Read Konyak Naga MATTHEU 24 Bible Online

MATTHEU 24 - Konyak Naga bible

MATTHEU 24

¹Jesu khümjing mepu ngaiye yoi lamme kemme ngohwante, khümjing wepu hüolak jingne I tangte yoi pinlan pei.

²Hüpoi Iye imante janne i, “Tüolan üshei numan-e ngenang no? Ütingme Taowe numante inang, hatüo me longja nehoi ülao japa tangme yelüpshüppe yetüohlak.”

³Hüke I Olive Kahtang me shotte ngohwante pinlan shaha I tangte pei hüyange i, “Tomante ipha, hatüo lili aope ngailak hüyange nang yulak füo hanghe ngohlak hüyange hatüopa jin üküm hangke ngohlak?”

⁴Hüwante Jesuwe imante janne i, “Aowe-o numan ünyong yete yewoilak jingne kentingyah.

⁵Hangjingne ü-min me kahta maawe ‘Tao Messiah,’ she iye peilak; hüyange iman-e kahta maawe ünyong yete woilak.

⁶Numan-e wehokpu hüyange we hoklak ngaowoong jailak. Numan mong ye-alak jingne kentingyah. Hatüo hei ngailak, hüyangpoi üküm üne-o manngoi.

⁷Hangjingne jatte jat phei tüi-e, hüyange ahngchinge ahngching phei tüi-e yonglak; seanyao yenglepu hüyange kenphe me minwe leipu ngohlak.

⁸Tüolan üshei shange pongpu ükong wangpu ne ngohlak.

⁹“Hüwante iman-e numan shangponge tamlak jingne phünne phalak, hüyange numan toilak; hüyange ümin jingne jat üsheiye numante nulak.

¹⁰Hüwante maawe ütinglakpu mepu yanlak, hüyange jawe ja lowe tamlak;

¹¹hüyange tahleih hipalan maawe ngailak hüyange maawe ünyong yete woilak;

¹²hüyange ngaokeng mengpu jamloi ngaipu kaiye sheyongpu jing yayeng wünge mahlak.

¹³Hüyangpoi aowe üküm ngoiye nün oklakei I yinlak;

¹⁴hüyange hatüo wangdang ahngching pungao ümei kahtoknyu üshei me jat üsheite saki phalak jingne konnyüolak; hüyange hüwante üküm ngoilak.”

¹⁵“Tüokhei Daniel hipawe iye angpu, nunupu mahlakpa aope üjaoken me yongyange ngelakei (aowe iyapeih Iye jaiyah),

¹⁶hüwante Judea me aoyin ngoh kahtang yete taitüoh.

¹⁷Noktok me ngohpu kahta toinan yahlak jingne I nokmong te tah ye;

¹⁸hüyange kah me ngohpu kahta yoi nyemo yahlak jingne tah ye.

¹⁹Hüyange tüopa ju hei hipak me püm yekengpe hüyange düamyeng yingne tampalan sheko jingne onyukei.

²⁰Numan lüowe taipu eanyu yejema-a Sabbath me yeshulak jingne yopyah.

²¹Hangjingne hüwante shange pongpu jamloi yonge ngohlak, kahdeiyengha mepu tenyih ngoiye hüke manngai, hüyange hatüo hüke aope-o yengailak.

²²Hatüo hipak shoh ne tamshima-a. kahtanyuhalan aowe-o yeyin hah shepu; hüyangpoi leyangpulan jingne hatüo hipak shohlak.

²³“Hüwante kahta ütam-e numante, ‘Leitüoh, Messiah tüome ngoh nang!’ yejema-a ‘Otüo me ngohnang’ she ima-a tüote üting tahlak.

²⁴Hangjingne tahleih Messiahlan hüyange tahleih hipalan ngailak, okma-a leyangpulan nehoi ünyong yete woilak jingne füo üyong hüyange kahnyingwüngha hüolak.

²⁵Jaihuyah, Taowe numante shaotan ngao inang.

²⁶Tüokhei kahtalan-e numante ‘Leitüoh, I wanwüng jengme’ she ima-a, tahtai. ‘Leitüoh, I tüp ümongpa me’ she ima-a tüote üting tahlak.

