Read Konyak Naga MATTHEU 25 Bible Online

MATTHEU 25 - Konyak Naga bible

MATTHEU 25

¹“Hüwante wangdang ahngchinga nyemnya ei naoyha pen, aoyinne yoi vüntük jon hüyange nyemthe nok pongte yu hatüo kih ngohlak.

²Iman yo me naoyha nga ü-nganyulan, hüyange ülao naoyha nga kentamong tingpalan;

³hangjingne ünga-nyulan-e iman vüntük yah hüyangpoi iman phei minnga yeyah;

⁴hüyangpoi kentamongting palan-e yoi vüntük phei yoi shengtak maawe minnga yah.

⁵Nyemthe nok yeonge shonne yepeipe ngoh, hüyange naoyhalan üshei mükngoih shong hüyange iman shimah.

⁶“Hüyangpoi phawo me üngwünpu ja ngai, ‘Naoyha poipate leitüoh! Numan I phei hüone pongte yutüoh.’

⁷Hüwante nyemnya ei moilan shinlüo hüyange yoi yoi vüntük tüm.

⁸Hüyange ünga-nyulan-e kentamong tingpalante i, ‘Tomante-o numan mepu minnga tamkhu, hangjingne toman vüntük mahküki.’

⁹Hüyangpoi kentamong tingpalan-e i, ‘Yeje, aoshing, toman hei numan jingne minnga wange yengohlak. Hüleima-a yüopalan tangte numan taitüoh, hüyange numan-e yoi jingne shakyah.’

¹⁰Iman shakne taiteiye ngohwante, nyemthepa pei, hüyange aoyin tümyange ngoh iman I phei naoyha poipu mo te ong, hüyange taküp küp.

¹¹“Phei me nyemnya ei ülaolan-o pei ngoiye i, ‘Nokpupa, nokpupa, tomante eppha.’

¹²Hüyangpoi Iye janne i, ‘Ütingme taowe numante inangki, taowe numan yeshing.’

¹³Tüokhei, kentingmongta puphei ngohyah, hangjingne numan-e nyih jeyah hipak jeyah yeshing.”

¹⁴“Hangjingne hatüowa kahta jawe yoi shaoshanpalan nyik-e peiye, yoi toi iman yak me phünne phayange, yin taipu ja lenangki.

¹⁵Ja te Iye nginshop nga pha, ülao ja te ni pha, hüyange ülao ja te ja pha, hüke yoi yoite shange pha, hüyange I maolaote tai.

¹⁶Aowe nginshop nga tüo, hüwante muh tüolan phei pheeileih ne tai hüyange nga paowe tüowe ye.

¹⁷Hatüo kih muh aowe nginshop ni tüo, ni paowe tüowe ye.

¹⁸Hüyangpoi aowe ja hei tüo, taiye kahtok shaoyange yoi nokpupa ngin jaowe ang.

¹⁹“Hipak nangjange ngohyange shaoshanpalan nokpu peingoi hüyange iman phei ngin jeng tüm.

²⁰Aowe nginshop nga yah üne-o ülao nga phei I tangte peiye i, ‘Nokpupa, nange üte nginshop nga yakjongne tam. Leihu, taowe nginshop nga paowe küw tüoyangki.’

²¹I nokpuwe Ite i, ‘Meiteki, ümei hüyange monghümpu shaoshanpa. Üjinghapu toi me nang mong hümpu hüoyangki; taowe nang sheyongpu tangme anglak. Peiye ongkei hüyange nang nokpu mongmei me omyah.’

²²Aowe nginshop ni yah, I peingoiye i, ‘Nokpupa, nange üte nginshop ni phei yakjongne tam. Leihu, taowe ni paowe küw tüoyangki.’

²³I nokpupawe Ite i, ‘Meiteki, ümei hüyange monghümpu shaoshanpa. Üjinghapu toi me nang monghümpu hüoyangki; taowe nang sheyongpu tangme anglak. Peiye ongkei hüyange nang nokpu mongmei me omyah.’

²⁴Hüyangpoi aowe nginshop ja yah, I peingoiye i, ‘Nokpupa, taowe nang shingnang: nanga yeonge wanpu kahta, nange ümeken me yedei tüoken me nange wetnang, hüyange nange ümeken me yeshai tüoken me nange yo nang.

²⁵Tüokhei tao nyamme ngoh, hüyange taiye nang nginshop kahtok ümongme jüowe angki. Leihuyah, nangjing nange tüonang.’

