Read Konyak Naga MATTHEU 13 Bible Online

MATTHEU 13 - Konyak Naga bible

MATTHEU 13

¹Tüonyih muh nok mepu Jesu yanne tai hüyange yengching nah me shot;

²hüyange ükhong üyong I tangte jem, tüokhei lisheng ja te ong hüyange tüome shot. Ükhong üshei yengnah yeme yong.

³Hüyange Iye ngaoleppu me maawe hüke i, “Ülideipa ja üli deine tai,

⁴Iye deiwante, üli ütam lamko te yei, hüyange awhalan pei hüyange toon küm.

⁵Üli ütam kahtok üyao üjingha ngohpu longpieng tangte yei, hüyange mamshe phao hangjingne hatüome kahyao luwe yenangpuwe tüopa mamshe phaowe ngai.

⁶Hüpoi aope wanghe hee yeonge sheam hüyange tüopa me üya luwe yenangpuwe hatüo mamshe kui mah.

⁷Üli ütam huhphüm yo te yei; hüyange huh-hüng jonge ngai iman shümme toi.

⁸Üli ütam kahtok ümei me yei hüyange gho ngoiye dewok ngoiye hüyange delüm ngoiye ülick maawe lick.

⁹Aome na nyim, Iye jaiyah.”

¹⁰Tüophei me pinlan pei hüyange Ite i, “Nange iman phei hangne ngaolep puphei ngao nangki?”

¹¹Iye janne i, “Wangdang ahngching me hanghe lowe ngoh tüopa shinglak jingne numante phayangki, hüyangpoi imante tüopa manpha.

¹²Hangjingne aome ngohnang, Ite ünyei phalak, hüyange I me wangmanne ngohlak; hüyangpoi aome üjingha nehoi yenang, I me hanghe ngoh tüo nehoi yahteilak.

¹³Tüokhei Taowe imante ngaolep pume ngaonang, hangjingne iman-e nge-o ye ngepute leinang hüyange jai-o yejai shingo yeshingpute jainang.

¹⁴Iman jingne Isaia hi-ngao ütahte ngainang: “Numan-e jaipupa-a jailak, hüyangpoi mongte ye-onglak; numan-e ngepupa-a ngelak, hüyangpoi yeshinglak;

¹⁵hangjingne tüolan kahta mong pomme meng; hüyange iman na jeiteki; hüyange iman-e iman mük ngoihteki. Yejeshih ma-a, iman mük phei ngehah shepu iman na phei jai hahshepu, hüyange iman mongjang phei üpong tüohah shepu, hüyange ü-tangte lüphah shepu, hüyange taowe iman meitamlak.”

¹⁶Hüyangpoi numan mük moimanpupa, hangjingne numan mükke ngenang, hüyange numan na moimanpupa hangjingne iman-e jainang.

¹⁷Ütingpa me Taowe numante inang, hipalan maawe hüyange üjao kahtalan maawe, numan-e ngepulan ngehuwe mongngai, hüyangpoi iman-e tüopa ye-nge, hüyange numan-e hanghe jai tüopa jaihu, hüyangpoi iman-e tüopa yejai.

¹⁸“Hüma-a, üli deipa me ngaoleppu numan-e jaiyah.

¹⁹Aope kahta ütam-e wangdang ahngching ngaolan jai hüyange tüopa yeshing, hüwante ümengpa peinang hüyange mongjang me hanghe dei tüopa nyieye yahtai nang. Hanghe üli lamko me dei hatüowa I.

²⁰Aoyinne wangdang ahngching ngaolan jai hüyange mamshe mongmeiye yah, tüolan-a longpieng tangme deipu üli she hüonang.

²¹Ime üya yuwe yenang hüyangpoi hipak ütenja pu jingne ngoh, hüyange aope pungao ümei jingne shaoshipu yejema-a shange tampu pei, mamshe I lakke mahnang.

²²Hanghepa üli huh-hüng yo me dei, hatüowe aowe ngaowa jai, hüyangpoi kahtoknyu üyin lengpu, hüyange kahtoknyu moth te kenpu kaiye ngaowa mahne tam, hüyange hatüowe ülick yelickpu lepnang.

²³Aowe pungao ümei jai hüyange hatüo jeng shing, tüopa-a kahtok ümei me deipu üli. Hatüowa I aowe ülick gho ngoiye, dewok ngoiye, hüyange delüm ngoiye lickke tam.”

²⁴Iye imante ülao ngaolep ja hüke i, “Wangdang Ahngchinga kahta jawe I kahme üli ümei deipu lenang;

²⁵hüyangpoi aope kahta lili shimah, I wepa pei hüyange tah yo me yantihüng dei hüyange taimah.

²⁶Aope üphao jong hüyange ülick ling, yantihüng-o ngai.

²⁷Nokpu shaoshanpalan pei hüyange Ite i, ‘Üyongpa, nenok kahme nange deipu üli ümei yeje a? Yantihüng ümeken mepu ngaipu shi?’

²⁸Iye imante i, ‘Wepa jawe hatüo ling.’ Shaoshanpalan-e Ite i, ‘Hümma-a toman taiye hatüo bheiye yotamhuya?’

