Read Konyak Naga MATTHEU 23 Bible Online

MATTHEU 23 - Konyak Naga bible

MATTHEU 23

¹Tüohipak me Jesuwe ükhong hüyange I pinlante ngaowe i,

²“Ngaokeng nyüopalan hüyange Phariseelan Mosa shotjing me shot ngohnang.

³Tüokhei iman-e numante hanghe i, kentinge leitüoh hüyange lingtüoh: hüyangpoi iman-e lingpu kih tahling, hangjingne iman-e ngaonang hüyange yeling.

⁴Iman-e hanggee üyong ja ne sha nang hüyange kahtalan phak me paine tamnang, hüyangpoi imanpa-a yaklan nehoi yepo hu.

⁵Iman-e toishao lili kahtawe ngelak jingne lingnang. Hangjingne iman-e ngaolai khok longe lingyange shekeng hei phaktang me yah, hüyange iman inkhek jeng laowe yahnang;

⁶iman-e mo me shemeipupa nyoi hüyange synagogue me ütahpa shotjing,

⁷hüyange pheeileih jing me salam phapu, hüyange kahtalan-e konnyüopa (rabbi) she nyikpu lengnang.

⁸Hüyangpoi numan-a konnyüopa she tahnyik, hangjingne numan konnyüopa ja ngohnang, hüyange numan üshei jeiheinaolan.

⁹Hüyange kahtoknyu me aote-o numan üpa she tahnyik, hangjingne numan üpa ja, wangdang me ngohnangja.

¹⁰Hüyange nyüoleipa she tahnyik, hangjingne numan-e nyüoleipa ja ngohnang, Messiah.

¹¹Hüyangpoi numan yome üyongne ao ngoh, I numan yo me shaoshanpa ne menglak.

¹²Hüyange aowe yoi nying nyingke üyongne menghu I innyailak, hüyange aowe yoi nying nyingke innyailakei I yonglak.”

¹³“Hüpoi numan ngaokeng nyüopalan hüyange Pharisee jutok meipalan onyukei. Kahtalan sheta mepu wangdang ahngching numan-e küppe ang; numan, numan nying nyingke ye-ong, yejema-a aoyin onglak jingne ngang imante ongne-o yetam.”

¹⁴“Ngaokeng nyüopalan hüyange jutok meipu Phariseelan. Numan jingne onyukei. Numan-e wamnyulante lahnyik hüyange iman nok numan-e shemme tam; hüyange ngelak jingne yeonge laowe yop. Tüojingne numante phalak shaoshi yateng üshei phei shemeng she ngohlak.

¹⁵“Ngaokeng nyüopalan hüyange Pharisee, jutok meipalan onyukei! Hangjingne numan-e kahta ja Jehudilan-e - linge tamlak jingne yengching hüyange kahtoknyu neikonne kemnang; hüyange I hüke linge tamwante numan-e I numan phei üphong ni phei nyeiye molovün üha ne linge tamnang.

¹⁶“Mükmüopa woipalan jingne onyukei. Numan-e nyüonang, ‘Aowe khümjing phei jienglakei; hatüo hangko minsheija, hüyangpoi aowe honne khümjing me jienglakei, Ite shapu ngoh nang.’

¹⁷Numan üngapa hüyange mükmüopalan. Ümpehepa sheyongpu, hon heiya, yejema-a hangheye hon jaowe tamnang tüopa khümjing?

¹⁸Üne-o numan-e inang, ‘Kahta jawe wümjonge jiengpu yahküma-a, hatüo hangne-o yeje; hüyangpoi ao kahtawe tüopa tangme ngohpu hünghao phei wümjong me jiengpu yahlakei, I shapu ngohnang.’

¹⁹Numan mükmüopalan; Ümpehepa sheyongpu, hünghao heiya, yejema-a hünghao jaowe tampu wümjong sheyongpu!

