Read Konyak Naga MATTHEU 16 Bible Online

MATTHEU 16 - Konyak Naga bible

MATTHEU 16

¹Pharisee hüyange Sadduceelan Jesu tangte pei ngoi, hüyange Ite toklak jingne wangdang mepu kahnyingwüngha ja imante hüopha she Ite tong.

²Iye imante janne i, “Aope ün ngoi numan-e inang, wangmeilak yang, hangjingne wang taakke ngoh,

³hüyange napning numan-e inang, tenyih wang menglak yang, hangjingne wang taakke hüyange wangphom nyeihnang. Numan-e wangyete leiyange wangmeng wangmeilak ipu oknang; hüyangpoi numan-e füo jingne lüppu ye-ok a?

⁴Ümenglan hüyange üting yelakpu jinne kahnyingwüngha füo jingne yamnang, hüyangpoi Jona hipa füo tokte kaiye füo hango yehüolak.” Iman tüohyange I tai.

⁵Pinlan jaye yengjan te tai hüyangpoi iman an peyange wen.

⁶Jesuwe imante i, “Pharisee hei Sadduceelan do jingne yeonge kentinge leiyah.”

⁷Iman-e iman yo me teingaowe i, “Teman-e an yeyahpu yang.”

⁸Jesuwe tüopa shing hüyange i, “Üjingha ütinglak palan! Numan me an yenangpu üko jeng hangne numan pa me tei ngaopu shi?

⁹Numan-e sha-a ngoiye yeshing okpu a? Hüyange ankhüo nga numan-e haja nga te tamme pha, hüyange muhto hangshin numan-e shaijem numan-e yeteihtüopu a?

¹⁰Hüyange ankhüo nyit haja pelite tamme pha, hüyange muhto üyong hangshin numan-e shaijem?

¹¹Taowe numante an jeng ye-i-she numan-e hangke yeshing? Pharisee hei Sadduceelan do jingne kenting yah.”

¹²Hüwante an jingne do jonpu jeng ye i, hüyangpoi Pharisee hei Sadduceelan ne nyüopu me kenting yah she ipu iman-e shinge pei.

¹³Aope Jesu Kaisarea Philippi kahtok ngoi Iye yoi pinlan te tong, “Kahtalan-e Kahta Üha ao she inangki?”

¹⁴Iman-e jan, “Ütam-e inang, Baptipa John, ülao lanne inang, Elijah, hüyange ülao lanne inang, Jeremia yejema-a hipalan yo me ja she inang.”

¹⁵Iye imante i, “Hüyangpoi numan-e Tao ao she inangki?”

¹⁶Simon Peterwe janne i, “Nang üyin Kahwang üha, Messiah.”

¹⁷Jesuwe janne i, Jona üha Simon, nang moimanpupa: hangjingne iy hei meiye hatüo nangte manhüo, hüyangpoi wangdang me ngohpu üpawe hüo,

¹⁸Tüokhei Taowe nangte inang, Nanga Peter, hüyange tüopa longnyu tangme Taowe Ü-Bumeinok linglak, hüyange lipu taten ünganwonge hatüo ye-oklak.

¹⁹Wangdang ahngching pejong yüpmee Taowe nangte phalak, hüyange hanghe kahtoknyu me shalakei hatüo wangdang me-o shalak hüyange nange hanghe kahtoknyu me lanlakei hatüo wangdang me-o lanlak.

²⁰Tüophei me ao te-o I-a Khrista (Messiah) she tahngai she yoi pinlante mong ngao i.

²¹Hatüo hipak me peiye Jesuwe yoi pinlante I Jerusalemte tailak, hüyange jeiyonglan, ngengpa üjenglan hüyange ngaokeng nyanpalan mepu, litamlak jingne yeonge shangne tamlak, hüyange nyihlüm shepu nyih me yange yelak jeng hüone wang.

²²Peterwe jayete woitei hüyange Ite teeye ngaowe wang: “Youngwanpa, Kahwange hatüo tiennang; hatüo nang me yengailak.”

²³I lüppe ye hüyange Peterte i, “Ü-tokphei te yetepha, Satan. Nang üjingne tienpu ja, hangjingne nange Kahwange teihpu yeje, hüyangpoi kahta teihpu teihnang.”

²⁴Tüophei me Jesuwe I pinlante i, “Kahta ütam-e ü-phei te woihuma-a, Iye yoi nying nyingke tükyah, hüyange yoi tangpem paiyange ü-pheite woikei.

²⁵Hangjingne aowe yoi üyin yinne nganglakei I mahlak, hüyangpoi aowe üjingne I üyin mahlakei hatüo tüolak.

²⁶Hangjingne kahtawe kahtoknyu üshei tüowe okyange hüyange yoi üyin mahküma-a Iye hanghe küw tüolak? Yejema-a yoi üyin nanleiye kahtawe ümee ne hanghe phalak?

²⁷Hangjingne Kahta Üha yoipa müktishiwa me wangdang shongmokpalan phei peilak, hüyange kahta lilite Iye lingyangpu me tokyange hünghao Iye phakülak.

²⁸Ütingpa me Taowe numante inang, tüome yonge ngohpu ütam-e kahta üha yoi Ahngching me yupu mannge mannge lipu yeshinglak.”