Read Konyak Naga MATTHEU 21 Bible Online

MATTHEU 21 - Konyak Naga bible

MATTHEU 21

¹Aope Jesu hüyange I pinlan iman Jerusalem te owe pei, hüyange Olive Kahtang me ngohpu Bethphage ngoi. Jesuwe pin ni shonne tei,

²hüyange imnite hüke i, “Numan sheshao me janhüopu chingte ongtüoh, hüyange numan-e gado shinyange ngelak hüyange tüophei üha ja ngelak. Lantüoh hüyange iman tüome peikei;

³hüyange ütam-e numante ngaoma-a numan-e hüke itüoh, ‘Konnyüopawe iman wongpong yang she itüoh;’ hüwante Iye mamshe iman shonlak.”

⁴Tüo lili hipa kaiye ipu ütahte ngailak jingne hatüo ngai,

⁵“Zion yha te itüoh, Leitüoh, nang ahngpa nang tangte peinang! Innenyai puphei hüyange gado tokme ongyange, hüyange üha me, hatüowa gado!”

⁶Tüokhei pinlan tai, hüyange Jesuwe ngaopu kih ling;

⁷Iman-e gado hüyange üha woipei hüyange iman-e gado tok me inkhek nyiamme tam, hüyange tüo tangme I shot;

⁸Ükhong üyongpuwe lamnyu me yoi yoi nyemo nyiam, hüyange ülaolan-e peequi lang hüyange lamnyu me nyiamme tam.

⁹Ükhong aoyin I sheshao me kem hüyange aoyin I tokphei me woi hüke üngwün: “David ühate Hosanna! Youngwanpa min me ao peinang I te yihlu tüoh! Ütahpa me Hosanna!”

¹⁰Aope Jesu I Jerusalem te ong, chingnyu lanshepute pok. Iman-e i, “Hatüo ao shi?”

¹¹Ükhonge janne i, “Hatüowa Galilee kahtok Nazareth, mepu hipa Jesu.”

¹²Hüyange Jesu Kahwang khümjingte ong, hüyange tüome aoyin teiyao hüyange teishakpu ngoh üshei Iye jange tei; ngin leijeipalan khao hüyange awshu yaopalan shotjing Iye shokke win;

¹³hüyange Iye imante i, “Ü-nokte yoppu nok she nyiklak nyanne ngohnang; hüyangpoi numan-e hatüo leihpalan longsa ne lingetam.”

¹⁴Khümjing me mükmüopa hüyange yafaipalan I tangte pei, hüyange Iye iman meitam.

¹⁵Aope ngengpa üjenglan hüyange ngaokeng nyüopalan-e Iye lingpu yashanyalipu toi nge, hüyange khümjing me nahalan-e “David üha Hosanna,” she üngwün, iman mongmeng,

¹⁶hüyange iman-e Ite i, “Iman-e hanghe i nange jaiya?” Jesuwe imante i, “Jainang; nange naotak hüyange düam phei manyanpulan ju mepu yihlupu wange ngoiyangki, she laingao me numan-e aope-o ye i a?”

¹⁷Tüophei me Iye iman tüohyange, chingnyu mepu yayonge Bethani te lai hüyange tüome ngoh.

¹⁸Napning shomme aope I chingnyute leih ye I seanyao.

¹⁹Lamnah me Iye phukpee ja nge, tüote leine wen hüyangpoi peeyak kaiye hango yetüo. Iye tüopate i “Nangme shaaji nishe ülick hango tahlick;” hüyange phukpee mokhshe kuimah.

²⁰Aope pinlan-e tüopa nge iman yashan hüyange i, “Hangke mokhshe phukpee kuipuweih?”

²¹Jesuwe imante janne i, “Ütingme Taowe numante inang, numan-e ütinglakpu ngoh hüyange yenüngneima-a, numan-e phukpee te hanghe ling, tüo shaha linglak ne yeje, hüyangpoi numan-e hatüo kahtang te nange nuwe yahtüoh hüyange yengching te shüptüoh she, itüohpoi, hatüo lingkülak;

²²hüyange numan me ütinglakpu ngohma-a, hangyin jingne numan-e yoppu me tong, numan-e tüolak.”

²³Hüyange aope Jesu khümjing te ong, hüyange konnyüowe ngoh, ngengpa üjenglan hüyange jeiyonglan I tangte pei, hüyange i, “Hanghe wonge nange tüoyin lingpu shi hüyange aowe nangte tüopa wong phapu?”

