Read Konyak Naga MATTHEU 17 Bible Online

MATTHEU 17 - Konyak Naga bible

MATTHEU 17

¹Nyihwok ngohyange Jesuwe Peter, Jeams, hüyange Inao John iman shaha shedaopu kahtang ja te yanne ong.

²Tüoken me iman sheshao me I üshe-leijeiye ngai, hüyange I sheta wanghe kih tee, hüyange I nyemo wangngai shinne heng.

³Tüome mokh she Mosa hüyange Elijah ni Iphei ngaowe imante ngai.

⁴Hüwante Peterwe Jesute i, “Youngwanpa, tüome teman ngohpu meiteki. Nange mongma-a taowe hatüo me panha lüm welakei, nang jingne ja, Mosa jingne ja hüyange Elijah jingne ja.”

⁵I yelakpe ngaowe ngohwante, yeonge jaopu wangphom-e imante nyeih, hüyange wangphom mepu ngao jawe hüke i, “Hatüo ü-mongkenpu Ha, ao me Tao yeonge monghah nang; Ite jaiyah!”

⁶Aope pinlan-e tüopa jai, iman-e iman sheta büangyange ümme ta hüyange yeonge nyam.

⁷Hüpoi Jesu wenne imante powe i, “Lüotüoh tahnyam.”

⁸Aope iman-e nganne lei hüyange Jesu I shaha kaiye ao-o ye-nge.

⁹Hüyange iman kahtang mepu yewante Jesuwe imante hüke i, “Kahta üha lipu mepu yange manye manye himang aohite-o tah i.”

¹⁰Pinlan-e Ite tong, “Hüma-a ngaokeng nyüopalan-e hangne Elijah üwangne yulak she ipu?”

¹¹Iye jan, “Elijah ütingme yukülak hüyange lampheli linge yelak.

¹²Hüyangpoi Taowe numante inang, Elijah peiyangki, hüyange iman-e I yeshing, hüyangpoi iman-e hanghe leng Ite lingyangki. Tüo kih-e kahta üha-o iman yakme shange ponglak.”

¹³Hüwante Iye baptipa John ngaonang she iman-e shing.

¹⁴Aope iman ükhong ngohjing te leihye, I sheshao me kahta ja ngai, hüyange yatuhshinge Ite khümme i,

¹⁵“Üyongpa, ühate shüpshe pha, hangjingne Ime mahudak ngohnang hüyange dak nangki; I vün me sha-a sha-a sheak hüyange yengme sha-a sha-a hüng nangki.

¹⁶Taowe I nang pinlan tangte woipei hüyangpoi iman-e I yemei ok.”

¹⁷Jesuwe jan, “Oh üting yelakpu hüyange ünyong yete kempu jin! Numan phei Tao hangshin laowe ngohlak? Numan phei Tao hangshin nünne ngohlak shi? Naha-a ü-tangte tüome woipei kei.”

¹⁸Jesuwe laate teeye i, I mepu laa tai, hüyange hüwante muh naha mei.

¹⁹Pinlan Jesu tangte jünge pei hüyange i, “Hatüo toman-e hangne yejang okpu shi?”

²⁰Iye imante i, “Hangjingne numan ütinglakpu jamloi shoipu nanjingne; tüokhei Taowe numante üting inang, numan me yanhoi li shinne nehoi ütinglakpu ngohma-a, numan-e tüopa kahtangte ilak, ‘hatüo mepu otüo ngoiye potüoh, hüyange tüopa pokülak’ numan jingne ye-oklak hango yenanglak.” (

²¹Hüyangpoi ülao hango yeje, yoppu hüyange nyaolepu kaiye tüopa kihpu jang oklak.)

²²Aope pinlan khongküm jamshe Galilee me shüppe jem, hüwante Jesuwe imante i, “Kahta üha kahtalan yak me phünne phalak.

²³Iman-e I toilak, hüyange lümshepu nyih me I yange yelak.” Iman yeong mongmeng.

²⁴Aope iman Kapernaum te pei khümjing kahngin shaipalan Peter tangte pei hüyange i, “Numan konnyüopawe khümjing kahngin phanang kü a?”

²⁵Iye jan, “Phanang.” Aope I nokte pei, Iye hango man ipe Jesuwe i, “Simon, nange hangke teihnangki? Kahtoknyu ahnglan-e nanlei ngin yejema-a kahngin ao mepu shainangki? Iman hayimlan mepu heiya, yinpa mepu?”

²⁶“Yinpalan mepu,” she aope Iye i, Jesuwe Ite i, “Tüokihpu hayimlan jingne phalak wongpong ne yeje.

²⁷Hüyangpoi iman yashah yehüolak jingne, nang yengching te taitüoh, yankeih ja shüptüoh hüyange üwangne ompu nyah yahtüoh; I ju katüoh hüyange nange nginmei ja tüolak. Hatüo yahtüoh hüyange imante nang hüyange ü-jingne phatüoh.”