Read Konyak Naga ZEKHARIA 8 Bible Online

ZEKHARIA 8 - Konyak Naga bible

ZEKHARIA 8

¹Ütahpa Youngwanpawe üte tüopa ngaolan pei.

²“I me ngohpu kahtalante Taowe yeonge ken hangjingne ima-a Jerusalemte Taowe jamhuwe yoongpu jingne, kenpu hanghepawe yhatepu wepalante ü-mongshihpu ngaine tam.

³Tao Jerusalemte leih yelak, Ü-üjao chingnyu, hüyange tüoken me ngohlak. Tüopa-a monghahpu chingnyu ne menge mahlak, hüyange Youngwanpa kahtangte üjao kahtang she nyiklak.

⁴Nishe wunyu hei wupalan, jamloi wupu jingne aope iman kemyapeih wongjoi jonpulan chingnyu mongme shotpu ngohlak.

⁵Hüyange nishe püanglamyin me naoyha hei naoshelan wonne wangpuwe maawe ngohlak.

⁶“Tüokih-e Ütahpa Youngwanpawe inang: Tüolan nyih hipak me tüolan jetohapu kahtalan sheshao me tüopa-a yashanlakpa ne mengma-a, hatüo üne-o ü-sheshao me-o yashanlakpa ne menglak a? she Ütahpa Youngwanpawe inang.

⁷Hükih-e Ütahpa Youngwanpawe inang: Leihuyah, taowe ü-kahtalan heongye kahmük mepu, hüyange henyipye kahmük mepu yinlak,

⁸hüyange Jerusalem me nyoilak jingne Taowe iman yah yelak. Iman ü-kahtalan ne menglak, hüyange Taowa iman Kahwangne, iman tangme khakshuwe hüyange ütingpa me wanglam lam-e ngohlak.”

⁹Hükih-e Ütahpa Youngwanpawe inang; “Hüke khümjing we-oklak jingne, hipalan aoyin Ütahpa Youngwanpa nok lingpu hipak me ngohyangki, iman ju mepu tüolan ngao tüolan nyih hipak me jaipalan, numan yak wongnange ngohyah.

¹⁰Tüopa hipak shaoma-a kahta aowe-o kahta jeyah yinmok jeyah nan shaklak jingne ye-ok, hüyange yoi wepa mepu aowe-o yinpu ye-okpe ngohyangki. Taowe kahtalan-a shejawe sheja phei tüi-e yongne tam.

¹¹Hüpoi shaapa-a tüopa jat mepu yinpulante Taowe ülaopake tükke jonnang, she Youngwanpawe ngaoyangki.

¹²Iman-e chingmei me imanjing ülilan deilak; Imante wuwüngwuwe wulick licklak, kahmük-e ülicklan ngaiye tamlak, hüyange waikeipu wangman-e ngohlak. Taowe tüolan moimanlan ü-jat mepu yinpu kahtalante phalak.

¹³Judah hüyange Israel kahtalan! Lintepu hipak me yinpa kahtalan-e numante phoiwüm yangki, hüpoi Taowe numan yintamlak hüyange moimanlak. Tüokhei mong hahyah hüyange nyamme tahngoh.”

¹⁴Ütahpa Youngwanpawe inang, “Aope numan jing pajeiyonglan-e üte mongshih ngaine tam, iman jingne mahtampupa Taowe tüm hüyange ü-kenmong yejeilei, hüpoi Taowe tümyangpu jonne tai.

¹⁵Hüpoi sha-a Taowe Jerusalem hei Judah kahtalante moimanlak jingne tümnang. Tüokhei nyamme tahngoh.

¹⁶Numan-e tüolan toishaolan linglak yang: Shejawe shejate ngaotingpa ngaotüoh. Ghonyoi me, ütingpa ngaophünpu hüke chingmei yah peipu yayeng phatüoh.

¹⁷Jawe jate yemeipe ngailak ülam tahtüm. Jiengpu phangme tahleih saki tahpha. Ngaoleih ipu, ngaoting ye-ipu, hüyange yakphei lükpute Taowe nunang, she Youngwanpawe ngao.”

¹⁸Ütahpa Youngwanpawe üte tüopa ngaolan pei:

¹⁹“Pelishepupa, ngashepupa, nyit shepupa, hüyange penshepupa lekenglan me yahpu nyaowe lepuwa Judah kahtalan jingne hoongli mongongpu hei mongmei mo ne menge mahlak. Numan-e ütingpa hüyange chingmeite kenlakyang.”

²⁰Ütahpa Youngwanpawe inang, “Jerusalem yamme chingnyulan maapu mepu kahtalan peilak hipak peiküki.

²¹Tüolan chingnyu ja mepu kahtalan-e chingnyu jatepu kahtalante ilak, ‘Toman-a Ütahpa Youngwanpate yoppe khümne hüyange I mepu moiman jingne yopne taipuweih. Kei, toman phei jamme!’

²²Kahtalan üngang hüyange wongnangpu jatlan Ütahpa Youngwanpate yoppe khümlak jingne, hüyange I mepu moiman jingne yopne Jerusalemte peilak.

²³Hatüowa ütahpa Youngwanpa-e hanghe i tüo ngohnang:Tüopa nyih hipak me ülao jatlan kahta pen peiye Jehudi ja inkhekte tükyange ilak, ‘Nange teihjingte ngoine toman-o omhu nangki, hangjingne toman-e jaiyangki hüke Kahwang-a nang phei ngoh nang.’”