Read Konyak Naga MATTHEU 18 Bible Online

MATTHEU 18 - Konyak Naga bible

MATTHEU 18

¹Tüohipak me pinlan Jesu tangte pei hüyange i, “Hüma-a wangdang ahngching me üyongpa ao shi?”

²Iye naha ja I tangte nyik, iman sheshao me shotne tam;

³hüyange i, “Ütingme Taowe numan te inang, numan jeileiyange hüyange nahalan kih-e manmeng manmeng, numan wangdang ahngching te ongpu ye-oklak.

⁴Tüokhei aowe tüopa naha leye innenyai wangdang ahngching me I Üyongpa.

⁵Aowe ümin jingne hükihpu hashih naha ja yah nang Iye Tao yahnang.

⁶“Aowe üte ütinglakpu tüolan üshoipa ja nehoi ünu me yeine tamlakei, I jingne shamshu long üyong ja üngme yükyange, hüyange yengching ülu me yeipupa I jingne shemeilak.

⁷Kahtalan ünu omtamlak ne toi hei nan ngaipu, kahtoknyu jingne onyukei: hükihpu toi jinte ngailak, hüpoi tüolan ngaine tampupa jingne onyukei.”

⁸“Nang yak yejema-a nang yawe ünu omne tamküma-a, tüopa langtüoh hüyange nang mepu wintüoh. Nang jingne yak hei ya moini phei jinte yemahpu vünte taipu phei yakja yejema-a ya ja yenangpe üyin chingte taipu meilak.

⁹Hüyange nang mükke ünu omne tamküma-a, tüopa yoktüoh hüyange nang mepu wintüoh. Nang jingne mük ni phei molovün te taipu phei ja phei üyin chingte taipu meilak.”

¹⁰“Hatüo üjoilan yo me numan-e ja te nehoi ye-i-yeshepe yelinglak kentingyah, hangjingne Taowe numante inang, iman wangdang me wangdang shongmokpalan jinte wangdang me ngohpu üpa phei ngohnang. (

¹¹Hangjingne mahpu yinlak jingne Kahta Üha pei.)

¹²“Numan-e hangke teihnangki? Kahta jawe nyee gho ja ngoh hüyange iman yo me ja lamnyong yete tai mahma-a, Iye detu metu waktang yeme angyange hüyange leih-e yeye lamnyong yete tai mahpupa yeyam a?

¹³Hüyange Iye tüopa tüoma-a, ütingme Taowe numante inang, ünyong yete yetaipu detu metu phei shenyei she tüopa ja tangme I mongmei nang.

¹⁴Tüokih-e tüolan üjoilan yo me ja nehoi mahlak jingne wangdang me ngohpu numan üpawe yemong.”

¹⁵“Nang jeiheinao ütam-e nang phei tüi-e ünu lingma-a, taitüoh hüyange nang ni shaha ngohyange I ümeng ngaitam tüoh; Iye nangte jaima-a, nang jeiheinao nange okpu ngeteki.

¹⁶Hüyangpoi Iye nang ngao yejaima-a jamme ni yejema-a lüm woiyah, hangjingne ‘tüolan ni yejema-a lümme phapu saki kaiye ngaolam lili üpong tüowe meiye lingne ok.’

¹⁷Iye ngao-o yejaima-a, bumeinok te itüoh; hüyange Iye bumeinok ye-i-yeshema-a, I shaaji yinhu hüyange kahngin shaipa kih angtamtüoh.”

¹⁸“Ütingme Taowe numante inang, hanghepa numan-e kahtok me sha nang hatüo wangdang me-o shalak, hüyange hanghepa numan-e kahtok me lantam nang hatüo wangdang me-o lantamlak.”

¹⁹“Üne-o ütingpa me Taowe numante inang, numan-e yah-hupu hanghe toilan jingne, kahtoknyu me numan kahta ni nehoi mong ja ne sheiyange yuma-a, wangdang me ngohpu üpawe hatüo numan jingne lingpha lak;

²⁰hangjingne ümeken me ni yejema-a lüm ümin me jemme ngohnang, hatüo me Tao iman yome ngohnang.”

²¹Tüophei me Peter pei hüyange Ite i, “Youngwanpa, aope ü-jeiheinao jawe ü-phei tüi-e ümeng linglakei hangshin me taowe Ite ümeng winlak shi? Nyit me ngoiye hei?”

²²Jesuwe Ite i, “Taowe nang te nyit ngoiye she ye-i, hüyangpoi, denyit me nyit ngoiye.

²³“Tüokhei, wangdang ahngchinga ahngpa jawe I shaoshanpa phei ngin jeng tümme anghupu ja lenang.

²⁴Aope Iye tüo lingne wang, ao kahta jawe Ite ngin hajapen shümlak ngoh I tangte woipei.

²⁵I me pheeisea shümlak hango yenangpuwe, I nokpuwe hüke ngaophawe i, tüo kahta, I sheko hei nahalan, hüyange Ime ngohpu khongküm yüoyange pheeisea shümtüoh.

²⁶Tüokhei shaoshanpawe I sheshao me yatuh shünge khümme i, ‘Üte hüng nünpha, taowe nang te üshei shüm hahma.’

²⁷Tüopa shaoshanpa nokpupawe Ite yeonge yayenge teih hüyange I lantam, hüyange Ite tang yehahpe ang.

²⁸Hüyangpoi tüopa shaoshanpa nokshao te yu hüyange I shümpa shaoshanpa ja muh Ite adholi gho ni nanjing phalak hüo. Iye yakme lük, üngme phütyange hüke i, ‘Üte phalak ne ngohpu pheeisea sha-a yahkei.’

²⁹Tüokhei I shümpa shaoshanpa ja ümme tayange ümeng winpha she yu. Üte hüng nünpha, she Iye i, ‘Hüyange taowe nang te phalakei.’

³⁰Hüyangpoi Iye yejai, hüyange I pheeisea pha manlan manlan phowe küpnok me I ang.

³¹Aope hüke lingpu iman-e nge, I shümpa ülao shaoshanpalan yeonge mongmeng, hüyange iman nokpu tangte wenne ngaipu lampheli ngaiye i.

³²Tüo phei me nokpupawe Ite nyik, hüyange i, ‘Shaoshanpa ümeng, nange ümeng yupu nangjingne nange üte pha ne ngohpu tang khongkümpu angyangki.

³³Taowe nangte yayengpu kih, nange-o nang shümpa shaoshanpa te yeyah yengpu a?’

³⁴Nokpupa yeonge mongmeng hüyange Iye phalak pheeisea khongkümpu manpha manpha shaoshi tamlaklan yak me I phünne pha.

³⁵Tüokhei numan pümlep iye yoi jeiheinaolan te numan mongjang me ümeng yewinma-a, hümma-a wangdang me ngohpu üpa-o hükih numante jonlak.”