²⁹Hüpoi Iye i, ‘Tah, hangjingne numan-e yantihüng bheiwante tah-o omme bhei ngohlak yang.

³⁰Tah manyah manyah moini jamshe jongne tamtüoh, hangjingne tahyah wante tah yahpalan te Taowe ilak, üwangne yantihüng yahtüoh, hüyange vünme jaklak jingne ütüp-ütüp shatüoh, hüyangpoi tahmei lan-a tenok bung te peikei.’ ”

³¹Iye ülao ngaoleppu ja imante hüke i, “Wangdang Ahngching yanhoi li ja lenang, hanghe kahta jawe yah hüyange inok kahte dei.

³²Hatüo ülao üli üshei yo me sheshoipupa, hüyangpoi aope hatüo jong ülao deili phei i shejong nang hüyange pee ne mengnang, tüone menge wangdang awhalan peinang hüyange üquilan me ülüp lingnang.”

³³Iye imante ülao ngaoleppu ja i, “Wangdang ahngching do lenang; ao shekowe yah hüyange anhüng shengtak lüm phei nyütyange an ne bunge manngai manngai angnang.”

³⁴Jesuwe ükhong te tüolan khongkümpu ngaoleppu me ngao yangki; ngaoleppu ye-ompe Iye imante hango yengao.

³⁵Hipa kaiye ngaoyangpu ütahte ngailak jingne hatüo ngai: “Ngaolep pume taowe ü ju eplak, kahtamyenghan memuh jüowe angpu ngao taowe wünne ilak.”

³⁶Tüophei me Jesuwe ükhong tüohyange noksa te ong; hüyange I pinlan I tangte pei, hüyange i, “Tomante kah mepu yantihüng te leppu khoih ipha.”

³⁷Iye jan, “Aowe üli ümei dei, tüowa Kahta Üha,

³⁸Kahte leppuwa kahtoknyu. Üli ümeiya Ahngching halan; yantihünga ümeng halan ngohnang.

³⁹Wepa aowe dei hatüowa kahshih; tah yahpuwa jin üküm; tah yahpalan-a wangdang shongmokpalan.

⁴⁰Yantihüng shai jem hüyange vün me jakpu kih, jin üküm nyih me ngohlak.

⁴¹Kahta Ühawe yoi shongmokpalan shonlak, hüyange iman-e yoi ahngching me yashah hüone tampalan hüyange ngaokeng kaiye toilingpalan üshei shai jemlak.

⁴²Hüyange iman-e tüolan kahta yemahpu loonge ngohpu vün me shüplak; tüome shappu hei fa ngaopu ngohlak.

⁴³Hüwante khakshupalan-e iman üpa Ahngching me wanghe ke teelak. Ao me na nyim, Iye jaiyah.”

⁴⁴“Wangdang Ahngching kah me ngin jüowe angpu lenang; hanghepa kahta jawe tüo hüyange Iye nishe jüowe tüoh. I mongmei me ye, I me nangpu khongküm yao hüyange tüopa kah shak.”

⁴⁵“Üne-o, wangdang ahngching pheeinyu leihpawe yeonge meipu yüknyu yampu lenang.

⁴⁶Ye-onge shangpu yüknyu ja Iye tüoyange I tai, Ime nangpu khongküm yao hüyange tüopa shak.”

⁴⁷“Üne-o wangdang Ahngching shaantünpu lenang, hanghe shaan yengching te shüp hüyange nyah ülam lili om.

⁴⁸Aope tüopa maa iman-e yengnah yete shuwe yenang, hüyange shotnang hüyange ümeilan tükja me leye ang, hüyangpoi ümenglanna win.

⁴⁹Tüokih-e tüopa jin üküm nyih me ngohlak. Wangdang shongmokpalan yulak hüyange üjaolan mepu ümenglan yantamlak;

⁵⁰hüyange iman loonge ngohpu vünme shüplak; tüome shappu hüyange fa ngaopu ngohlak.”

⁵¹“Numan-e tüolan khongkümpu shingman?” Iman-e Ite i, “Shingteki.”

⁵²Iye imante i, “Tüokhei ngaokeng nyüopalan aoyin wangdang ahngching pinne meng, yoi angpu mepu üla hei ülang yah ngaipu nok nokpu ja lenang.”

⁵³Aope Jesuwe ngaolep iye sho Iye tüopa nyoi tüoh.

⁵⁴I yoi nyupuh chingshao te pei hüyange imante synagogue me nyüo, tüokhei iman yashan hüyange i, “Iye tüolan konngao hüyange tüolan üngantoi ümeken mepu tüoyapu?

⁵⁵Pee aijonpa üha I yejepu a? Inyu te Mary, hüyange Inaolan Jeams, Joseph, Simon, hüyange Judas yeje pu a?

⁵⁶Hüyange Inao shekolan khongküm teman phei ngohpu yeje a? Hüma-a Iye tüolan toishao üshei ü-mepu tüo?”

⁵⁷Iman-e Ite üting yelak. Tüokhei Jesuwe imante i, “Hipa ja yoi chingshao hüyange yoi noksa kahtalan tokte kaiye ükenphe me yihluwe yah.”

⁵⁸Iman ütingyelakpu ngeye tüoyeme Iye üngantoi meiyange yeling.