Read Konyak Naga MATTHEU 2 Bible Online

MATTHEU 2 - Konyak Naga bible

MATTHEU 2

¹Herod Ahngne ngohwante aope Judea me ngohpu Bethlehem me Jesu Khrista puh, wanghe ongjing yemepu shanha itte shempalan Jerusalem te peiyange i,

²“Jehudilan Ahngpa üla puhpu ümeken me ngoh nangki? Hangjingne toman-e I shanha wanghe ongjing ye me nge hüyange Ite khümne toman peiyangki.”

³Aope Herod Ahngpawe tüopa ngao jai I hüyange Jerusalem me ngohpu kahtalan üshei mongshang.

⁴Iye ngengpa üjenglan hüyange ngaokeng nyüopalan üshei nyik-e jem hüyange Messiah ümeken me puhlak? she tong.

⁵Iman-e Ite i, “Judah me ngohpu Bethlehem me: hangjingne hatüowa hipa kaiye nyan:

⁶“Nang, Judah kahtok me ngohpu Bethlehem, Judah wanglam lampalan yo me nang hangke jam sheshoipa ne yemenglak! Hangjingne nang mepu woipa ja, aowe ü-kahta, Israel nyeeyompa ne menglak, I ngailak.”

⁷Tüophei me Herodte shanha itte shempalan lowe nyik hüyange shanha aope muh ngai iman mepu lowe shinglak jingne yam.

⁸Iye iman Bethlehem te hüke iye shon, “Taitüoh hüyange naha jeng meimeiye yamtüoh, hüyange aope numan-e I tüolakei üte ngao pha, hüyange tao-o I tangte taiye khümne ok.”

⁹Aope iman-e ahngpa mepu ngao jai iman yayong, hüyange Naha puhwe ngohjing ngoiye iman manlak manlak, iman-e ngaiye ngepu shanha iman shaote kem.

¹⁰Aope iman-e shanha nge, iman yeonge mongmei;

¹¹hüyange iman nokte ong hüyange Inyu Mary phei Naha nge. Iman kahtok te ümme ta hüyange Ite khüm, hüyange iman hünghao shop lanyange Ite hon, sünyet hüyange üpeameipu hünghao shop pha.

¹²Herod tangte leih yeyelak jingne mang me imante Kahwange deingao pha hüyange iman ülao lamme yoi kahmük te leihye.

¹³Sha-a aope iman yanne tai, mangme Youngwanpa shongmokpa Joseph tangte ngai, hüyange i, “Lüotüoh, nao hei Inyu ni yahyah, hüyange Egypt te taitüoh, hüyange Taowe nangte man-i man-i tüome ngohtüoh, hangjingne nao menge winlak jingne Herodte yamkülak.”

¹⁴Hüwante Joseph lao, nao hei Inyu ni yah hüyange wangnyak me Egypt ngoilak jingne tai,

¹⁵hüyange Herod manli manli tüome ngoh, hangjingne “Egypt kahtok me Taowe üha nyik”, she hipa kaiye Youngwanpawe ngaoyangpu ütahte ngai.

¹⁶Aope shanha itte shempalan-e Ite yaopu nge, Herod yeonge mongshih ngai, hüyange shanha itte shempalan phei hüopu hipak mepu ityange, Bethlehem hüyange neikonpu kahtok üshei yemepu wangpeng nimai netan nahalan khongküm toilak jingne shon hüyange toi.

¹⁷Hüwante Jeremia hipa kaiye ngaopu ütahte ngai.

¹⁸“Ramah me wüng ja jai, khah shappu hei yeonge yoongpu, yha yoi hayim jingne Rachel yelakpe shap, yhawe ngaowe nyüolak jingne yemong, hangjingne iman shaaji yenang.”

¹⁹Hüyangpoi aope Herod li, Egypt me ngohpu Joseph tangte mangme Youngwanpa shongmokpa ngaiye i,

²⁰“Lüotüoh, nao hei Inyu ni yahyah, hüyange Israel kahtok te taitüoh, hangjingne aoyinne toihuwe teih iman liteki.”

²¹Tüokhei Joseph lüo, nao, hüyange Inyu ni yah, hüyange Israel kahtok te tai.

²²Hüyangpoi Ipa Herod nanleiye Judea kahtok me Arkhelas ahngne mengnangki she jaiye I tüoyete yelak jingne nyam, hüyange mang ja kaiye muh Ite ngao phapu kaiye I Galilee kahtok te leih ye.

²³I tai hüyange Nazareth she nyikpu ching ja me nyoi, “Ite Nazarene she nyiklak” she hipalan kaiye hanghe ngaoyangki ütahte ngai.