Read Konyak Naga MATTHEU 26 Bible Online

MATTHEU 26 - Konyak Naga bible

MATTHEU 26

¹Aope Jesuwe tüolan khongkümpu ngaowe sho Iye yoi pinlan te i,

²“Nyih ni ngohyange Yinyepu mo ngohlak numan-e shing, hüyange Kahta Üha tangpem me dakne phünne phalak.”

³Tüo hipak me ngengpa üjenglan hüyange ükhong mepu jeiyonglan Kaifas she nyikpu ütahpa ngengpa nokshao me jem;

⁴hüyange iman-e konlinge Jesu pholak hüyange I toilak taisho.

⁵Hüyangpoi iman-e i, “Ükhong yo me teelapu ngaiye ngohlak yang, mo hipak me tah linghah.”

⁶Aope Jesu Bethani me ngonpa Simon nok me ngoh,

⁷shekoja yeonge pheei wanpu üpe meipu minnga longsheng tük üheng ja yah-e I tangte pei hüyange Jesu khao me shotte hah ngohwante I shang te yeiye photam.

⁸Hüpoi aope pinlan-e tüo nge iman mongshih hüyange i, “Hatüo hangne shai?

⁹Hatüowa nangjangpu nginte yaohah shepu hüyange toihalan te phahah shepu.”

¹⁰Iman-e hanghe ngao tüopa jingne Jesu mong a teih hüyange imante i, “Hangne numan-e shekonyu shangne tampu? Yhawe üjingne yeonge üshe meipu toi lingnang;

¹¹hangjingne toihalan numan phei jinte ngohlak, hüyangpoi Tao numan phei jinte yengohlak.

¹²Aope yhawe ü-pümte minnga phoyapeih, tüowe Tao mangjong me mulak tümlak jingne yhawe jonnang.

¹³Ütingme Taowe numante inang, kahtoknyu üshei me üpüken me tüopa Pungao Ümei nyüolakei, hatüo shekowe hanghe jon, yha jeng teihtüowe ngaolak.”

¹⁴Hüwante penme ni yomepu Judas Iskariot she nyikpu ja ngengpa üjenglan tangte tai,

¹⁵hüyange i, “Taowe numante I phünne phaküma-a numan-e üte hang phalak?” Hüyange iman-e Ite nginkhüo delüm pha.

¹⁶Hüyange tüohipak me peiye Iye imante I phünne phalak yafün yam.

¹⁷Sha-a do yenyütpu an mo ükongwangpu nyih me, pinlan-e Jesu tangte peiye i, “Nang jingne Yinyepu mo hahlak toman-e üpüken me tümme tamhu nangki?”

¹⁸Iye i, “Chingnyu yeme kahta ja tangte ongtüoh hüyange Ite itüoh, ‘Konnyüopawe hüke i, Ü-hipak owe peiteki. Tao hüyange ü-pinlan-e Yinyepu mo nenok me hahlak.’ ”

¹⁹Jesuwe imante hangke ngaopha tüokih pinlan-e ling, hüyange iman-e Yinyepu mo tüm.

²⁰Aope ün ngoi pinlan penme ni phei hahlak jingne I khao me shot;

²¹hüyange iman hahwante Iye i, “Ütingme Taowe numante inang, numan yo me shejawe Tao phünne phalak.”

²²Iman yeonge mongmeng hüyange japhei me ja she Ite i, “Youngwanpa, ütingme hatüowa tao a?”

²³Iye janne i, “Aowe ü-phei shengja me yak hünge hahnang Iye Tao phünne phalak.

²⁴I jeng nyanne ngohpu kih-e Kahta Üha tainang, hüyangpoi ao kaiye kahta üha phünne phanang tüopa kahta jingne onyukei! Tüopa kahta jingne I yepuhpu shemei hah shepu.”

²⁵Judas, aowe I phünne pha, Iye jan, “Konnyüopa, ütingme nange üte ikü a?” Iye Ite i, “Nange iyangki.”

²⁶Aope iman hahyapeih, Jesuwe an yah, moimanne tam, hatüo khoihpai hüyange pinlante phawe i, “Yahtüoh, hahtüoh, hatüo ü-püm.”

²⁷Tüophei me Iye wan ja yah, moiman pha, hüyange hatüo imante phawe i, “Numan üsheiye hatüo mepu yingtüoh;

²⁸hangjingne hatüo jiengjeppu ü-iy, maapu ümenglan ünu win oklak jingne, shokke winnang.

