Read Konyak Naga MALAKHAI 2 Bible Online

MALAKHAI 2 - Konyak Naga bible

MALAKHAI 2

¹Ütahpa Youngwanpawe ngengpalante i, “Tüopa ngaokenga numan jingne:

²Numan-e hanghe ling tüowe üte yihnoonlak yang. Taowe hanghe i tüopate numan-e minjai she ima-a, hümma-a Taowe numan tangme phoiwümpu yahpeilak. Numante jamlak jingne numan-e tüopu toinan tangme Taowe phoiwümpu angtamlak. Ine ima-a, iman tangme Taowe phoiwümme lanyangki, hangjingne ima-a ü-ngaokenglan numan-e shang nyakke yeyah.

³Taowe numan jing hayimlante shaoshi yateng phalak hüyange numan-e toidopu yinmoklan ih-e numanjing shetate shitlak, hüyange numan-a mahu ih kahtangte yah teilak.

⁴Hüwante numan-e Taowe numante tüopa ngaokeng phayangki she, tüokaiye ngengpalan, Levi huhayimlan phei ü-jiengjeppu yemenglak she numan-e shinglak.

⁵“Ü-jiengjeppu me Taowe Ite üyin hüyange chingnyoi nokshaohlak jan, hüyange Taowe Ite hanghepa pha tüopa-a tüo ngohnang, tüokaiye Iye üte iyeshelak. Üshongwante Iye üte iyesheye hüyange nyamme ngohyangki.

⁶Hanghepa yeshupu tüopa yeje, hüpoi hanghepa üting tüopa Iye nyüo. Iye ü-phei chingmei me nyoi; I nying nyingke hanghepa üting tüopa shaha lingpu ne yeje, hüpoi ülaolan maapu ünu lingpu mepu laklak jingne Iye jam.

⁷Kahwangpa jeng ütingpa me nyüolak-a ngengpalan toishao ngohnang. Taowe teihpu shinge yahlak jingne kahtalan I tangte peilak yang; hangjingne ima-a I-a Ütahpa Youngwanpa jing shongshonpa ngohnang.”

⁸“Hüpoi sha-a ngengpalan-a ütingpa lam mepu lüppe teiteki. Numan-e nyüopuwe maapu yeshupu linglak woiteki. Taowe numan phei lingpu jiengjeppu numan-e mengteki, she Ütahpa Youngwanpawe inang.

⁹Tüokhei, shümme yepu me Taowe, Israel kahtalan-e numante ye-i-yeshelakne linge tamlak hangjingne ima-a numan-e ü-ngaote yejai, hüyange aope numan-e ü-kahtalante nyüoyapeih, numan-e moilante jakih-e yejon.”

¹⁰Teman khongkümpuwe üpa ja hei ngohpu ne yeje a? Teman khongkümpu Kahwang jawe linge ngaipu ne yeje a? Hümma-a hangne teman-e jawe jate teijanpu mengyange, hüyange hangne teman-e teman jing pajeiyonglan phei Kahwange jiengjep yangpute ye-i-yeshepe linglak shi?

¹¹Judah kahtalan-e Kahwang phei iman-e janpu mengteki hüyange Jerusalem me hüyange kahmük nopu me fajümlihlakpa toi lingteki. Khümjing hanghepa Youngwanpawe ken, iman-e nuweshakke tamteki. Netanlan-e shekolan aoyinne ülao Kahwangte yoppe khüm tüolan yahteki.

¹²Aoyinne tüopake lingyangki ükhong yo mepuwa Youngwanpawe yahteilak, hüyange Ütahpa Kahwangte teman jatte dopu yahpeipu me nishe aope-o Ite meitam yahne tahtam.

¹³Tüopa-a numan-e lingpu ülaopa ja. Youngwanpa jing wümjonga numan-e shappe yoongpu hüyange mangshappu mükphiye maawe tam hangjingne ima-a numan-e yahpeipu dopulan shaaji Iye yeyah.

¹⁴Tüolan-a shaaji Iye hangne yeyahpu she numan-e tong. Hatüo hangne ima-a nang shela ne ngohwante nokne mengpu nenok shekonyu phei nange janyangpu nange meng. Yha-a nenok shekonyu, hüyange yha phei nang monghahpu ngohlakei she Kahwang sheshao me janyange, nange janpu yha sheshao me nange meng.

¹⁵Kahwange nangte püm ja ne hüyange yaha ja ne linge tampu yeje a? Tüopa me Iye wongponga hanghe shi? Nange hayim tüolak hüyange tüopa-a ütingpa mepu Kahwangpa kahtalan-e menglak jingne! Tüokhei aowe-o yoi shekonyu phei janyangpu yemenglak jingne ütingpa me teihtüoh.

¹⁶Israel Kahwang Youngwanpawe inang, “Jange teipute-a (noksa yanpu) Taowe nunang.” “Numan yo me ütam jawe hüke aope yoi shekonyute yemeipe linglakei Taowe Ite nunang. Nang shekonyute monghahpu ngohlak she nange janyangpu yemenglak jingne kentingyah.”

¹⁷Numan-e Youngwanpa jeng ngaopuwe numan nyaimah teki. Hüpoi numan-e tongnang, “Toman-e I hangke towenyaine tampu?” “Ünu toi lingpalan khongkümpu meinang ja she Ütahpa Youngwanpawe teihnang; ine ima-a Iye tüolan khongkümpu lengnangja” she ipuwe. Yejema-a, “Ao ütingpa me ngohhah shepu ne ngoh tüopa Kahwang-a üpu?” she tongpuwe.