Read Konyak Naga MATTHEU 11 Bible Online

MATTHEU 11 - Konyak Naga bible

MATTHEU 11

¹Aope Jesuwe yoi pinlan penme ni te lamphe li jingne nyüoweleiye tümme sho; I tüopa nyoi tüohyange neikonne ngohpu chingshao yinte konnyüolak jingne tai.

²Aope baptipa John küpnok me ngohyange Khristawe lingpu toishao jeng jai, Iye yoi pin ütam shonne hüke tong.

³“Peine ngohpuwa nang heiya, yejema-a toman-e ülao ja jingne tanlak shi?”

⁴Hüwante Jesuwe imante janne i, “Taitüoh hüyange Johnte itüoh, nange hanghe jai hüyange nge;

⁵mükmüopalan-e ngepu ok, ya faipa kemme ok, ngonpalan jaowe tam, napanpalan-e jai, lipalan yangne tam hüyange shangpongpalan te pungao ümei nyüo;

⁶hüyange üjingne yening neipalan hangshin mongmeilak!”

⁷Aope tüolan kahta ye mah Jesuwe ükhong te John jingne i, “Hanghe te leine numan wanwüng jengte tai ei? Wangyange popu phümha te heiya?

⁸Hanghe te leine numan tai ei? Kahta jawe nyaishümpu inkhek inpute leine heiya? Aoyinne nyaishümpu inkhek in, iman-a ahngnok yin me hei ngohlak.

⁹Hüyangpoi hanghe te leine numan tai ei? Hipa ja te heiya? Jenang, Taowe numante hipa ja phei shenyei she inang.

¹⁰Hatüowa aojeng hüke nyan tüopa: “ ‘Hüowü taowe ü-shongshonpa nang shaome shonnang aowe nang sheshao me nang lam tümlak.’

¹¹Ütingpa me Taowe numante inang, shekowe puhpu yo me baptipa John shinne yongpu ao-o manngai; hüyangpoi wangdang ahngching me ao üjoipa ne meng I John phei sheyongpupa.

¹²Baptipa John hipak mepu sha-a te ngoiye wangdang ahngching toilangpalan phangme shange peinang, hüyange toilangpa lan-e hatüo wongme yahne ngang nang.

¹³Hangjingne hipalan üshei hüyange Mosa ngaokeng lan-e John hipak manngoi wante, ahngching jeng ngaoyangki;

¹⁴hüyange numan-e iman ngaote ütinglakpu ne mengma-a ao peilak jeng i hatüo Elijah-a John ngoh nang.

¹⁵Ao me jailak na nyim Iye jai yah.

¹⁶“Hüyangpoi tüopa jin kahtalan Taowe hanghe phei phinlak? Iman chingyang lamnyu me nahalan wonpu lenang. Aowe eihalante nyik,

¹⁷hüyange i: “ ‘Toman-e numante shengli wüng, hüyange numan poyelok; Toman-e shappe nyai, hüyange numan ukke yeyoong.’

¹⁸Hangjingne John peiwante Iye yehah hüyange yeying, hüyange kahtalan-e i, ‘Ime laa ngoh nang.’

¹⁹Kahta üha hahyinge pei, hüyange iman-e i, ‘Hüowü, hahshempa, yuyingpa, kahngin shaipalan shümpa hüyange ünupa!’ Kahwang konngao shunang she yoi toi kaiye hüonang.”

²⁰Tüophei me Iye üngan toi lingyangpu chingshaolan, iman mongyelüp okpu ngeye tee ne wang:

²¹“Khorazin, nangjingne onyukei! Bethsaida, nangjingne onyukei! Hangjingne numante lingpu üngantoi Tyre hei Sidon me lingshihma-a, iman monnye inyange hüyange tapla phoyange üshong memuh monglüp teiye ngohhah shepu.

²²Hüyangpoi Taowe numante inang, ngaophün pu nyih numan pheiya Tyre hei Sidon jingne nün-okpu she-ngohkülak.

²³Hüyange Kapernaum, nang, wang ngoiye nang onghu pu a? Nang molovün te yeitamlak. Hangjingne nangte lingyangpu üngantoi Sodom te lingshihma-a, tenyih ngoiye hatüo ngoh hah shepu.

²⁴Hüyangpoi Taowe nangte inang ngaophünpu nyih me nang pheiya Sodom kahtok mepulan shesha meishe ngohlak.”

²⁵Tüo hipak me Jesuwe ngaiye i, “Taowe nangte minyong nang, Opa, wangdang hei kahtok Youngwanpa, kon-nangpalan hei shinge okpalan mepu tüolan toishao nange lowe ang hüyange naotak halante ngaiyetam;

²⁶Eihyang, Opa, hangjingne hatüokih nange mongpu ngoh.

²⁷“Üpawe üte toi üshei phünne phayangki; Ipa kaiye aowe-o I ha yeshing, hüyange I ha hüyange aote I hawe I ütahte ngaiye tamlak jingne mongnang iman kaiye, Ipa aowe-o yeshing.

²⁸“Numan topalan hüyange hangki yih kipalan, üshei ü-tangte peikei, hüyange Taowe numan toloi meitam phaning.

²⁹Numan me ü-peitüp paiyah hüyange ü-mepu shingyah, hangjingne Tao kentingmongta puphei, hüyange mongjang innyaipu phei, hüyange numan-e numan yaha jingne toloimei tüolak;

³⁰hangjingne ü-peitüp oloh-e, hüyange ü-hangki tanwa akke.”