Read Konyak Naga MATTHEU 14 Bible Online

MATTHEU 14 - Konyak Naga bible

MATTHEU 14

¹Tüopa nyih hei hipak me Herod Tetrarch-e Jesu jeng ipu jai,

²hüyange I shaoshanpa lante i, “Hatüowa baptipa John; I lipu mepu yange yenang, tüokhei üngan toi üyong Iye lingnang.”

³Hangjingne Inao Philip sheko, Herodia jeng me Herodte John pho, Ite sha hüyange I küpnok me ang;

⁴hangjingne John ne Ite hüke i, “Nange yha yahlak yeshu.”

⁵Herod-e I toihuwe teih hüyangpoi ükhongte nyam, hangjingne iman-e I hipa ja she shing.

⁶Hüpoi Herod puhpu nyih mo me Herodia üha sheko nahawe yinpalan sheshao me polok hüyange Herod mongmei ne tam;

⁷tüokhei yhawe hangheyin yulakei phalak she Iye jiengpu pha.

⁸Inyuwe hengpuwe yhawe hüke i, “Hatüo me üte shengja me Baptipa John shang heyange yahkei.”

⁹Ahngpa mongmeng, hüyangpoi Iye jiengyangpu jingne hüyange Iphei jamme khaome shotyange ngohpu yinpalan phei yewüolak jingne tüopa phalak jingne Iye ngaopha.

¹⁰Iye shon hüyange küpnok me John shangphün.

¹¹I shang shengja me yüo hüyange sheko nahate pha, hüyange yhawe tüopa Inyu tangte yahpei.

¹²I pinlan pei hüyange mang yahtai, hüyange iman-e I mu; tüophei me iman ye hüyange tüopa jeng Jesute i.

¹³Aope Jesuwe tüopa ngaolan jai, tüopa nyoi tüohyange lisheng ja te ong hüyange wanwüng jeng yamme I shaha tai. Ükhonge tüopa jai hüyange ching mepu yalam me iman I phei te woi.

¹⁴I yengnah te ngaiwante ükhong üngang Iye nge, hüyange iman ngeye I yeonge yayenge lei hüyange Iye iman dakpu meiye tam.

¹⁵Aope ün ngoi pinlan I tangte pei hüyange i, “Hatüowa wanwüng jeng, hüyange wanghe shaaji nyüpteki, chingshao yinte taiye hüyange yoi yoi jingne hahying min shak yahne, ükhong yanne tamtüoh.”

¹⁶Jesuwe imante i, “Iman tailak wongpong yenang. Numan-e imante hahlak ütam phatüoh.”

¹⁷Iman-e Ite i, “Toman me hango yenang hüpoi ankhüo nga hüyange nyah ni shaha ngohnang.”

¹⁸Iye i, “Tüolan ü-tangte tüome yahpeikei.”

¹⁹Iye ükhongte hüng tangme shotlak jingne ngao pha. Tüophei me Iye ankhüo nga hüyange nyah ni jon, wangdang yete lei hüyange Kahwangte minyong pha; hüyange aope Iye an paikhoih pinlante Iye pha, hüyange pinlan-e ükhongte pha.

²⁰Iman manmoh manmoh hah; hüyange topu ükhoih ünyai iman-e shaijem-e yowante, muhto penme ni maawe ngoh.

²¹Hahpalan, sheko hei nahalan ye ipe kahta haja nga nanjing ngoh.

²²Tüophei me Iye ükhong yanne teine tamwante, pinlan lisheng ja me ongyange yengjan yete I sheshao me tailak jingne henge tei.

²³Kahtalan teine tam hüyange I shaha kahtang yete yoplak jingne ong. Aope ün ngoi I shaha tüome ngoh.

²⁴Shaaji yengnah mepu nangjange taiteiye, lishenga yengmokh-e yeonge lüppe shüp, hangjingne sheshao yemepu wangyang pei.

²⁵Napning awka jume I pinlan tangte yengme kemme pei.

²⁶Aope pinlan-e I yengching tangme kemme nge, iman nyam hüyange hüke i, “Hatüowa mieng;” hüyange nyampu kaiye iman-e üngwün.

²⁷Tüoyangpoi Jesuwe imante hüke i, “Wongnang yah! Tao üja, Tahnyam.”

²⁸Peterwe Ite jan, “Youngwanpa, hatüo ütingme nangne mengma-a, nang tangte yengme kemme wenlak üte ngao phakei.”

²⁹Iye i, “Wenkei.” Lisheng mepu Peter yu, yengme kem hüyange Jesu tangte wen.

³⁰Hüpoi wangyang ngeye I nyam, hüyange I yengmong te hümne she ngohwante Iye üngwünne i, “Youngwanpa, tao yinpha.”

³¹Mamshe Jesuwe I yak nowe Ite jon hüyange i, “Nangme hangne ütinglakpu üjingha ngohpu! Hangne nang mong apu?”

³²Aope imni lisheng te ong wangyang lak.

³³Aoyin lisheng me ngoh Ite ümme khüm, hüyange i, “Ütingme nang Kahwang üha.”

³⁴Aope iman yengjan ngoi Gennesaret me ngai.

³⁵Tüome ngohpu kahta lan-e I shing hüyange tüopa kahmük chingyo yupi üshei yete ngaolan shontei, hüyange iman-e I tangte dakpalan üshei yahpei,

³⁶hüyange I nyejeng te nehoi jonlak jingne iman-e tonge i. Aoyinne jon iman üshei meitam.