²⁰Ao wümjonge jiengpu yah nang, hatüowe hüyange tüome ngohpu liliye jiengpu yahnang;

²¹hüyange aowe khümjinge jiengpu yahnang hatüowe hüyange ao tüome ngoh tüopa Kahwange yahnang;

²²hüyange aowe wangdange jiengpu yahnang hatüowa Kahwang shotjing, hüyange tüome shotpu Iye yahnang.

²³“Ngaokeng nyüopalan hüyange Pharisee, jutok meipalan, numan jingne onyukei! Numan-e hüngngan, hoinge hüyange manmaktik tüolan me linne penphong dopu phanang, hüyangpoi numan-e tüolan phei sheyongpu ngaokeng me, ütingpa me lingpu, shüpshe hüyange ütinglakpu ükengnyulan me mong yepha. Ülao lan-o mong yephape ye-angpe, tüolan khongkümpu numan-e linge ngoh hahshepu.

²⁴Mükmüopa woipalan, numan-e yinglak mepu hoijem jangnang, hüyangpoi udh pahi yingnangki.

²⁵“Ngaokeng nyüopalan hüyange Pharisee jutok meipalan, numan jingne onyukei! Numan-e numan wan hei sheng ütok wao, hüyangpoi ümongme phuh hahhupu hüyange tükpu ye-okpe mong ngaipuwe maawe ngohnang.

²⁶Numan Pharisee mükmüopalan! Üwangne wan hei sheng ümong hüng waotüoh, tüome nakshih ütah ye-o jaolak!”

²⁷“Ngaokeng nyüopalan hüyange Pharisee jutok meipalan, numan jingne onyukei! Numan yeonge meiye shunne shityange ngohpu mangkoksa lenangki, leilak jingne ütok yeonge mei, hüyangpoi ümong yeme mangwaan hüyange ünu ümeng toi liliye maawe ngoh nang.

²⁸Tüo meimei kih, ütah pa-a numan-o kahta lili sheshao me üjao kih, hüyangpoi numan ümongye ma-a aohüngpu hei ngaokengnyu mengpuwe maawe ngohnang.”

²⁹“Ngaokeng nyüopalan hüyange Pharisee jutok meipalan, numan jingne onyukei! Numan-e hipalan mangjong ling, hüyange khakshupalan mangjong o-tümme shütte tüm;

³⁰hüyange numan-e i, ‘Toman üpalan jin me nyoi ngohshih ma-a, iman-e hipalan toipu phei toman-e meitam yeyah hah shepuweih.’

³¹Tüokhei numan nyingnyingke numan-e numan-a hipalan toipulan hayim she saki phanang.

³²Eiyang, numan puyimlan-e ükong wange tüohpu sho ne tamtüoh.

³³Numan pu, hüyange pu hayim, molovün phei ngaophünlak mepu numan hangke yin oklak?

³⁴Tüokhei Taowe numante inang, Taowe numante hipalan hüyange kentamongtingpu kahtalan hüyange konnyüopalan shonlak; iman ütam numan-e toilak, ülaolan tangpem me taklak, hüyange ülaolante numan-e synagogue me shetlak, hüyange chingja mepu ching ja te iman janglak.

³⁵Tüokaiye ümeng yenangpu kahtalan hüyange ümeng yenangpu Abel toipu mepu Baraciah üha Zekharia aohi numan-e khümjing hei wümjong nipa me toi tüolan khongkümpu toipu jingne numan tangte shaoshi yalipu peilak.

³⁶Ütingme Taowe numante inang: tüolan jingne shange pongpu üshei tüopa jinte ngailak.

³⁷“O Jerusalem, Jerusalem, hipalan hüyange numan tangte shonpu shongshonpalan numan-e toi! Awnyuwe yoihalan üyang phang me ongpukih, Taowe aoshin nang kahtalan woijemhu, hüyangpoi nange yemong!

³⁸Leihuyah, numan nok numante wüngmakke angnangpu.

³⁹Hangjingne Taowe numante ipuweih, ‘Youngwanpa min me ao peipuweih, Ite Kahwange moimantüoh,’ she numan-e man i, man i, sha-a me peiye numan-e Tao ye-ngelak.”