Read Konyak Naga MATTHEU 15 Bible Online

MATTHEU 15 - Konyak Naga bible

MATTHEU 15

¹Hüwante Phariseelan hei ngaokeng nyanpalan ütam Jerusalem mepu Jesu tangte peiye i,

²“Hangne nang pinlan-e pajeiyong lan-e itte shempu ngaokeng kaipu shi? Hangjingne iman-e hahne iwante yak yetuh!”

³Iye imante janne i, “Hangne numan-o numan-e itpu jonne she iwante Kahwang ngaokeng kaipu shi?

⁴Hangjingne Kahwange hüke i, ‘Nangpa hei nangnyute iyesheyah,’ hüyange, ‘Aowe yoipa yejema-a yoinyu te phoiwüm lakei ütingme li ne tamlak.’

⁵Hüyangpoi numan-e inang, ‘Kahta jawe Ipa hei Inyute jamme oklak jingne jonlak ütam ngoh, hüyangpoi hatüo Kahwang jing she ima-a,

⁶Iye Ipa te wangshüm hüolak wongpong ne yeje.’ Hatüo kih-e numan-e yoi ngao jonne iwante Kahwang ye-i-yeshe.”

⁷Jutok meipalan, numan jingne Isaia hi-ngao yeonge meiye inang;

⁸“Hatüo kahtalan-e üte iman juwe yihlu, hüyangpoi iman mongjang ü-mepu yanne ngohnang.

⁹Jajang jawe iman-e üte yop, Kahwang lamjong leye iman-e kahtawe lingpu lamjong nyüo!”

¹⁰Hüyange Iye ükhong I sheshao me nyik hüyange imante i, “Jaiyah, hüyange shingyah!

¹¹Kahta ja ju kaiye hanghe ongnang hatüowe kahta nupu ne yeje; hüyangpoi, hanghepa ju mepu ngainang tüowe nutam nang.”

¹²Hüwante pinlan pei hüyange Ite i, “Nange hanghe ngao tüowe phariseelan te shahyange iman mongmengpu nange shingya?”

¹³Iye jan, “Hanghepa deiha liha wangdang mepu üpawe yedei, bheiwinlak.

¹⁴Iman shaha angtamtüoh iman mükmüopu kahta woipu mükmüopa woipalan. Mükmüopa kahta jawe eiha ja woima-a, moini kahsa te yetlak.”

¹⁵Peterwe Ite janne i, “Tomante ngaoleppu khoih itehu.”

¹⁶Iye i, “Numan-o sha-a ngoiye manshing okpu a?

¹⁷Hanghepa ju me ong seanyu te ta nang hüyange jeamtai wante tainang she numan-e yeshing a?

¹⁸Hüyangpoi hanghepa ju me ngai hatüo mongsa mepu, hüyange tüowe kahta ja nuwe tamnang.

¹⁹Hangjingne mongjang mepu kon ümeng, toilak, phwngpu, phwngekempu, kuhpu, ngaoleih saki, hüyange eiha jing ünyei yah hupu ngainang.

²⁰Tüolan toiye kahta ja nuwe tamnang, hüyangpoi yak yetuhpe hahpu kaiye kahta ja nuwe yetam.”

²¹Jesuwe tüopa nyoi tüohyange Tyre hei Sidon kahtok yete tai.

²²Tüoye mepu peipu Kananlan sheko jawe hüke üngwün, “Üyongpa, David üha, üte shüpshe pha. Üha sheko naha laa omyange yeonge shaoshi nang.”

²³Hüyangpoi Iye yhate ngao ja nehoi yejan. I pinlan pei hüyange yha yene tamyangkei, hangjingne “Yha teman phei me üngwünne woikei ki” she Ite tonge i.

²⁴Iye jan, “Israel nok mahpu nyee jingne hei Tao shon.”

²⁵Hüwante yha kemme pei hüyange I sheshao me khümme lamyange i, “Üyongpa, üte jempha.”

²⁶Iye jan, “Nahalan nük yahpuwe kuihalante shüplak yemei.”

²⁷Yhawe jan, “Üting, Üyongpa; hüyangpoi kuihalane-o iman nokpuwe khao me hahyange yeipu nükkek hahnang.”

²⁸Hüwante Jesuwe yhate jan, “Sheko, nang ütinglakpu yong nangki! Nange hangke leng, hatüo nangjingne lingpha lak.” Hüyange tüopa hipak memuh yha sheko naha mei.

²⁹Jesuwe tüopa nyoi tüohyange Galilee yengching paowe tai hüyange I kahtangja te ong hüyange tüome shot.

³⁰Ükhong üyong yafaipa, yakshokpa, mükmüopa, ngao ükpa hüyange ülao kahta maawe I tangte pei; hüyange I yashong me moilan angetam, hüyange Iye iman meitam;

³¹tüokhei ükhong üshei aope ngao ükpalan-e ngaopu, yakshokpa meipu, yafaipa kempu, hüyange mükmüopalan-e ngepu nge yashan, hüyange iman-e Israel Kahwangte yihlupu pha.

³²Tüophei me Jesuwe yoi pinlan I tangte nyik hüyange i: “Tüopa ükhong jingne Tao yeonge yayeng teihnangki, hangjingne iman ü-phei nyihlüm ngoiye ngohtepu hüyange hahlak hango yenang. Taowe iman seanyaowe teine yetamhu, yejema-a iman lamme seanyaowe nyailak.”

³³Pinlan-e Ite i, “Teshin yongpu ükhong moh uhlak jingne hükihpu wanwüng jengme, ü-mepu an wange tüolak?”

³⁴Jesuwe imante i, “Numan me an hangshin ngohnangki?” Iman-e jan, “Ankhüo nyit hüyange nyah ükhoih üjingha.”

³⁵Kahtok me shotlak jingne Iye ükhong te ngaopha.

³⁶Iye ankhüo nyit hüyange nyah jon. Tüophei me Iye minyong pha, tüolan khoihtam hüyange tüolan pinlante pha, hüyange pinlan-e ükhongte pha.

³⁷Iman manmoh manmoh iman-e hah; hüyange shaipu ükhoih ünyai iman-e muhto üyong nyit a maawe shaijem.

³⁸Aoyinne hahya peih sheko hei nahalan ye-i-pe kahta haja peli ngoh.

³⁹Tüophei me Iye ükhong yanne tam, lisheng ja me ong hüyange Magadan yikeng yete tai.