²⁹Taowe numante inang, numan phei Tao üpa ahngching me tüopa nyih me wuwüngti üla manying manying sha-a me peiye Taowe hatüo wuwüngti yeyinglak.”

³⁰Aope iman-e hem ja lok, iman nokshao te yuwe Olive Kahtang te tai.

³¹Hüwante Jesuwe imante i, “Teya numan üshei üte yashah hüolak; hangjingne hüke nyanne ngohnang; ‘Taowe nyeeyompa te shetlak, hüyange nyeekhong yanne tailak.’

³²Hüyangpoi Tao yange yephei me numan taishaome Tao Galilee te tailak.”

³³Peterwe Ite janne i, “Nang jingne üshei yashah hüowe taiye kümyapoi, tao aope-o yehaolak.”

³⁴Jesuwe Ite i, “Ütingme Taowe nangte ipha ning, teya awha ko shaome nange üte lümme yejanlak.”

³⁵Peterwe Ite i, “Tao nangphei lilak ne peiyapoi, taowe nang yejanpe yengohlak.” Pinlan üsheiye hüke muh i.

³⁶Hüwante Jesu iman phei jamme Gethsemane she nyikpu nyoijing ja te pei, hüyange Iye yoi pinlante i, “Tao otüo me taiye yopwante numan tüome shotte ngohkei.”

³⁷Iye yoi phei Peter hüyange Zebedee üha ni woi, hüyange mongshange hüyange meiyange shangne ükong wang.

³⁸Hüwante Iye imante i, “Ü-yaha lilakne meiyange mongmeng nangki; numan tüome ngohkei hüyange ü-phei yange ngohkei.”

³⁹I sheshaoyete shejai she wen, sheta khuhta, hüyange yop, “O Opa, hatüo oklakne mengma-a, tüopa wan ü-mepu yahtepha; tüoyangpoi Taowe mongpu kih yeje, hüyangpoi nang mongpu kih lingpha.”

⁴⁰Tüophei me I pinlan tangte ye hüyange iman shi-ngoh; hüyange Iye Peter te i, “Tüokhei, numan ü-phei ghonda ja nehoi yange yengoh okpu a?

⁴¹Tokpu me numan yeyeilak jingne, menghapu phei hüyange yopyah. Yahawe monghah shihpu, hüyangpoi meime wong yenang.”

⁴²Üne-o, nishe I yonge tai hüyange yop, “O Opa, Taowe hatüo yeyingpe, hatüo yahteipu ye-ok ma-a, nang mongngei yao.”

⁴³I üne-o leihye hüyange iman shi-ngohpu nge, hangjingne iman mük shihupuwe mengteiye ngoh.

⁴⁴Iye iman tüoh, hüyange I üne-o tai hüyange lüm she yop; tüopa ngao jamuh iye yop.

⁴⁵Hüwante pinlan tangte I ye hüyange imante i, “Sha-ate ngoiye numan shiye hüyange toloimeinang kü a? Leiyah, hipak-a yakme tükke peiteki, hüyange Kahta Üha ünulan yak me phünne phalak.

⁴⁶Yayongtüoh, teman taihah. Leiyah, Tao lowe tampupa ü-o me ngohnang.”

⁴⁷Aope I yelakpe ngaowe ngoh, Judas, penme ni yomepu ja ngengpa üjenglan hüyange payonglan mepu ükhong üyong yanglow hei peshüm jonyange I phei woipei.

⁴⁸Sha-a I lowe tampawe ükhong te füojai ja hüowe i; “Taowe ao te omhüp lakei, hatüowa I; I photüoh.”

⁴⁹I Jesu tangte tingkhakke wen hüyange i, “Konnyüopa, meiye ngohyah.” Hüyange Ite omhüp.

⁵⁰Jesuwe Ite i, “Shümpa, hanghe jingne tüome pei nange lingtüoh.” Hüwante iman peiye Jesute yak jon hüyange I pho.

⁵¹Jesu phei ngohpu yo mepu naoshe jawe I yak nowe yanglow teakke yah; Iye ütahpa ngengpa shaoshanpa te met, hüyange I na lange win.

⁵²Hüwante Jesuwe Ite i, “Nang yanglow yoi ngohjing me nishe angtüoh, hangjingne aoyinne yanglow jonlakei, iman üshei yanglow-e mahlak.

