Read Konyak Naga MATTHEU 19 Bible Online

MATTHEU 19 - Konyak Naga bible

MATTHEU 19

¹Aope Jesuwe tüolan khongküm ngaowe sho, Iye Galilee tüoh hüyange Jordan kaiye Judea kahtok yete pei.

²Ükhong üyong Iphei woi, hüyange tüome Iye iman meitam.

³Phariseelan ütam I tangte pei, hüyange Ite tokke ngaotong. “Teman ngaokeng me kahta jawe shemin lamphe hüyange yepah yewai jingne yoi sheko phei toi yanlak shu-nangpu a?”

⁴Iye janne i, “Üwangne muh Lingpupawe iman netan hei sheko ling she numan-e ye i a?”

⁵Hüyange Iye i, “Tüojingne kahta jawe yoipa hüyange yoinyu tüohlak; hüyange I yoi sheko phei shüpshalak, hüyange imni ja ne menglak.

⁶Hüyange shaaji iman ni yeje, hüyangpoi ja. Kahwange hanghe sheiye shüpne tam kahtawe yanne tahtam.”

⁷Iman-e Ite i, “Hüma-a yanlak sakilai phayange yha yantamtüoh she hangne Mosawe ngaokeng pha?”

⁸Iye imante i, “Numan mong wanpu jingne Mosawe numante yoi shekonyu yantamlak ngaopha, hüyangpoi üwangne muh hüke ngohpune yeje.

⁹Taowe numante inang, aowe phwngpu kaiye, yoi sheko yantamyange ülao sheko yahlakei, Iye phwngngam nang.”

¹⁰I pinlan-e Ite i, “Netanpa hei shekonyu nipa me hükihpu yafün ngohpu ne mengma-a, nok yeyampu shemei.”

¹¹Hüpoi Iye imante i, “Aote shinglak wong phawe ngoh, iman kaiye ülaolan-e hatüo ngao shingne ye-ok;

¹²hangjingne ütam-a Inyu sea memuh moiko ne puhpu kahta ngohnang, hüyange ütam-a kahtawe linge tampu kahta ngohnang, hüyange ütam-a wangdang ahngching jingne yoi nying nyingke lingpu ngohnang. Aome tüopa shinglak okke ngoh nang Iye shingyah.”

¹³Hüwante I yak iman me angtam yange yoptamlak jingne kahta ütam-e nahalan I tangte woipei; hüyangpoi pinlan-e aoyinne iman woipei imante yeonge yemeipe tee.

¹⁴Hüyangpoi Jesuwe i, “Hashih nahalan ü-tangte peine tamtüoh. Hüyange iman (ü-tangte) peilak mepu tahtien; hangjingne wangdang ahngching hatüo kihpulan jing ngohnang.”

¹⁵Iye iman tangme I yak shünge tam hüyange tüopa nyoi mepu I yoi lamte tai.

¹⁶Hipak ja me Jesu tangte kahta ja pei hüyange Ite i, “Konnyüopa, jintepu üyin tüolak jingne taowe hanghe toimei linglak shi?”

¹⁷Iye Ite i, “Hanghe ümei tüopa jeng nange hangne üte tongnangki? Ao meinang, ja shingha ngohnang. Nange üyin ngoh huma-a, ngaokenglan jontüoh.”

¹⁸Iye Ite janne i, “Hanghepa?” Jesuwe i, “Nange tahtoi, nange phwngngampu tahling, nange tahkuh, nange tahleih saki tahpha.

¹⁹Nangpa hei nangnyu iyesheyah, hüyange nange nang yupi te nang kih-e kenyah.”

²⁰Naoshepawe Ite i, “Tüolan khongküm taowe jonnangki; tao üne hangheye yewang?”

²¹Jesuwe Ite i, “Nang wang ngoihuma-a, taitüoh hüyange nang moth yüotüoh hüyange toihalante ngin phatüoh, hüyange nang shengngin wangdang me ngohlak; tüophei me peikei hüyange ü-pheite woikei.”

²²Hüyangpoi aope naoshe pawe tüopa ngao ipu jai, I mongmenge tai; hangjingne Iye moth yeonge ngoh.

²³Hüwante Jesuwe yoi pinlante i, “Ütingme Taowe numante inang, hakpa kahta ja jingne wangdang ahngching te yulak wannang.

²⁴Üne-o Taowe numante inang, hakpa kahta ja Kahwang ahngching te onglak leima, vemei wo me udh ja helak she-o-lak.”

²⁵Aope iman-e tüopa ngao jai pinlan yeonge yashan, hüyange i; “Hüma-a ao yinpu oklak?”

²⁶Jesuwe imante lei hüyange i, “Kahtalan jingne hatüowa ye-oklak, hüyangpoi Kahwang jingne khongkümpu oklak.”

²⁷Tüophei me Peterwe Ite janne i, “Toman-a hangke? Toman-e khongküm tüoh, hüyange nang pheite woi. Hüma-a toman-e hanghe tüolak?”

²⁸Jesuwe imante i, “Ütingme Taowe numante inang, kahtoknyu üla ne linge yepu me, aope kahta üha yoi müktishiwapu shotjing me shotlakei, hüwante numan ü-pheite woipalan-o Israel nokphong pen me ni ngao phünne, shotjing penme ni me shotlak.

²⁹Ünyei ne, aoyinne nok, jeinaolan, nya-naolan, yoipa, yoinyu, hayim yejema-a kahtok ümin jingne tüoh, iman-e gho phei nyeiye hüyange jintepu üyin tüolak.

³⁰Hüyangpoi üwangpalan maawe üküm ne menglak, hüyange ükümpalan üwangne menglak.”