Read Konyak Naga MATTHEU 28 Bible Online

MATTHEU 28 - Konyak Naga bible

MATTHEU 28

¹Sabbath linphei me, hat me üwangpa nyih wangngai shao me Mary Magdalene hüyange ülaopa Mary mangjong te leine wen.

²Hüyange leihu, minwe üyong lei; hangjingne Youngwanpa shongmokpa wangdang mepu yu, hüyange longkhao toiloi winyange tüopa tangme shot.

³I sheta wangphih langpu kih, hüyange I inkhek yi ke henge ngoh.

⁴Hüyange aoyin yomme ngohyapei I shaote nyampuwe yeonge nin hüyange kahta ümang kih mengemah.

⁵Hüwante wangdang shongmokpawe shekolante i, “Numan nyamlak hango yenang. Hangjingne numan-e Jesu ao tangpem me tak I yamnang she taowe shingnang.

⁶I tüome yenang; hangjingne Iye ipukih, I yange yeteki. Wenkei, I shipu nyoite leitüoh.

⁷Hüyange mamshe taitüoh, hüyange I pinlante itüoh, I lipu mepu yange yeteki, hüyange I numan shaote Galilee te tainang; numan-e I tüome ngelak. Leiyah, sha-a taowe numan te iyangki.”

⁸Tüokhei iman mangjong mepu, nyampu hüyange mongmei üyongphei mamshe yanne tai, hüyange I pinlante ponglak jingne iman phet.

⁹Leihuyah, mokhshe Jesu iman phei hüowe i, “Meiye ngohyah!” Iman wenne I ya me jon, hüyange iman-e Ite khüm.

¹⁰Hüwante Jesuwe imante i, “Tahnyam, taitüoh, ü-jeihei naolante Galilee te taitüoh she itüoh, hüyange iman-e tüome Tao ngelak.”

¹¹Aope shekolan lam me ngoh, yompalan ütam chingnyute onge ngengpa üjenglan te ngaipulan khongkümpu i.

¹²Hüyange aope iman jeiyonglan phei jemme taishowe tüm, iman-e kengphetlante ngin maawe phawe i,

¹³“Toman shiye ngohwante I pinlan yaning peiye I yahtei, she numan-e itüoh.

¹⁴Hüyange hatüo jeng Governorwe jaiküma-a, toman-e I yohmeilak hüyange numan yinlak.”

¹⁵Tüokhei iman-e ngin yah, hüyange imante nyüopu ke ling; hüyange hatüo ngao Jehudilan yo me üshei yete jaatai, hüyange tenyih ngoiye yelakpe ngohnang.

¹⁶Sha-a pinlan penme ja Jesuwe imante ipu Galilee me ngohpu kahtang te tai.

¹⁷Aope iman-e I nge I sheshao me khuhtawe iman-e khüm; hüyangpoi ütam nüngnei.

¹⁸Hüyange Jesu iman shongte wenne hüke i, “Wangdang me hüyange kahtoknyu me üngan üshei üte pha yangki.

¹⁹Tüokhei, numan-e taiye, jat üshei pin ne menge, Üpa, Üha hüyange Yaha Üjao min me iman baptitüoh;

²⁰hüyange Taowe numante ngaopha yangpu üshei jonlak jingne imante nyüotüoh, hüyange leihu, kahtoknyu manküm manküm Tao numan phei jinte jamme ngoh nang.”