Read Konyak Naga MATTHEU 27 Bible Online

MATTHEU 27 - Konyak Naga bible

MATTHEU 27

¹Aope napning ngoi, ngengpa üjenglan hüyange jeiyonglan üshei jemme Jesu li ne tamlak jingne I phei tüi-e ngao ngai;

²hüyange iman-e I shayange Governor Pilate tangte woipeiye phünne pha.

³Hüwante aope Judas, I lowe phapupawe Ite ümeng phapu shing, I monglüp, hüyange ngengpa üjenglan hei jeiyonglan tangte ngin delüm phei leihye,

⁴hüyange i, “Ümeng yenangpu iy phünne phapu kaiye taowe ünu lingyangki.” Hüyangpoi iman-e i, “Tomante hatüo hanghene? Hatüote nang nying nyingke leiyah.”

⁵Iye ngin-a khümjing me shüppe tüohyange tai, hüyange I taiye yoi nying nyingke jhotte li.

⁶Hüpoi ngengpa üjenglan-e ngin toonne yah hüyange i, “Hatüowa iy shakpu ngin, hüyange khümjing ngin angpu nyoi me anglak teman wanglam me yeshu.”

⁷Iman-e taisho, hüyange kümp kahtok ja shaklak, hüyange yinpalan mangjong ne menglak she tüm.

⁸Tüokhei tüopa kahtokte tenyih ngoiye iy kahtok she nyiknang.

⁹Hüwante Jeremia hipa kaiye hanghe ngao, ütahte ngai. “Israel halan yome ütam ao kahta jeng phongyeng, hatüo phongyengpu kahta ümee ngin delüm iman-e yah,

¹⁰hüyange Youngwanpawe üte ipukih, hatüo kümp kahtok jingne pha.”

¹¹Sha-a Jesu Governor sheshao me yongne tam, hüyange Governorwe Ite tong, “Nanga Jehudilan Ahngpa a?” Jesuwe i, “Nange hüke iyangki.”

¹²Hüyangpoi aope ngengpa üjenglan hei jeiyonglan-e Ite ümeng phawe ngaoyapeih Iye hango yejan.

¹³Hüwante Pilate Ite i, “Iman-e nang phei tüi-e saki hangshin pha nange yejai a?”

¹⁴Hüyangpoi Iye Ite ngaopha ja nehoi yejan, tüokhei Governorpa meiyange yashan.

¹⁵Sha-a mo hipak me ükhong te küpnok me ngohpu iman-e mongpu ja lan ne tamlak Governor wanglam ne ngoh.

¹⁶Hüwante Barabbas she nyikpu moilanne shingpu langpho ja küpnok me ngoh.

¹⁷Tüokhei aope iman shüppe jem, Pilate imante i, “Numan jingne taowe ao lantam phahu nangki, Barabbas heiya yejema-a, Khrista she nyikpu Jesu?”

¹⁸Hangjingne Ite aohüngpu jingne iman-e I phünne pha she Iye mei meishing.

¹⁹Aope Pilate ngaophünpu shotjing me shotte ngoh, I shekowe Ite shonne i, “Hatüo khakshupu kahta jingne nange hango tahling, hangjingne tenyih tao I jingne mangme meiyange shangyangki.”

²⁰Hüyangpoi ngengpa üjenglan hüyange jeiyonglan-e Jesu toiyange Barabbas lanpha she yutüoh she ükhongte yoh.

²¹Governorwe imante üne-o i, “Imni yo me taowe numante aohipa lanlak numan-e mongnangki?” Iman-e i, “Barabbas.”

²²Pilate imante i, “Hüma-a Khrista she nyikpu Jesute taowe hang linglak shi?” Iman üsheiye i, “I tangpem me taktüoh!”

²³Iye i, “Hangne, Iye hanghe ümeng lingpu shi?” Hüyangpoi iman-e sheyong she üngwünne i, “I tangpem me taktüoh!”

²⁴Tüokhei Pilate I ngao hangne-o yemeng, hüyangpoi ükhong moppu pahi yemeine wangpu ngeye, Iye yeng yahpuwe ükhong shaome yak tuhwe i, “Hatüo khakshupu kahta iy jingne üme ümeng yenang; numan-e hangke mong hüke lingyah.”

²⁵Hüyange kahta üsheiye janne i, “I iy tomante hüyange toman hayimte shahpha!”

²⁶Hüwante Iye imante Barabbas lanne tei hüyangpoi Iye Jesute shetwuwe shetne tam, hüyange tangpem me eplak jingne phünne pha.

²⁷Hüwante Governor kengphet lan-e Jesu ahngnok te woitei, hüyange kengphet ükhong üshei I tangte jem.

²⁸Hüyange iman-e Ijing inkhek khokyah, hüyange Ite nye-ümon inne tam;

²⁹iman-e huh phei ahngpa shaoshaoh ja ling hüyange I shangme shaohne tam, hüyange I yakjah yeme shengshaoh ja shümtam; hüyange I sheshao me khuhtayange yaowe i, “Jehudilan Ahngpa mei ngoh yah!”

³⁰Iman-e Ite iyphao phao, hüyange shengshaoh yah hüyange I shangte shet.

³¹Aope iman-e Ite yaolepu sho iman-e I mepu nye-ümon yah hüyange Ite yoi inkhek inne tam, hüyange I tangpem me takne woitei.

³²Hüyange iman ngaitai wante, Simon she minpu Sairin kahta ja, iman-e nge; hüyange Jesu tangpem pailak jingne iman phei kange tei.

