Read Konyak Naga MATTHEU 20 Bible Online

MATTHEU 20 - Konyak Naga bible

MATTHEU 20

¹“Wangdang Ahngching wulick kah nokpuwe napning shomme Inok wulick kahte tailak nanpalan yamne taipu lenang.

²Nyih te nantoi ja jingne adholi ja pha ne nanpalan phei Iye taisho hüyange Inok wulick kahte iman shon.

³Tupaji nanjing me (taipong) I chingyang te tai hüyange hatleih nyoi me kahta ütam lahwange yonge nge;

⁴hüyange Iye imante i, ‘Numan-o wulick kahte tatüoh, hüyange taowe nanmee hangshin shanglak yahpha ning.’ Hüyange iman ta.

⁵I üne-o pen-me-ni paji (nyihning) hüyange lüm paji (ünshao) nanjing me taiye hükemuh ling.

⁶Nga paji nanjingme (ünpongme) I tai hüyange ülaolan yonge nge. Iye imante i, ‘Numan-e hatüo me hangne nyihlao hipak lahwange yonge ngoh nangki?’

⁷Iman-e Ite i, ‘Hangjingne aowe-o toman nan yeyah.’ Iye imante i, ‘Numan-o wulick kahte tatüoh.’

⁸Aope ün ngoi wulick kah nokpupawe yoi shaoshanpa üjeng te i, ‘Nanpalan nyiktüoh hüyange aoyin üküm ne ta tüolan mepu wange üwangpa ne tapalan ngoiye, iman nanmee phatüoh.’

⁹Aope aoyin ünpong ngapaji nanjing me nanshak, pei ngoi hüyange iman-e adholi japong tüo.

¹⁰Aope üwangpalan pei, iman-e sheyongshe tüolak she iman-e teih; hüyangpoi imane-o adholi japong hei tüo.

¹¹Aope iman-e tüopa yah, nokpu phei tüi-e iman-e pa i;

¹²‘Tüolan üküm ne peiye ghonda ja nanjing toiling, hüyange toman nyihlao hipak hüyange wanghe phei hokke toi ling. Toman phei tüolan-o jakih-e nange ling.’

¹³Hüpoi iman yo mepu ja te Iye janne i, ‘Shümpa, taowe nangte lolampu yeje. Adholi ja jingne nang ü-phei mong yehahpu a?

¹⁴Nangjing hanghe, yayah hüyange taitüoh. Tüopa ükümpa kahtate taowe nang phei jakih pha hunangki.

¹⁵Üjinga taowe hangke mong hüke linglak ne yeje a? Tao meipute nang mong yemeipu a?’

¹⁶Hatüo kih, ükümpalan üwangne menglak, hüyange üwangpa lan ükümne menglak.”

¹⁷Aope Jesu Jerusalem te ong, Iye pinlan penme ni shaha woi, hüyange lamme Iye imante i,

¹⁸“Jaiyah, teman Jerusalemte ongnang, hüyange Kahta Üha ngengpa üjenglan hüyange ngaokeng nyanpalan te phünne phalak. Iman-e I lilak jingne ümeng phakülak;

¹⁹hüyange yaoleye tamlak jingne yinhulante phünne phalak, shetlak, hüyange takke toilak, hüyange I nyihlüm shepu nyih me yange yelak.”

²⁰Hüwante Zebedee ünyu yoi hayim phei I tangte pei, I sheshao me ümmekhüm hüyange Imepu ülam ja yu.

²¹Iye yha te i, “Nange hanghe yah hunangki?” Yhawe Ite janne i, “Hatüo üha ni, ja nang yakjah yeme, hüyange ja nang yak nya yeme, she nang Ahngching me shotlak jingne ngaopha kei.”

²²Hüpoi Jesuwe janne i, “Numan-e hanghe tong numan-e yeshing. Taowe yingne ngohpu wan numan-e yingpu ok ningya?” Iman-e Ite jan, “Toman-e oklakei.”

²³Iye imante i, “Numan-e ü-wan me yingne ok, hüyangpoi ü-yakjah yeme shotlak hüyange ü-yaknya me shotlak Taowe phalak ne yeje; hüyangpoi hatüo ao jingne üpawe tüm iman jingne ngohnang.”

²⁴Hüyange aope ülao pin pen ne tüopa jai, Ijei Inao ni jingne iman mongmeng.

²⁵Hüyangpoi Jesuwe imante nyik hüyange i, “Kahtoknyu wanglam lampalan-e kahtalan tangme wong ngohnang, hüyange iman woipalan-e iman tangme wanglam lamnang she numan-e shing.

²⁶Numan yo me hükihpu yenanglak; hüyangpoi numan yo me ütam üyongpa ne menghuma-a, ülaolan shaoshanpa ne I mengtüoh;

²⁷hüyange numan yo me ütam üwangpa ne menghuma-a, I numan rhapa ne hüng mengtüoh.

²⁸Hatüo kih, Kahta Üha shaoshanne tamlak jingne peipu yeje, hüyangpoi shaoshan ne pei, hüyange maapu jingne I üyin dopu ümee jaleye pha ne pei.”

²⁹Iman-e Jerikho tüohyange taiwante ükhong üyong I pheite woi.

³⁰Mükmüopa ni, lamnah me shotte ngoh, hüyange Jesu peinang she imniye jai hüyange üngwün, “Üyongpa, David üha, tomante shüpshe pha.”

³¹Ükhonge imnite yelangmanpe ngohlak jingne tee, hüyangpoi imni ünyeine üngwün, “Üyongpa, David üha, tomante shüpshepha!”

³²Hüwante Jesu lak, hüyange imnite nyik-e i, “Taowe numan jingne hanghe lingne tamhu nangki?”

³³Imniye Ite i, “Üyongpa, nange toman mük eppe tampha.”

³⁴Hüyange Jesuwe yayenge teihyange imni mükte jon, tüophei me mokhshe imni mük ep hüyange I pheite woi.