Read Konyak Naga MATTHEU 12 Bible Online

MATTHEU 12 - Konyak Naga bible

MATTHEU 12

¹Tüo hipak me Jesuwe Sabbath me kah linne tai. Hüwante I pinlan seanyao hüyange tahlick yitte hahne wang.

²Aope Phariseelan-e tüopa nge, iman-e Ite i, “Leihuyah! Nang pinlan-e Sabbath ngaokeng mengnangki,”

³Iye imante i, “David hüyange I kahtalan aope iman seanyao Iye hanghe ling numan-e iye yelei a?

⁴Kahwang nokte I ong hüyange Kahwang te phapu an iman-e hah, hanghepa I yejema-a I kahtalan jingne ngaokeng me shupu yeje, hüyangpoi hatüo ngengpalan jing.

⁵Khümjing me ngohpu ngengpalan-e Sabbath meng tüoyangpoi iman ümeng yenang she numan-e Mosa ngaokeng laime ye i a?

⁶Taowe numante inang khümjing phei sheyongpu ülam ja tüome ngohnang.

⁷Hatüo hanghe te lep numan-e shingma-a, Taowe phünne toidopu yeje shüpshe lengnang! Numan-e ümeng yenangpu kahta te ümeng yepha hah shepu.

⁸Hangjingne Kahta Üha Sabbath tepu nokpu ngohnang.”

⁹Hüyange tüomepu I tai hüyange synagogue te ong.

¹⁰Tüome yakshok tephei kahta ja ngoh, hüyange iman-e I ümeng pholak jingne, Jesu te tong, “Sabbath me meitamlaka Ngaokhüm me shupu a?”

¹¹Iye imante i, “Leppu ja me numan yo me jawe nyeeha ja ngoh, hatüo Sabbath me jomte yei. Hatüo Iye jonyange shuwe yengailak a?

¹²Hüma-a nyeeha ja phei kahta ja hangshin sheyongpu! Tüokhei Sabbath me toimei linglak shunang.”

¹³Tüophei me Iye kahta te i, “Nang yak notüoh.” Iye no, hüyange hatüo mei hüyange ülaopakih khongkümpu mei.

¹⁴Hüyangpoi Phariseelan nokshao te yu hüyange hangke I menge tamlak, I phei tüi-e iman-e taisho.

¹⁵Tüopa shingyange Jesu tüomepu tai. Kahta maawe I pheite woi, hüyange Iye iman üshei meitam.

¹⁶I jeng aohi te-o shingne yetamlak jingne Iye imante ngaopha.

¹⁷Hatüowa Isaia hipa kaiye nyüoyangpu ütahte ngailak jingne:

¹⁸“Hüowü, ü-shaoshanpa ao Taowe le, ü-mongkenpa, ao me ü-yaha monghah nang. Taowe ü-yaha I tangme anglak, hüyange jatlan tangte Iye ngao phünpu pongtam lak;

¹⁹Iye yeteelak yejema-a yewünlak, yejema-a chingyang me I ngaowüng aowe-o yejailak.

²⁰Iye ngaotingpa-a okpu me yah manpei manpei khuh tawe ngohpu hong ja nehoi Iye yephaklak, hüyange vünkhuh ngaipu vüntük Iye yemeilak.

²¹Hüyange I min me jatlan-e mongmeilak.”

²²Tüophei me mükmüo hüyange ngao ye-i-okpu laa ngohpu ngao-ükpa ja I tangte woipei, hüyange Iye I meiyetam, hüwante ngao-ükpa kahtawe ngaowe ok hüyange nge ok.

²³Ükhong üsheiye yashan hüyange i. “Hatüo kahta David üha a?”

²⁴Hüyangpoi aope Phariseelan-e jai, iman-e i, “Hatüo kahtawe laalan janglak jingne, ülao yeje laa ahngpa Beelzebul jonnang.”

²⁵Iman juteih shinge Iye imante i, “Hanghe ahngching yoi nying nyingke teitam yange teih oklakei jin yelaolak, hüyange hanghe chingnyu yejema-a noksa yoi nying nyingke tampu ngailakei yonge yengohlak.

²⁶Satan-e satan jange teima-a, Iye yoi nying nyingke tamyangki; hüma-a I ahngching hangke yonge ngohlak?

²⁷Hüyange Taowe laalan janglak jingne Beelzebul jonma-a numan hayimlan-e ao jonyange jang nangki? Tüokhei iman-a numan ngaophünpalan-e menglak.

²⁸Hüyangpoi Taowe Kahwang yahawe laalan jangküma-a, hüma-a Kahwang ahngching numan tangte peiteki.

