Read Konyak Naga ZEKHARIA 9 Bible Online

ZEKHARIA 9 - Konyak Naga bible

ZEKHARIA 9

¹Hatüowa Youngwanpa ngaolan: Hadrach kahmük phei tüi-e hüyange Damascus chingnyu jingne Iye shaoshi yateng phalak ngaokeng tümme ngohnang. Israel jatlan shahane yeje, hüpoi Syria jing ahngjong-o Youngwanpa jing.

²Hamath, hanghepa Hadrach phei yikeng keng, tüopa-o I jing, hüyange tüo kih-e muh Tyre hei Sidon chingnyulan, iman-e okkeshangpu khongkümpu phei I jing.

³Tyre-e yoi jingne she meipe latyangki hüyange hon hei khüm hüke moilanne kahmak ja leye shünge phong yangki!

⁴Hüyangpoi sha-a Ime nangpu shemin lamphe Youngwanpawe yahteilak. Iye yha mepu moth-a yengching me shüplak, hüyange chingnyuwa kahtokne menge vün me jakke tamlak.

⁵Ashkelon chingnyuwe tüopa ngelak, hüyange nyamlak. Gaza chingnyuwe tüopa ngelak hüyange yeonge aa dak-e shaoshilak. Tüokih-e muh Ekron, hüyange yha monghümpuwa küppe tamlak. Gaza yoi jing ahngpa mahlak, hüyange Ashkelon-a wanwüng jengne linge tüohlak.

⁶Ashdod me jatli nyityang phei kahtalan nyoilak. Youngwanpawe inang, “Taowe otamaohepu tüolan Philistialan khongküm innenyaine tamlak.

⁷Iman-e shaaji iy nyütyang phei mei yejema-a ülao nyüonyapu hahying yehahlak. Yinne ngohpu kahtalan khongküm ü-kahtalan meitam ja ne menglak, hüyange Judah jat me nokphong ja ne menglak. Jebusitlan-e lingpu kih-e Ekron, ü-kahtalan meitam ja ne menglak.

⁸Taowe ü-kahmük yomme anglak hüyange tüopa kaiye taipu yomlak jingne nyahponglan anglak. Taowe shaaji ü-kahtalante shangne tamlak jingne shaoshi tampalante yephalak. Ü-kahtalan hangshin shaoshi yangki taowe ngeteki.”

⁹Mongmeitüoh, mongmei tüoh, O Zion yhala! Mongmeipuwe üngwüntüoh, numan Jerusalem yhalalan! Leihuyah, numan jing ahngpa numan tangte peiküki! I okkeshangpu phei hüyange teehepu phei peinang, hüpoi gado üpongha, gado üha me innyaipu phei shotyange peinang.

¹⁰Youngwanpawe inang, “Israel mepu wehok pongtong-toilan Taowe yahtei lak; hüyange Jerusalem mepu koiponglan yahlak; shapju me jonpu wenglah mengtamlak. Iye jatlan yo me chingmei linglak; Iye yengching mepu yengching ngoiye, hüyange yengyin mepu kahtoknyu üküm ngoiye wanglam lamlak.”

¹¹Youngwanpawe inang, “Numan phei Taowe jiengjep yangpu jingne hanghepa toidopu iy phei tüppetam, eawahpu kahsate phowe teiye angpu mepu, Taowe numan kahtalan lantampu phalak.

¹²Numan phowe teiye ngohyangpulan leih yetüoh; numan yinlakken nyoite leih yetüoh. Taowe numante üphong ni nyeiye phawe yelak.

¹³Taowe Judah-a wetaipa wenglah kih-e hüyange Israel-a lahhan kih-e jon. Taowe Zion kahtalan-a Greece kahtalan phei hoklak jingne yanglow kih-e jonlak.”

¹⁴Hüwante yoi kahtalan tangme Youngwanpa ngailak; Iye yoijing lahhan wangyupu kih-e keplak. Okkeshangpu Youngwanpawe nyawong wünglak; waishihwangkhah pu me heye mepu I yayonglak.

¹⁵Ütahpa Youngwanpawe yoi kahtalan yinne anglak, hüyange iman-e imanjing wepalan mahtamlak. Iman-e shapju me yujokpalan kih-e üngwünlak hüyange imanjing wepalan iy shai tamlak; tüopa-a toidopu tüknyu mepu wümjongte shokke tampu kih-e ngohlak.

¹⁶Aope tüopa nyih peingoi lakei, Youngwanpawe yoi kahtalan, nyeeyompawe yoi nyeelan wengtuh mepu yinpu kih-e yinne tamlak. Iman-e Ijing kahmük me juyük pheipu ahngpa shaoshaoh kih-e phihlange teehelak.

¹⁷Kahmük-a hangshin meiye hüyange shemei yaomawe ngohlak! Tüopa mepu ülick hei wuwüngti yo me jinlalan-a wongnange jonglak.