⁵³Yejema-a üpawe sha-a ü-tangte wangdang shongmokpalan hajakhong pen me ni phei nyeiye shonlakne, Taowe Ite yune ye-oklak she nange teihnang kü a?

⁵⁴Hüyangpoi hüke yenangma-a hatüo nangkülak she ngaolai me iyangpu ütahte hangke ngailak?”

⁵⁵Tüohipak me Jesuwe ükhongte i, “Numan-e leihpalan pho ne peipu kih, yanglow hei peshüm jonyange Tao pho ne peipu a? Tao khümjing me nyihjeih konnyüowe shot, hüyangpoi numan-e Tao yepho.

⁵⁶Hüyangpoi tüolan üshei hipalan-e ngaolai me nyanpu ütahte ngailak jingne ngainang.” Hüwante pinlan üsheiye I tüohyange yantai mah.

⁵⁷Tüophei me aoyinne Jesu pho yapeih, iman-e ütahpa ngengpa Kaifas nok me Ngaokeng nyüopalan hei jeiyonglan jemme ngohjing te I woitei.

⁵⁸Hüyangpoi Peter üjai me I phei te ütahpa ngengpa nokshao ngoiye woi; hüyange I-o nokshao me shotpalan phei hüyange üküm ngoipu shinglak jingne, jemme ngohpalan phei shot.

⁵⁹Sha-a ngengpa üjenglan hüyange Ngengtüp khongkümpuwe Jesu phei la-e I li ne tamlak jingne tahleih saki yam:

⁶⁰hüyangpoi iman-e tahleih saki maawe yahpeiyapoi ja nehoi yetüo. Phei me, pa ni ngai,

⁶¹hüyange i, “Taowe Kahwang khümjing mengpu oklak, hüyange nyih lüm mongme hatüo wepu oklak she, tüo kahtawe ipu üja.”

⁶²Ütahpa Ngengpa yong hüyange i, “Nange hango yejan lak a? Nang phei tüi-e tüolan-e hanghe saki phapu shi?”

⁶³Hüyangpoi Jesuwe kekshe yengao. Ütahpa ngengpawe Ite i, “Üyin Kahwang min me taowe nangte jienge inang; nang Kahwang üha Messiah ne jeküma-a tomante ipha.”

⁶⁴Jesuwe Ite i, “Nange hüke iyangki; hüyangpoi Taowe numante inang, shaame peiye numan-e Kahta Üha ünganwong yakjah yeme shotyange, hüyange wang mepu wang phom phei yupu numan-e ngelak.”

⁶⁵Hüwante ütahpa ngengpawe yoi inkhek hitte i, “Iye Kahwangte phoiwüm-e ngaoyangki. Hangne teman-e ülao saki yamlak wongpong shi? Sha-a numan-e Iye yaolepu jaiyangki.

⁶⁶Numan-e hangke teihnangki?” Iman-e jan, “Iye püohnang, I li ne tamlak.”

⁶⁷Hüwante iman-e I shetate iyphao phao hüyange shet, hüyange ütam-e yakphawe leiye i,

⁶⁸“Messiah, nangte shetpuwa ao shi tomante hi-ngao itehu?”

⁶⁹Sha-a Peter nokshao me shotte ngoh, hüwante ütahpa ngengpa nok shaoshannyu ja I shongte peiye i, “Nango Galileelan Jesu phei jamme ngohpu.”

⁷⁰Hüyangpoi Iye iman üshei sheshao me I yejan, hüyange i, “Nange hanghe iyapeih taowe yeshing.”

⁷¹Aope I peten shong yete yu, ülao sheko jawe I nge, hüyange shotte ngohpalan te i, “Hatüo kahta Nazareth mepu Jesu phei ngohpu üja.”

⁷²Iye üne-o yejanpe jienge i, “Kahta-a taowe yeshing.”

⁷³Kenja ngohyang phei me ü-o me yonge ngohpalan wen hüyange Peter te i, “Nango ütingme iman yo me ja üja, hangjingne nang ngao kaiye nang aoshi hüonangki.”

⁷⁴Hüwante Iye phoiye hüyange jienge hüke i, “Kahta-a taowe yeshing.” Hüwante nünge awka.

⁷⁵Hüyange Jesuwe, “Awha koshao me nange Tao lümme yejanlak,” she ipu ngao Peterwe teihpei. Hüyange I nokshao te yu hüyange yeonge khah-e shap.