Read Konyak Naga MATTHEU 22 Bible Online

MATTHEU 22 - Konyak Naga bible

MATTHEU 22

¹Jesuwe üne-o ngaoleppu me imante i:

²“Wangdang ahngching ahngpa jawe I ha jingne naoyha poipu mo tümpu ja lenang.

³Iye aoyin mo jingne nanpheng yangki iman nyiklak jingne yoi shaoshanpalan shontei, hüyangpoi iman yepeihu.

⁴Üne-o Iye ülao shaoshanpalan shonne teiye hüke i, ‘Aoyin nanpheng yangki imante itüoh, hüowü, taowe hahying tümme shoteki, Ü-mahu üpong hüyange tamme angpu yinmok shenüt pulan toiteki, hüyange üshei tümteki. Naoyha poi mo te jemkei.’

⁵Hüyangpoi iman-e imante mong yepha hüyange yoi yoi lamte yanmah, sheja Inok kahte, hüyange ülao ja pheeileihpu lamte yanmah.

⁶Hüyange towe ngohpalan-e I shaoshanpalan pho, shette tee hüyange toi.

⁷Ahngpa yeonge mongmeng; Iye yoijing nyahponglan shontei, toipalan mahne tam, hüyange iman chingnyu vünme jakke win.

⁸Tüophei me Iye yoi shaoshanpalante i, ‘Naoyha poipu mo tümyangki, hüyangpoi aoyin nanpheng yangki iman yewang.

⁹Tüokhei numan lampong üshei yete taitüoh, hüyange numan-e kahta aoshin ngelakei tüolan lili naoyha poipu mo te nyiktüoh.’

¹⁰Shaoshanpalan lampong üshei yete yan, hüyange iman-e tüopu khongkümpu, ümeng hüyange ümei woipei; hüyange naoyha poipu nok yinpalan-e maa.

¹¹“Hüpoi aope peipu yinpalante leine Ahngpa pei, hüyange kahta ja naoyha poipu o yeyahpe nge.

¹²Iye Ite i, ‘Shümpa, naoyha poipu o yeyahpe nang tüome hangke ongpu?’ Hüyangpoi I hango yengao okpe ngoh.

¹³Tüophei me shaoshanpalante Ahngpawe i, ‘I ya hei yak me shatüoh, hüyange I nokshao wangnyak me shüptüoh.’ Tüome shappu hüyange fa ngaopu ngohlak;

¹⁴hangjingne iman maawe nyiknang, hüyangpoi üjingha hei lenang.”

¹⁵Tüophei me Phariseelan tai hüyange I ngaotün me hangke litamlak tüopa kon yam.

¹⁶Iman-e yoi pinlan Herod pinlan phei jamme I tangte shon, hüyange iman-e i, “Konnyüopa, nanga üting she, hüyange ütingpa me Kahwang lam nyüonang, hüyange aote-o hangko yeteih, hangjingne nange kahtalan sheta yelei she toman-e shingnang.

¹⁷Tüokhei nange hangke teih, tomante itehu? Kaisar te kahngin phalak toman shupu jeya?”

¹⁸Hüyangpoi iman-e hanghe teih Jesuwe shing hüyange i, “Jutok meipalan, hangne numan-e üte toknangki?”

¹⁹Shaipu kahngin üte hüopha. Iman-e Ite adholi ja yahpei;

²⁰hüyange Iye imante i, “Hatüo ao min nyan hüyange ao lenangki?”

²¹Iman-e jan, “Kaisar.” Tüophei me Iye imante i, “Hanghepa Kaisar jing Kaisarte phatüoh, hüyange hanghe Kahwang jing Kahwangte phatüoh.”

²²Aope iman-e tüopa jai iman yashan, hüyange iman-e I tüohyange yanne tai.

²³Tüonyih Sadduceelan aoyinne yange yepu yenangja she i, I tangte pei hüyange Ite tonge i,

²⁴“Konnyüopa, Mosawe hüke i, ‘Kahta jawe hayim yetüohpe lima-a, Iye tüopu sheko Inaowe yahlak, hüyange Ijei üli ngaiye tamlak.’

²⁵Sha-a toman yo me jeihei nao nyit ngoh yangki. Jeiyongpawe yah, hüyange üli yetüohpe li; Iye yoi sheko Inao me tüoh.

²⁶Hükemuh ni shepupa hüyange lüm shepupa Inao ni, hüyange naolan nyit shepupa ngoiye hükemuh yah hüyange liye küm.

²⁷Üküm ne tüopa shekonyu-o li.

²⁸Tüokhei, yange yewante, shekonyuwa naoshe nyit yo me aohipa sheko ne menglak shi? Hangjingne moilanne yha iman sheko ne yah.”

²⁹Jesuwe imante janne i, “Numan-e laingao yejema-a Kahwang üngan yeshingpu kaiye numan ünyong yete tainang.

³⁰Hangjingne nishe yange yewante kahtalan-e naoyha yepoilak yejema-a toitaine yetamlak, hüyangpoi wangdang me iman wangdang shongmokpalan kih ngohlak.

³¹Hüyangpoi, litepulan yange yelak jeng, Kahwange numante hanghe i, iye yelei a?

³²‘Tao Abraham Kahwang, Isaac Kahwang hüyange Jacob Kahwang!’ I lipu Kahwang ja yeje hüyangpoi üyin Kahwang.”

³³Aope ükhonge tüopa jai Iye nyüopu konte iman üshei yashan.

³⁴Hüpoi aope Jesuwe Sadduceelan ngao lakne tam she Phariseelan-e jai, iman jamshe pei.

³⁵Iman yo mepu ngaokeng nyüopa jawe, Ite hatüo ngaophei tokke i,

³⁶“Konnyüopa, ngaokeng yo me, Üjengpa ngaokeng hanghepa shi?”

³⁷Iye Ite i, “Nange nang Youngwanpa Kahwangte nang mongjang üsheiye, nang yaha üsheiye, hüyange nang kenmong üsheiye kentüoh.

³⁸Üjengpa hüyange üwangpa ngaokeng hatüo üja.

³⁹Ni shepupa ngaokeng Üjengpa hatüo: Nange nang yupite nangkih kenyah.

⁴⁰Tüopa ngaokeng ni me ngaokeng hüyange hipalan khongkümpu yafün lingnang.”

⁴¹Aope Phariseelan jamshe jemme ngoh Jesuwe imante tong.

⁴²“Messiah jeng numan-e hangke teih nangki? I ao shi?” Iman-e Ite i, “David üha.”

⁴³Iye imante i, “Hümma-a hangke, Yaha woipu phei David-e, Ite Youngwanpa she nyik-e hüke i.

⁴⁴“ ‘Youngwanpawe Ü- Youngwanpa te i, Taowe nang wepalan nang yaphang me man ang man ang Ü yakjah yeme shot tüoh.’

⁴⁵Davidte Ite Youngwanpa she nyikma-a, I hangke I ha ne menglak?”

⁴⁶Aowe-o Ite ngaopha ja nehoi yejan, hüyange tüo nyih me peiye aowe-o Ite ngao yamlak mongme yetom.