Read Konyak Naga MATTHEU 10 Bible Online

MATTHEU 10 - Konyak Naga bible

MATTHEU 10

¹Jesuwe yoi pinlan penme ni I tangte nyik hüyange ünu yahalan janglak, hüyange daktin hei daklakpu lili meilak wong imante pha.

²Lampulan penme ni min hatüolan ngoh: üwangpa-a Simon ao te Peter she nyik, hüyange Inao Andrew; Zebedee üha Jeams, hüyange Inao John;

³Philip hei Bartholomeo; Thomas hei Mattheu kahngin shaipa; Alphaeus üha Jeams, hüyange Thaddaeus;

⁴Kana mepu Simon, hei Judas Iskariot, aowe I phünne pha.

⁵Tüolan pen-me-ni Jesuwe hatüolan wenneshaipu phei shonne tei: “Yinhulan yete taipu lamte tahtai, hüyange Samaria ching aote-o tahngoi;

⁶tüoleima-a mah ngohpu Israel nokphong nyeelan tangte taitüoh.

⁷Numan taiwante ‘Wangdang Ahngching owe peiteki,’ she nyüotüoh.

⁸Dakpalan meitam tüoh, lipulan yange yetamtüoh, ngonpalan jaowe tamtüoh, laalan jangtüoh. Numan-e ümee yephapute tüo; ümee yeyupe phatüoh.

⁹Numan ngin nyekhok me hon, khüm yejema-a nginmei numan jingne tahyah;

¹⁰Yejema-a lam jingne nyekhok, yejema-a phakshaoh ni, yejema-a yashom yejema-a shengshaoh tahyah. Hangjingne toi lingpa jawe I hahying tüolak wangnang.

¹¹Hangkihpu chingnyu yejema-a chingha te numan ngoilakei, tüome wangngoiye ao ngoh tongyah, hüyange numan yanne mantai mantai I phei ngohyah.

¹²Numan noksate ongwante ‘Toloimei ngohyah,’ she tahyah;

¹³hüyange tüopa noksa wangngoiye ngohma-a numan mepu toloimei ongne tamtüoh; hüpoi tüopa nok wangngoi-e yenangma-a, numan mepu toloimei numan tangte muh yetamtüoh.

¹⁴Ütamme numan yeyah yejema-a numan ngao yejaima-a, aope numan tüopa noksa yejema-a ching mepu tailakei numan ya mepu tüpla kongtüoh.

¹⁵Ütingpa me Taowe numante inang, ngaophün nyih me tüopa chingshao yatuhshao phei-a Sodom hei Gomorrah yatuhshaopa nün oklak ne ngohlak.”

¹⁶“Hüowü, sholan yomepu nyeekih Taowe numan shonne teinang. Tüokhei pu kih deiyah hüyange awshu kih innyaipu ngohyah.

¹⁷Kahtalan jingne kentingyah, hangjingne iman-e numan pangshanlan yakme ngaophünlak jingne phünne phakülak hüyange iman synagogue me numante shetphalak;

¹⁸hüyange numan Governorlan hei ahnglan sheshao me ü-min jingne, imante hüyange kahtoknyu te saki phalak jingne woipei phalak.

¹⁹Aope iman-e numan phünne phalakei, hangke numan-e ngaolak yejema-a numan-e hang ilak, mong tahshang; hangjingne hüwante numan-e hang ilak numante yahphalak.

²⁰Ngaopupa numan ne yeje, hüyangpoi aowe numante ngaowe tamnang numan üpa Yaha ngohnang.

²¹Ijei inaowe yoijei yoinao li ne phünne phalak, hüyange üpawe yoiha, hüyange hayimlan-e yoi nyupa phei tüi-e yonglak hüyange iman li ne tamlak.

²²Ü-min jingne kahtalan-e numante nuphalak; hüyangpoi aowe üküm ngoiye yonge ngohlakei I yinlak.

²³Aope iman-e numan ching ja me shange pongne tamlakei, japa chingte phet tüoh, hangjingne ütingpa me Taowe numan te inang, kahta üha yushao me Israel üshei yete numan yekempongpe ngohlak.

²⁴“Pin ja-a Ite konnyüopupa phei yongpu ne yeje, yejema-a rha ja-a I nokpu phei yongpu ne yeje.

²⁵Pin ja-a Ite konnyüopupa shinne ngohma-a wangpu, hüyange rha ja I tepu nokpu shinne ngohma-a wangpu. Iman-e noktepu nokpupa te Beelzebul she nyikma-a, hangshin nyeiye iman-e inok mepu lante nyiklak!”

²⁶“Tüokhei imante tahnyam hangjingne ütahte yengailak hango küppe yenang, hüyange yeshingpe anglak hango jüowe yenang.

²⁷Taowe hanghe numante wangnyak me inang wangngai me ngaiye itüoh, hüyange numan-e hanghe lowe ipu jainang, noktok me üngwün tüoh.

²⁸Aoyinne püm toipu ok hüyangpoi Yaha toine ye-ok imante tahnyam. Tüoleima aowe yaha hei püm moini molovün me meine ok tüopa Kahwang te nyamtüoh.

²⁹Poisa ja jingne awhao ni yeyao a? Tüoyangpoi tüolan ja nehoi numan üpawe yeshingpe kahtok te yeyeilak.

³⁰Numan jingne, numan shangme ngohpu shangmin nehoi iyange ngohnang.

³¹Tüokhei tahnyam, awhaolan maapu phei numan ünyei sheyongpu.”

³²“Tüokhei aoyinne kahtalan sheshao me Tao janlakei, Taowe-o wangdang me ngohpu üpa sheshao me I jingne janlak.

³³Hüyangpoi aoyinne kahta sheshao me Tao yejanlakei Taowe-o wangdang me ngohpu üpa sheshao me I yejanlak.”

³⁴“Kahtoknyu me chingmei peilak jingne Tao peipu she tahteih; chingmei peine yeje hüyangpoi yanglow ngaine Tao pei.

³⁵Hangjingne kahta jawe yoipa phei tüi-e, naoyhawe yoinyu phei tüi-e, nyemnyanyuwe yoi nyei phei tüi-e yongtam lak jingne Tao pei;

³⁶hüyange kahta ja jingne wepa ümeng ne Inoksa kahtalan menglak.”

³⁷Aowe Ü-phei shenyei she yoipa yejema-a yoinyu te kenlakei I üjingne wangpu yeje, hüyange aowe ü-phei shenyei she yoiha yejema-a yhala lante kenlakei I üjingne wangpu yeje.

³⁸Aowe yoi tangpem paiyange hüyange ü-phei te yewoi I üjingne wangpu yeje.

³⁹Aoyinne yoi üyin tüo mahlak, hüyange aowe üjingne I üyin mah hatüo tüolak.

⁴⁰“Aowe numan yahlakei Iye Tao yahnang, hüyange aowe Tao yahlakei Iye Tao aowe shon I yahnang.

⁴¹Aowe hipa ja min me peipu yahlakei Iye hipa khintak tüolak, hüyange aowe khakshupupa kahta ja min me peipu yahlakei Iye khakshupu kahta khintak tüolak.

⁴²Ütingme Taowe numan te inang, aowe hatüo üjoipa yo mepu ja te nehoi ü-pin min me yengwüng wan ja nehoi phalakei, Iye yoi khintak yemahpe tüolak.”