²⁹Kahta jawe üwangne wongnangpu kahta phowe yeshapute, hangke inok te peipu ok; hüyange I toinan nyieyahpu oklak? Phowe shayang pheime nakshih Iye inok nyieyahpu oklak.

³⁰Ao ü-phei yengoh I ü-phei tüi-e ngohnang, hüyange aowe ü-phei jamme yejem Iye shai tamnang.

³¹Tüokhei Taowe numante inang, ünu hüyange phoiwümpu üshei kahtalan te winlak, hüyangpoi Yaha phei tüi-e phoiwümpu yewinlak.

³²Aoyinne kahta üha phei tüi-e ngaoyangki ünu winpu oklak; hüyangpoi aoyinne Yaha Üjao phei tüi-e ngaoyangki imante hatüo jin me jeyah yejema-a ngoikülak jin me jeyah ümeng yewinlak.”

³³“Ülick ümei ngailak jingne pee ümei ne menglak, üpüm yemeima-a ülick-o yemei. Hangjingne peeja-a I ülick kaiye shingnang.

³⁴Numan pu hayim, numan yemeipe ngohyange, hangke ümei ngaowe oklak shi? Hangjingne mongsa me hanghe maawe ngai, juwe tüo ngaonang.

³⁵Kahta ümeiye yoi moth ümei angpu nok mepu toimei ngainang, hüyange kahta ümenge yoi moth ümeng angpu nok mepu toimeng ngainang.

³⁶Taowe numante inang, ngaophünpu nyih kahtalan-e iman-e ngaoyangpu ngaomeng lili tüolak.

³⁷Hangjingne nang ngaowe nang shuwe linglak, hüyange nang ngaowe nang yeitamlak.”

³⁸Hüwante ngaokeng nyüopalan hüyange Phariseelan-e Ite i, “Konnyüopa, toman-e nang mepu kahnyingwüngha füo ja ngehu nangki.”

³⁹Hüpoi Iye imante janne i, “Ünupa hüyange üting yenangpu jinne kahnyingwüngha füo yamnang, hüpoi Jona hipa füo tokte kaiye ülao füo hango yephalak.

⁴⁰Hangjingne Jona yengching hoyong sea me nyihlüm hüyange phalüm ngoh, kahta üha-o nyihlüm hüyange phalüm kahtok ümongme ngohlak.

⁴¹Ngaophün nyih me Nineveh kahtalan tüopa jin kahtalan phei yonglak hüyange tüolan yeitamlak, hangjingne Nineveh lan-e Jona konnyüopu me monglüp hüyange hüowü, Jona phei ünyei yongpu ülam ja tüome ngohnang.

⁴²Ngaophün nyih me heye mepu Ahngyha yonglak hüyange numan yeitamlak, hangjingne Solomon konngao jailak jingne kahtoknyu ükao ja lam khongkümpu te kemme yha peiyangki; hüyange Solomon phei ünyei yongpu ülam ja tüome ngohnang.”

⁴³“Aope kahta ja mepu ünu yaha yanne tailakei, toloimei jing yamme yeng yenangpu kahtang te waakem nang hüyange hatüo yetüo.

⁴⁴Hüwante Iye inang, ‘Ü-nok ümeken mepu tao ngai tüo tangte yelakei.’ Hüyange aope I leihye hatüo ükeng me, mak moiyange, hüyange üyin shinne tümyange Iye nge.

⁴⁵Hüwante I tainang hüyange I phei shemengpu ünu yaha nyit ngoiye I phei woi peinang, hüyange iman tüote ongnang hüyange tüome ngohnang; hüyange tüopa kahta yafün üwangpa phei ükümpa yafün shemeng nang. Tüokhei tüopa ünu jin phei-o hatüokih ngohlak.”

⁴⁶Aope I ükhong phei yelakpe ngaowe ngoh, Inyu hei Inaolan I phei ngaohuwe yamme nokshao me ngoh.

⁴⁷Ütam-e Ite i, “Leihuyah, nangnyu hei nang naolan nangphei ngaohuwe yamme nokshao me yong ngohnang.”

⁴⁸Aowe Ite ngao tüopa kahtate Iye hüke janne ye, “Ünyu ao shi? hüyange ünaolan-a aoyin shi?”

⁴⁹Hüyange Iye yoi pinlan yekaote yak nowe hong hüyange i, “Ünyu hüyange naolan hatüo me!

⁵⁰Hangjingne aoyinne wangdang me ngohpu üpawe mongpu linglakei Iya ünaolipa, ünaolinyu, hüyange ünyu.”