²⁷Hangjingne wanghe ongjing yemepu hangke wanglüppe ngai, hüyange wanghe nyipjing ngoiye ngenang, hatüokih kahta üha peipu ngohkülak.

²⁸Ümeken me lipu mang ngohlakei, tüoken me pongkonlan jemlak.”

²⁹“Tüopa shangpongpu nyih hei hipak linpu phei jamshe wanghe nyakke mahlak, hüyange linnyuwe yoi wangngai yephakülak, wang mepu shanhalan yeilak, hüyange wangmepu wonglan potamlak.”

³⁰Hüwante wangme Kahta Üha füo ngelak, hüyange hüwante kahtoknyu jat hei lilan üsheiye mongjang te tüppe shaplak hüyange iman-e Kahta Üha wangphom me üngan hei müktishiwa üyong pume yupu ngelak.

³¹Hüyange nyawong wüng üyong phei Iye yoi shongmokpalan teilak, hüyange iman-e wangjeng jaye mepu jaye ngoiye, kahtoknyu üshok peli mepu yoiye lepulan woijemlak.

³²“Phukpee kaiye numan-e jaiyahlak shingyah! Aope peequi üla ne meng hüyange üyak ngai, numan-e jüo ngoiküki she shingnang.

³³Tüokih-e numane-o aope tüolan lili ngelakei, numan-e I ü-o me, tafün shongme ngoh nang she shingyah.

³⁴Ütingpa me Taowe numante inang, tüolan lili manngai manngai, tüopa jin linne yetailak.

³⁵Wangdang hei kahtok linne kümlak, hüyangpoi ü-ngao linne yetailak.”

³⁶“Hüyangpoi tüopa nyih hei hipak Üpa tokte kaiye wangdang shongmokpa lanne-o, yejema-a Üha nehoi, yejema-a aowe-o yeshing.

³⁷Hangjingne Noah hipak hangke ngoh, hüke Kahta Üha yupu ngohkülak.

³⁸Hangjingne yengyong muleam manngoipu nyih hei hipak me, hüyange Noah yenglinte ongpu nyih manngoi manngoi she iman-e hah hüyange ying, hüyange mata-tong ningpu ngoh;

³⁹hüyange muleampu peiye iman khongkümpu phwnge mantei mantei iman-e hango yeshing. Kahta Üha yupu-o hüke ngohlak.

⁴⁰Hüwante pa ni kahme ngohlak, pa ja teilak hüyange pa ja tüohlak.

⁴¹Sheko ni shamme shamshuwe ngohlak, ja teilak hüyange ja tüohlak.

⁴²Tüokhei kenting mongtapu phei ngohyah, hangjingne hanghe nyih me numan Youngwanpa peilak numan-e yeshing.

⁴³Numan-e tüo shingyah, nok nokpuwe wangnyak hanghe hipak me kuhpa peilak tüopa shingshih ma-a, Iye yomme ngoh hah shepu, hüyange Iye yoinok mengne yetam hah shepu.

⁴⁴Tüokhei numan-o tümme ngohyah, hangjingne numan-e yeteihpu hipak ja me Kahta Üha peikülak.”

⁴⁵“Üte ipha, hümma-a nok nokpupawe yoi shaoshanpa lante hipak khakshuwe hahying phalak jingne iman tokte yakjongpa ne menglak, monghümme teihpu hüyange kentamongtingpu shaoshanpa ao shi?

⁴⁶Yoi nokpupa peiwante shaoshanpa aowe hüke toilinge ngohlakei, I hangshin mongmeilak.

⁴⁷Taowe numante ütingpa inang, Iye yoi toinyu nanha üshei tangme yakjongpa ne I angkülak.

⁴⁸Hüyangpoi shaoshanpa ümenge ‘Ü-nokpupa peilak hipak nangjange ngoh nang she,’ yoi nying nyingke iyange,

⁴⁹hüyange yoi phei jampu shaoshanpa lante shetne wang, hüyange hahyinge jokke yingma-a,

⁵⁰shaoshanpa Iye yeteihpu nyih ja me nokpupa peilak hüyange hatüo hipak Iye yeshing.

⁵¹Nokpupawe I khoih tanglak hüyange Ipheipu ümenglan phei meitam tamlak. Tüome ukkeyoongpu hei fa ngaopu ngohlak.