Read Konyak Naga MALAKHAI 3 Bible Online

MALAKHAI 3 - Konyak Naga bible

MALAKHAI 3

¹Ütahpa Youngwanpawe janne ye, “Ü-jingne tailam tümlakjingne Taowe ü-shongshonpa shonlak. Tüophei me numan-e yampu Youngwanpa-a mokhshe yoijing khümjing me peilak. Numan-e ngehuwe tanpu shongshonpa peilak hüyange ü-jiengjeppu pongtamlak.”

²Hüpoi aope I peilakeih, aowe tüopa nyih me nünpu oklak? Aope I peilakeih aowe üyin me ngohpu oklak? I-a wongnangpu makjao kih-e, yan juwe tampu vün kih-e ngohlak.

³Aowe khüm juwe hüyange jaowe lingyapeih tüokih-e I-a ngaophün phalak jingne peilak, yanteppawe hon hei khüm juwe lingpu kih-e, tüokih-e Youngwanpa jing shongshonpawe ngengpalan jaowe tamlak, hümme nakshih iman-e Youngwanpate khakshupu dopulan yah peilak.

⁴Hüwante Judah hei Jerusalem kahtalan-e Youngwanpate peipu dopuwa, hüke lintepu hipak me iman ngohpu kih-e Ite moimanne menglak.

⁵Ütahpa Youngwanpawe inang, “Ngaophünlak jingne Tao numan yo me ngailak, hüyange Taowe mamshe aoyinne nyinnyengpu toishao ling tüolan phei tüi-e, phwngngampalan phei tüi-e, aoyinne tahleih saki pha tüolan phei tüi-e, aoyinne nanpalante imanjing nanmeete lowelam, hüyange aoyinne wamnyulante, khah-halante hüyange kahhenglante lo ne lahnyik, aowe üte ye-i-yeshe tüolan khongkümpu phei tüi-e Taowe ngao phünlak.”

⁶“Taowa Youngwanpa, hüyange Tao yejeilei. Tüojingne, numan Jacob huhayimlan lanshe manmahtam.

⁷Numan-o numan sheshao me ngohyangpu numanjing pajeiyonglan kih-e, ü-ngaokhümlan mepu lüppe tai hüyange tüolan tükke ye-ang. Ü-tangte lüppe yekei, hüyange Tao numan yete lüppe yeküning. Hüpoi numan-e tongnang, ‘Nang tangte lüppe yelak jingne toman-e hanghe linglak?’

⁸Taowe numante tongyangki, kahta ja jingne Kahwangte nyieleihlak-a shupu a? Yejeshihpu, tüoyangpoi numan-e üte nyieleih. Penphong hüyange dopu phapu jengme numan-e hangke tongpu?

⁹Phoiwümpuwa numan khongkümpu tangme ngohnang, hangjingne ima-a jat nopuwe üte nyieleih nang.

¹⁰Numan jing penphong khongkümpu khümjingte yah peitüoh, tüome nakshih tüoken me hahying wangmanne ngohlak. Üte tokke leihtüoh hüyange numan-e ngelak hüke wangdang tawolan Taowe eplak hüyange Taowe numan tangme meipu toilam ülam lili shokke tamlak.

¹¹Taowe mok-halante numanjing deihaliha mengne yetamlak jingne tienlak, hüyange numan jing wuwüngwulan-a wuwünglickke maayange ngohlak.

¹²Hüwante jatlan mepu kahtalan liliye numante mongmei she nyiklak, hangjingne ima-a numan jing kahmük-a nyoilak jingne meimapu phei ngohlak.”

¹³Youngwanpawe inang, “Numan-e üte fajümlihlakpa ngao ngaoyangki. Hüpoi numan-e tong, ‘Nang jeng-a toman-e hang iyangpu shi?’

¹⁴Numan-e ngaowe i, ‘Kahwang shaoshanlaka jajang japu. Iye ipu linglaka hanghe wongpong yejema-a Ütahpa Youngwanpate toman-e hanghe lingyangki tüopa jingne toman mongmengpuweih she hüone ngangpuwa hanghe?

¹⁵Hüpoi sha-a teman-e helangkatwongpalan moiman she nyiknang. Ütingme ünulingpalan jalun nang, hüyange aoyinne Kahwangte shapnyik tüolan nehoi yinnang.’ ”

¹⁶Hüwante kahtalan aoyinne Youngwanpate nyammele jawe jate ngaowe i, hüyange iman-e hanghe i, tüopate Youngwanpawe jai. I shongme laitep ja me aoyinne Youngwanpate nyammele hüyange Ite iyeshe, tüolan jeng nyanne ang.

¹⁷Ütahpa Youngwanpawe i, “Iman-a ü-kahtalan ne menglak. Aope nyih Taowe toi linglakei, iman-a ü-yoijing meimei ne menglak. Aowe Ite shaoshan tüopa ha te payong jawe shüpshepu kih-e Taowe imante shüpshepu ngohlak.

¹⁸Hüwante nishe ü-kahtalan-e khakshupulan hei ümenglan nipa me hanghe yoiyoi, kahta aowe ü-shaoshan hüyange aowe shao yeshan yoi yoi ne ngaipu ngelak.”