknyute leiye pongtüoh!” Hüyange iman-e hüke ling.

⁸Tüophei me wangdang shongmokpawe üte üngwünne i, “Apyekao te taipu koiponglan-e Youngwanpa mongshih ngaipu tükke yene tamteki.”

⁹Youngwanpawe üte tüopa ngaolan pha.

¹⁰Iye i, “Phowe teiye ngohpalan Heldai, Tobijah, hüyange Jedaiah lan-e phapu hünghao yahtüoh hüyange mamshe Zephania üha Josiah nokte taitüoh. Tüolan kahtalan khongküm Babilon me phowe teiye ngohpalan leihyenang.

¹¹Iman-e phapu hon hei khüm phei ahngpa shaoshaoh ja lingtüoh, hüyange Jehozadak üha Joshua Ütahpa Ngengpa shangme shaoh tamtüoh.

¹²‘Ütahpa Youngwanpawe hüke inang she Ite itüoh, “Ao te Pequi she nyik tüopa kahta I ümeken me ngohlakei jaalunlak hüyange Youngwanpa Khümjing linge yelak.

¹³Tüopa aowe welak tüowa I ngohnang hüyange ahngpa ne menge Iye yihnoonpu tüolak, hüyange Iye yoi kahtalante wanglam lamlak. Ijing ahngpa shotjing shongme ngengpa ja yonglak, hüyange chingmei hüyange mongmei puphei iman-e jamme toi linglak.” ’

¹⁴Ahngpa shaoshaoh-a Heldai, Tobijah, Jedaiah, hüyange Josiahlan teihtüopu ja ne Youngwanpa khümjing me ngohlak.

¹⁵“Aoyin kahtalan üjai me nyoi iman peikülak hüyange Youngwanpa Khümjing linge yelak jingne jamlak. Hüyange aope tüopa linge yelakei, numan tangte Ütahpa Youngwanpawe tao shon she numan-e shinglak. Numan-e lanshe numan Kahwang Youngwanpa ngaokenglan jaiye jonma-a tüolan khongküm ngaikülak.”