²⁴Jesuwe imante jan, “Taowe-o numante ngaoja tongpha ning. Numan-e üte tüopa ima-a, hanghe wonge Taowe tüoyin ling Taowe numante-o iphaning.

²⁵Baptipa John ü-mepu peipu, wang mepu heiya kahta mepu?” Iman iman yo me teingao; “Wang mepu” she teman-e ima-a, Iye temante iphalak “Hüma-a numan-e hangne üting yelak?”

²⁶Hüyangpoi teman-e “Kahta mepu” she ima-a, ükhongte teman nyam nangki; hangjingne üsheiye John-a hipa ja she shingnang.

²⁷Tüokhei iman-e Jesu te jan, “Toman-e yeshing.” Iye imante i, “Hüma-a hanghe wonge Taowe tüoyin ling numante min i.”

²⁸“Numan-e hanghe teihnangki? Kahta jawe naoshe ni ngoh; Iye jeiyongpa tangte wen hüyange i, ‘Üha, tatüoh hüyange tenyih-a wulick kah hamtüoh.’

²⁹Iye jan, ‘Tao minta.’ Tüophei me I monglüp hüyange ta.

³⁰I naolipa tangte wen hüyange hüke muh i. Iye jan, ‘Üyongpa, tao talak.’ Hüyangpoi I yeta.

³¹Tüo ni yo me Ipawe mongpu ao ling ei?” Iman-e jan, “Üwangpawe.” Jesuwe imante i, “Ütingme Taowe numante inang, numan shaoyete kahngin shaipalan hei phwngngamnyulan Kahwang ahngching te ongnang.

³²Hangjingne numan tangte John pei hüyange khakshupu tailam hüo hüyange numan-e Ite üting yelak; hüyangpoi kahngin shaipalan hüyange phwngngamnyulan-e Ite ütinglak. Numan-e tüolan nge, hüyangpoi tüophei me Ite üting laklak jingne numan mong yelüp.”

³³“Hatüo me ülao ngaolep ja jaiyah. Hipak ja me kahnokpu ja ngoh aowe wulick kah ham, hüyange tüopa neikonne pepe, tüome ngütlak nyoi shaowe ling hüyange yomtepja we. Iye kah hampalan tüome ang hüyange kahmük üjai yete tai.

³⁴Aope ülick khailak hipak owe pei Iye yoi ülick yahlak jingne kahhampalan tangte yoi shaoshanpalan shon.

³⁵Kah hampalan-e I shaoshanpalan pho; she jate shet, ülao ja toi, hüyange ülao ja-a longe shüptoi.

³⁶Üne-o Iye ülao shaoshanpalan, üshongpu phei shenyei she shon, hüyange iman-e hükih muh imante ling.

³⁷Phei me Iye Iha iman tangte shon, hüyange i, ‘Iman-e ü-ha tepa-a iyeshekülak.’

³⁸Hüyangpoi aope kah hampalan-e Iha nge, iman yo me hüke teingao, ‘Hatüo mothleilakpa, kei, teman-e I toihah, hüyange Iye leilak moth teman-e yahhah.’

³⁹Iman-e I pho, wulick kah mepu I jange tei, hüyange I toi.

⁴⁰“Tüokhei aope wulick kah nokpu peilakeih, tüolan kah hampalante Iye hang linglak shi?”

⁴¹Iman-e Jesute jan, “Iye ümengpalan shüpshe yenangpe meiwinlak, hüyange hipak ngoiwante kah hampalan aoyinne Ite ülick phalakei, hatüo kah hampalante Iye wulick kah leih-e phalak.”

⁴²Jesuwe imante i, “Numan-e laingao me aope-o ye i a: “ ‘Nokweplan-e hanghepa long yeyah hatüopa nokjing shongnyu longne meng; aowe hatüo ling tüowa Youngwanpa, hüyange hatüowa toman mükshao me yashanlakpa!’ ”

⁴³Tüokhei Taowe numante inang, “Kahwang ahngching numan mepu yahteilak, hüyange tüopa mepu ülick ngaitamlak jat ja te phalak.

⁴⁴Aoyin tüopa long tangme yeilakei khoihpailak, hüyange ütamte tüopa long yeima-a I tüpla ne menge khoihlak.”

⁴⁵Aope ngengpa üjenglan hüyange Phariseelan-e I ngaolep jai, Iye iman jeng inang she iman-e shing.

⁴⁶Hüyange iman-e I pholak jingne yamyapoi iman ükhong te nyam, hangjingne ükhonge Jesuwa hipa ja she nyammele.