³³Hüyange aope iman-e Golgotha, she nyikpu nyoi (leppu “Shangwaan nyoi”) ngoi;

³⁴tüome iman-e ükha phei nyütyangpu wuwüngti yinglak jingne Jesute pha; hüyangpoi aope Iye hatüo jüppe nyao Iye yinglak mepu lan.

³⁵Iman-e I tangpem me tak, hüyange phongyeng yange I nyemo iman yo me tamme yah;

³⁶hüyange iman tüome shotyange I yomme lei ngoh.

³⁷Hüyange I shangtang me iman-e I phei tüi-e nyanpu ja hüke ang, “Hatüowa Jehudilan Ahngpa Jesu.”

³⁸Tüohipak me I phei jamme kuhlang ni tak, ja yakjah ye me hüyange ja yaknya yeme.

³⁹Hüyange aoyin linne tai, iman ngüm ngokke Ite yao;

⁴⁰hüyange hüke i, “Khümjing mengyange hatüo nyihlüm mongme welakpa nang, nang nying nyingke yintüoh, nang Kahwang üha ne mengma-a, tangpem mepu yukei.”

⁴¹Hükemuh ngengpa üjenglan-e, ngaokeng nyüopalan hei jeiyong lan phei, Ite yaowe i,

⁴²“Iye eiha yin ok; yoi nying nyingke Ipa-a yeyin ok! I Israel Ahngpa; I sha-a tangpem mepu yu ne tamtüoh hüyange teman-e Ite üting laklak.

⁴³Iye Kahwang te monghüm; Kahwange Ite mongmei küma-a, sha-a Iye yintüoh; hangjingne Iye i, Tao Kahwang üha.”

⁴⁴Hüyange I phei jamme takpu kuhlang lanne-o hatüo kih yao.

⁴⁵Sha-a penme ni paji mepu lüm paji ngoiye kahtoknyu üshei me wangnyak.

⁴⁶Hüyange lümpaji hipak me Jesuwe ngao üyong phei üngwünne i, “Eli, Eli , Lama Sabachthani!” leppu, “Ü-Kahwang, Ü-Kahwang, hangne nange Tao winpu shi?”

⁴⁷Aope tüome yonge ngohpu ütamme tüopa jai, iman-e i, “Iye Elijah te nyiknang.”

⁴⁸Iman yo me she ja mamshe phet, shekwan yah, wuwüngti üshi maawe shok, lenglaow ja me sha hüyange yinglak jingne Ite pha.

⁴⁹Ülaolan-e i, “Tantüoh I yinlak jingne Elijah yuya she ne leihah!”

⁵⁰Jesuwe üne-o ngao üyong ngaiye üngwün hüyange yoi yaha tei.

⁵¹Hüyange leihu, khümjing me shongpu jhotnye ütang mepu yashong ngoiye ni ne hit; hüyange minwe lei, hüyange longnyulan khüw;

⁵²mangkoksalan ep, hüyange üjao kahtalan aoyin shi ngohyangki iman pümme yange yetam;

⁵³iman-e mangjong nyoilan tüoh, hüyange lipu mepu Jesu yange yephei me, iman üjao chingnyu te ong, ümeken me maapuwe iman nge.

⁵⁴Aope Roman woipa hüyange I pheipu Jesu yomme ngohpalan-e, minweleipu nge, hüyange hangheyin ngai tüo lili ngewante yeonge nyam. Iman-e i, “Ütingme tüopa kahta Kahwang üha ne ngohpuyang.”

⁵⁵Tüome shekolan maawe üjai me leiye ngoh. Iman Galilee mepu Jesu wongpong üsheite jamme peiyangki.

⁵⁶Iman yo me Mary Magdalene, Jeams hei Joseph ünyu Mary, hüyange Zebedee ühalan ünyu omme ngoh.

⁵⁷Aope ün ngoi, Arimathia mepu hakpa kahta ja pei, I-o yoi nying nyingke Jesu pinne menge ngoh. Ite Joseph she min.

⁵⁸I Pilate tangte pei hüyange Jesu mang yu. Hüwante Pilate Ite phatüoh she ngaopha.

⁵⁹Hüwante Josephwe mang yah, hüyange jaoshepu nyekhai me yout,

⁶⁰hüyange Iye longnyu shaowe linge ngaipu, yoi mangkoksa üla me mu, hüyange mangkoksa taküp ne longkhao lapa küppe angyange tai.

⁶¹Mary Magdalene hüyange ülaopa Mary mangjong phei janhüowe shotte ngoh.

⁶²Üne nyih, Tümpu Nyih phei me, ngengpa üjenglan hüyange Phariseelan Pilate tangte jamme pei

⁶³hüyange i, “Üyongpa, hatüo tahleih ipawe I üyin me ngohwante, nyih lüm ngohyange ‘Tao yange yelak’ she ipu ngao toman-e teihpei nangki.

⁶⁴Tüokhei nyih lüm ngoiye mangjong yomne ngaokeng phatüoh; aoshing I pinlan peiye I kuhteiyange, ‘I lipu mepu yange yeteki,’ she kahtalante ikülak, hüyange üwangpa ümeng phei ükümpa ümeng shemengpu ne ngohkülak.”

⁶⁵Pilate imante i, “Yomlaklan yayah, taitüoh hüyange numan-e meipu shinne mangjong yomtüoh.”

⁶⁶Tüokhei iman taiye, iman phei yompalan-o omme, longme füosang tüpyange mangjong yom ne tam.