²⁶Hüpoi I nokpupawe Ite janne i, ‘Ümeng hüyange jokpa shaoshanpa, taowe hanghe me yedei tüome wetnang, hüyange hanghe me yeshai tüome yonang she nange shing a?

²⁷Hüma-a nange ü-nginna nginang nokte pha anghah shepu; hüyange aope tao ye, üjing hanghe ngoh tüome ngin puh-e tüohah shepu!

²⁸Sha-a, I mepu nginshop yahtüoh hüyange ao me nginshop pen ngoh, Ite phatüoh;

²⁹hangjingne aoyinme ngoh, iman lilite paowe phalak, hüyange Iye wangman-e ngohlak; hüyangpoi aome üjingha nehoi yenang, hüyange Iye hanghe üjingha ngoh, tüo-o yahteilak.

³⁰Hüyange yahlak yenangpu shaoshanpa nokshao ye wangnyak me toonne shüptüoh; hatüome ukkeyoongpu hei fa ngaopu ngohlak.’

³¹“Aope Kahta Üha yoi müktishiwa puphei hüyange I phei wangdang shongmokpalan üshei woiyange yulakei, hüwante I yoi müktishiwa shotjing me shotlak;

³²hüyange jatlan üshei I sheshao me jemlak. Tüophei me nyeeyompawe nyee hei youn tampu kih-e, Iye iman ükhong ni ne tamlak.

³³Iye nyeelan-a yoi yakjah ye me hüyange younlan-a yaknya ye me anglak.

³⁴Hüyange Ahngpawe yakjah yeme ngohpu nyeelante ilak, ‘Wenkei, üpawe moimanpalan, numan jingne kahtamyenghan memuh tümme angpu ahngching moth leiyah.

³⁵Hangjingne Tao seanyaowe ngoh, hüyange numan-e üte hahlak pha; Tao yengleye ngoh, hüyange numan-e yinge tam; Tao yinpa ne ngoh hüyange numan-e woi in;

³⁶Tao tangko me ngoh hüyange numan-e üte inne tam; Tao dak-e ngoh hüyange numan-e ü-phei pongne pei; Tao küpnok me ngoh hüyange numan ü-tangte pei.’

³⁷Hüwante khakshupu lan-e Ite janne ilak, ‘Youngwanpa, toman-e nang seanyaowe aope nge hüyange nangte uhtam, yejema-a yengleye ngoh hüyange nangte yinglak pha ei?

³⁸Toman-e nang yinpa ne aope nge hüyange nang woi in, yejema-a tangko me ngoh hüyange inkhek inne tam ei?

³⁹Toman-e nang dak-e aope nge, yejema-a küpnok me, hüyange nang tangte pei ei?’

⁴⁰Ahngpawe imante janne ilak, ‘Ütingme Taowe numante inang, tüolan ü-jeiheinao üshoipa yo me ja te nehoi, numan-e hanghe ling, hatüo numan-e üte lingyangki!’

⁴¹“Tüophei me Iye yaknya ye me ngohpalan te-o ilak; ‘Numan phoiwümpu shahpalan, ü-mepu yantüoh; kahshih hüyange I shongmokpalan jingne hanghe pa üküm yenangpu vün tümme ngoh nang tüote yutüoh;

⁴²hangjingne Tao seanyaowe ngoh hüyange numan-e hahlak yepha; Tao yengleye ngoh hüyange nange yinglak hango yepha;

⁴³Tao yinpa ne ngoh hüyange numan-e Tao woiye ye-in; tao tangko me ngoh hüyange numan-e üte inkhek inne yetam, dak hüyange küpnok me ngoh hüyange numan ü-tangte yengoi.’

⁴⁴Hüwante imane-o janlak, ‘Youngwanpa, aope toman-e nang seanyaowe, yejema-a yengleye, yejema-a yinpa ja ne, yejema-a tangko yejema-a dak-e yejema-a küpnok me ngeyang pheite hüyange toman-e nang wongpong te yejampe ngoh ei?’

⁴⁵Hüwante Iye imante janlak ‘Ütingme taowe numante inang, tüolan üshoipa yo me ja te numan-e hanghe yeling, hatüo numan-e üte yeling.’

⁴⁶Hüyange tüolan üküm yenangpe shangjing te yulak, hüyangpoi khakshupulan-a jinte pu üyin chingte tailak.”